ഫസ്റ്റ് ബെൽ 2.0; സംസ്ഥാനത്ത് ഇന്ന് അധ്യായന വർഷത്തിന് തുടക്കമാകും, ട്രയൽ ക്ലാസുകളുടെ ടൈംടേബിൾ ഇങ്ങനെ...
ഫസ്റ്റ് ബെൽ 2.0; സംസ്ഥാനത്ത് ഇന്ന് അധ്യായന വർഷത്തിന് തുടക്കമാകും, ട്രയൽ ക്ലാസുകളുടെ ടൈംടേബിൾ ഇങ്ങനെ...
തിരുവനന്തപുരം: കേരളത്തിൽ ഇന്ന് അധ്യായന വർഷത്തിന് തുടക്കമാകും. കോവിഡ് വ്യാപനത്തിന്റെ പശ്ചാത്തലത്തിൽ ഇത്തവണയും ഓൺലൈനായാണ് ക്ലാസുകൾ സംഘടിപ്പിക്കുന്നത്. പ്രവേശനോത്സവവും വെർച്വലായി തന്നെ. പ്രവേശനം പൂർത്തിയായില്ലെങ്കിലും ഇപ്രാവശ്യവും മൂന്നരലക്ഷത്തോളം കുട്ടികൾ ഒന്നാം ക്ലാസിൽ ചേരുമെന്നാണ് കരുതുന്നത്.
രാവിലെ 9.30നാണ് വിക്ടേഴ്സ് ചാനൽ വഴി പ്രവേശനോത്സവം ആരംഭിക്കുന്നത്. 11 മണിക്കു സ്കൂൾതല പരിപാടി വെർച്വൽ ആയി നടത്തും. ജനപ്രതിനിധികളും സ്കൂൾ അധികാരികളും പങ്കെടുക്കും. സംസ്ഥാനതല ഉദ്ഘാടനം കോട്ടൺഹിൽ സ്കൂളിൽ മുഖ്യമന്ത്രി നിർവഹിക്കും. വെർച്വലായി സംഘടിപ്പിക്കുന്ന പ്രവേശനോത്സവത്തിൽ കുട്ടികളുടെ വിവിധ കലാപരിപാടികളും പഠനമികവുകളുടെ പ്രദർശനവും നടത്തും. കൂടുതൽ വിദ്യാർഥികൾ പഠിക്കുന്ന വിദ്യാലയങ്ങളിൽ ക്ലാസ് അടിസ്ഥാനത്തിലായിരിക്കും പ്രവേശനോത്സവം.
ആദ്യം ക്ലാസുകളുടെ ട്രയലായിരിക്കും നടക്കുക. രണ്ടാഴ്ചയ്ക്കുശേഷം റിവിഷനുണ്ടാകും. തുടർന്ന് യഥാർഥ ക്ലാസ് ആരംഭിക്കും. തുടക്കത്തിൽ കുട്ടികൾക്ക് ആത്മവിശ്വാസം വർധിപ്പിക്കുന്ന ക്ലാസുകളും മുൻ വർഷത്തെ പാഠങ്ങളുമായി ബന്ധപ്പെടുത്തി ബ്രിഡ്ജിങ് ക്ലാസുകളും നടത്തും.വിക്ടേഴ്സ് ചാനൽ വഴിയുള്ള ക്ലാസുകൾക്കുപുറമേ അതത് സ്കൂളുകളിൽനിന്നുകൂടി ക്ലാസ് എടുക്കണമെന്ന നിർദേശമാണ് സർക്കാർ നൽകിയിരിക്കുന്നത്.
അതേസമയം ട്രയൽ ക്ലാസുകളുടെ ടൈംടേബിളും പ്രസിദ്ധീകരിച്ചു. അംഗൻവാടി കുട്ടികള്ക്കുള്ള 'കിളിക്കൊഞ്ചല്' ജൂണ് ഒന്ന് മുതല് നാല് വരെ രാവിലെ 10.30 നായിരിക്കും. ഇതിെൻറ പുനഃസംപ്രേഷണം ജൂണ് ഏഴ് മുതല് 10 വരെ നടത്തും. പ്ലസ് ടു ക്ലാസുകള്ക്ക് ജൂണ് ഏഴ് മുതല് 11 വരെയാണ് ആദ്യ ട്രയല്. രാവിലെ 8.30 മുതല് 10 മണി വരെയും വൈകീട്ട് അഞ്ച് മുതൽ മുതല് ആറ് വരെയുമായി ദിവസവും അഞ്ച് ക്ലാസുകളാണ് പ്ലസ്ടുവിനുണ്ടാകുക. ജൂണ് 14 മുതല് 18 വരെ ഇതേ ക്രമത്തില് ക്ലാസുകള് പുനഃസംപ്രേഷണം ചെയ്യും.
ഒന്നു മുതല് പത്തു വരെ ക്ലാസുകളുടെ ആദ്യ ട്രയല് ജൂണ് രണ്ട് മുതല് നാല് വരെയായിരിക്കും. ഇതേ ക്ലാസുകള് ഇതേ ക്രമത്തില് ജൂണ് ഏഴ് മുതല് ഒമ്പത് വരെയും ജൂണ് 10 മുതല് 12വരെയും പുനഃസംപ്രേഷണം ചെയ്യും. പത്താം ക്ലാസിനുള്ള മൂന്ന് ക്ലാസുകള് ഉച്ചക്ക് 12.00 മുതല് ഒന്നര വരെയും നടക്കും.
Recommended Video