യേശുദാസിന്റെ വാക്കുകള് ധാര്മികതക്ക് നിരക്കാത്തതെന്ന്....
തിരുവനന്തപുരം: സ്ത്രീകള് ജീന്സ് ധരിക്കുന്നതിനെപ്പറ്റി അഭിപ്രായം പറഞ്ഞ ഗാനഗന്ധര്വന് കെജെ യേശുദാസ് ഇപ്പോള് കുടുങ്ങിയിരിക്കുകയാണ്. സോഷ്യല് മീഡിയ മുഴുവന് ദാസേട്ടനെ വിമര്ശിച്ചുകൊണ്ടുള്ള പോസ്റ്റുകള് കൊണ്ട് നിറഞ്ഞിരിക്കുകയാണ്.
അതിനിടയിലാണ് ദേശീയ വനിത കമ്മീഷനും യേശുദാസിനെതിരെ തിരിഞ്ഞിരിക്കുന്നത്. യേശുദാസിന്റെ പരാമര്ശങ്ങള് ദൗര്ഭാഗ്യകരമാണെന്നാണ് വനിത കമ്മീഷന് അധ്യക്ഷ ലളിത കുമാരമംഗലം പറഞ്ഞത്.
ധാര്മികതക്ക് നിരക്കാത്തതാണ് അദ്ദേഹത്തിന്റെ വാക്കുകള് എന്നും വനിത കമ്മീഷന് അധ്യക്ഷ ആരോപിച്ചു. യേശുദാസിനെ പോലെയുള്ള ഒരാള് ഇത്തരം കാര്യങ്ങള് പറയാന് പാടില്ലായിരുന്നുവെന്നും അവര് വ്യക്തമാക്കി.
സ്ത്രീകള് ജീന്സ് ധരിച്ച് മറ്റുള്ളവരെ വിഷമിപ്പിക്കരുതെന്നായികരുന്നു യേശുദാസിന്റെ വാക്കുകള്. ജീന്സ് ധരിക്കുമ്പോള് അതിനുമപ്പുറമുള്ള കാര്യങ്ങള് ശ്രദ്ധിക്കാന് തോന്നും എന്നും അദ്ദേഹം പറഞ്ഞിരുന്നു. തിരുവനന്തപുരത്ത് നടന്ന് ശുചിത്വ കേരളം സുന്ദര കേരള പരിപാടിയിലായിരുന്നു അദ്ദേഹത്തിന്റെ പരാമര്ശങ്ങള്.
സംഭവം അപ്പോള് തന്നെ സോഷ്യല് മീഡിയ ഏറ്റെടുത്തു. യേശുദാസിന്റെ മക്കളുടെ ഭാര്യമാര് ജീന്സ് അണിഞ്ഞ് നില്ക്കുന്ന ചിത്രവും തപ്പിയെടുത്തായിരുന്നു ചിലര് രംഗത്തെത്തിയത്. സ്ത്രീപക്ഷ വാദികളും പുരോഗമന വാദികളും യേശുദാസിനെതിരെ വാളെടുത്തപ്പോള് ചില സദാചാരവാദികള് അദ്ദേഹത്തെ പിന്തുണക്കാനും രംഗത്തെത്തി.