ദേശീയപാതകളില് 147 ഇവി സ്റ്റേഷനുകളും! പദ്ധതി നടത്തിപ്പ് കെഎസ്ഇബിക്ക്
പയ്യന്നൂര്: ദേശീയപാതയില് ഇവി ചാര്ജിംഗ് അടിസ്ഥാന സൗകര്യങ്ങള് ശക്തിപ്പെടുത്തുന്നു. ഇതിനായി കേരളത്തിലെ ദേശീയ പാതകളില് 147 ഇലക്ട്രിക് വാഹന ചാര്ജിംഗ് സ്റ്റേഷനുകള് സ്ഥാപിക്കാന് ഒരുങ്ങുകയാണ്. കേന്ദ്ര സര്ക്കാര് സംരംഭത്തിന്റെ ഭാഗമായ ഈ പദ്ധതിയുടെ സംസ്ഥാനത്ത് നടത്തിപ്പ് മേല്നോട്ടം വഹിക്കാന് കെ എസ് ഇ ബിയെ ആണ് ചുമതലപ്പെടുത്തിയിരിക്കുന്നത്.
കേരളത്തിലെ റോഡ് ശൃംഖലകളിലാകെ 270 ഇവി ചാര്ജിംഗ് സ്റ്റേഷനുകള്ക്കുള്ള അനുമതിയാണ് തേടിയിരിക്കുന്നത്. അതില് 147 എണ്ണം ദേശീയ പാതകളിലായിരിക്കും എന്നാണ് വിവരം. സര്വീസ് റോഡുകളില് ലഭ്യമായ സര്ക്കാര് ഭൂമിയുടെ വിശദാംശങ്ങള് പദ്ധതി നിര്ദ്ദേശത്തിന്റെ ഭാഗമായി സമര്പ്പിച്ചിട്ടുണ്ട്. പിഎം ഇ-ഡ്രൈവ് (പിഎം ഇലക്ട്രിക് ഡ്രൈവ് റെവല്യൂഷന് ഇന് ഇന്നൊവേറ്റീവ് വെഹിക്കിള് എന്ഹാന്സ്മെന്റ്) പദ്ധതിയുടെ കീഴിലാണ് ചാര്ജിംഗ് സ്റ്റേഷനുകള് സ്ഥാപിക്കുന്നത്.
കെ എസ് ഇ ബിയുടെ പുനരുപയോഗ ഊര്ജ്ജ, ഊര്ജ്ജ സംരക്ഷണ വിഭാഗം അഥവാ ആര് ഇ ഇ എസിനാണ് പദ്ധതി നടത്തിപ്പ് ചുമതല. റവന്യൂ വകുപ്പ്, ബി എസ് എന് എല്, കെ എസ് ആര് ടി സി, കെ എസ് ഇ ബി എന്നിവയുള്പ്പെടെ വിവിധ സര്ക്കാര് ഏജന്സികളുടെ ഉടമസ്ഥതയിലുള്ള സ്ഥലങ്ങളിലായിരിക്കും ഇലക്ട്രിക് വാഹന ചാര്ജിംഗ് സ്റ്റേഷനുകള് സ്ഥാപിക്കുക.
ദേശീയ പാതകളില് ഓരോ 25 കിലോമീറ്ററിലും കുറഞ്ഞത് ഒരു ഫാസ്റ്റ് ഇ വി ചാര്ജിംഗ് സ്റ്റേഷനെങ്കിലും ലഭ്യമായിരിക്കണം എന്നാണ് കേന്ദ്ര വൈദ്യുതി മന്ത്രാലയം പുറപ്പെടുവിച്ച മാര്ഗ്ഗനിര്ദ്ദേശത്തില് പറയുന്നത്. ബസുകള്ക്കും ട്രക്കുകള്ക്കും, ഓരോ 100 കിലോമീറ്ററിലും ഒരു തവണയെങ്കിലും ഒരു ചാര്ജിംഗ് സ്റ്റേഷന് ആവശ്യമാണ് എന്നും കേന്ദ്രം നിഷ്കര്ഷിച്ചിട്ടുണ്ട്. കെ എസ് ഇ ബിയെ കൂടാതെ അനെര്ട്ട്, ഗോ ഇസി തുടങ്ങിയ ഏജന്സികള് പ്രധാന പാതകളില് ഫാസ്റ്റ് ചാര്ജിംഗ് സൗകര്യങ്ങള് ഒരുക്കിയിട്ടുണ്ട്.
ദേശീയപാത 66 ലെ കളിയിക്കാവിള മുതല് കാസര്കോട് വരെ പലയിടങ്ങളിലും ചാര്ജിംഗ് കേന്ദ്രങ്ങളുണ്ട്. കൊട്ടിയം (കൊല്ലം), കരുനാഗപ്പള്ളി (ഹോട്ടല് ഇന്ദ്രപ്രസ്ഥ), കായംകുളം (ജിഡിഎം ഒാഡിറ്റോറിയം), ആലപ്പുഴ (പുന്നപ്ര, കൊമ്മാടി), ചേര്ത്തല സൗത്ത്, എറണാകുളം (മരട്, എടപ്പാള്), കോഴിക്കോട് (രാമനാട്ടുകര, ഹൈലൈറ്റ് മാള്), കണ്ണൂര് (പയ്യന്നൂര്) എന്നിവ പ്രധാന കേന്ദ്രങ്ങളാണ്.
കൊച്ചി - പാലക്കാട് ദേശീയപാത 544 ല് എറണാകുളം മുതല് വാളയാര് വരെ (അങ്കമാലി, തൃശൂര്, പാലക്കാട്) കെഎസ്ഇബി, ഏഥര്ഗ്രിഡ്, ചാര്ജ്മോഡ് എന്നിവയുടെ സ്റ്റേഷനുകള് ലഭ്യമാണ്. ചാര്ജിംഗ് സ്റ്റേഷനുകളില് മിക്കവയും 60kW, 142kW വരെയുള്ള CCS (Combo 2) ഫാസ്റ്റ് ചാര്ജറുകളാണ് ഉപയോഗിക്കുന്നത്. കായംകുളം, കരുനാഗപ്പള്ളി തുടങ്ങിയ സ്ഥലങ്ങളില് കെഎസ്ആര്ടിസിയോട് ചേര്ന്നോ, ഹോട്ടലുകള്ക്ക് സമീപമോ ചാര്ജിംഗ് കേന്ദ്രങ്ങളുണ്ട്.
Click it and Unblock the Notifications
Sign in with Google