കൊവിഡിന്റെ പുതിയ വൈറസ് വകഭേദങ്ങള് കണ്ടെത്തി, 3 എണ്ണം കൂടുതലായി വ്യാപിച്ചെന്ന് മുഖ്യമന്ത്രി
തിരുവനന്തപുരം: സംസ്ഥാനത്ത് കൊവിഡിന്റെ പുതിയ വൈറസ് വകഭേദങ്ങള് കണ്ടെത്തിയിട്ടുണ്ടെന്ന് മുഖ്യമന്ത്രി പിണറായി വിജയൻ. അതില് 3 എണ്ണം വളരെ കൂടുതലായി വ്യാപിച്ചിട്ടുണ്ട്. അത് കരുതിയിരിക്കണം എന്ന് നിര്ദേശം നല്കിയിട്ടുണ്ടെന്ന് മുഖ്യമന്ത്രി പറഞ്ഞു.
തിരുവനന്തപുരം, എറണാകുളം, തൃശൂര്, മലപ്പുറം ജില്ലകളില് ഏര്പ്പെടുത്തിയ ട്രിപ്പിള് ലോക്ക്ഡൗണ് വളരെ വിജയകരമാണെന്നാണ് വിലയിരുത്തുന്നത്. ഈ ജില്ലകളില് വളരെ കുറച്ച് ജനങ്ങള് മാത്രമേ വീടിനു പുറത്തിറങ്ങുന്നുള്ളൂ. അവശ്യ സര്വീസുകള്ക്കു മാത്രമാണ് ഈ ജില്ലകളില് അനുമതി നല്കിയിരിക്കുന്നത്. പൊലീസ് ഏര്പ്പെടുത്തിയ നിയന്ത്രണങ്ങളോട് ജനങ്ങള് പൂര്ണ്ണമനസ്സോടെ സഹകരിക്കുന്നുണ്ട്. ലോക്ക്ഡൗണ് നിലവിലുള്ള മറ്റ് ജില്ലകളിലും ഇതുതന്നെയാണ് സ്ഥിതി.
തിരുവനന്തപുരത്ത് കഴിഞ്ഞ മൂന്നുദിവസമായി 26.03 ശതമാനമാണ് ടിപിആര് റേറ്റ്. എറണാകുളത്ത് 23.02ഉം തൃശൂരില് 26.04ഉം മലപ്പുറത്ത് 33.03 ശതമാനവുമാണ് മൂന്നുദിവസത്തെ ശരാശരി. സംസ്ഥാന ശരാശരി കഴിഞ്ഞ മൂന്നുദിവസമായി 24.5 ശതമാനമാണ്. ഇന്ന് സംസ്ഥാന ശരാശരി 23.29 ആയിട്ടുണ്ട്.
സ്ഥിരീകരിച്ച കേസുകളുടെയും ടെസ്റ്റ് പോസിറ്റിവിറ്റി നിരക്കിന്റെയും ആഴ്ചവെച്ചുള്ള കണക്കെടുത്താല് രോഗവ്യാപനം ഗണ്യമായി കുറഞ്ഞുവരികയാണ്. ഏപ്രില് 14 മുതല് 20 വരെയുള്ള ആഴ്ചയില് ആകെ റിപ്പോര്ട്ട് ചെയ്യപ്പെട്ടത് 92,248 കേസുകളായിരുന്നു. ആ ആഴ്ചയിലെ ടിപിആര് 15.5 ശതമാനം. ടിപിആറിലെ വളര്ച്ചാനിരക്ക് തൊട്ടുമുമ്പത്തെ ആഴ്ചയേക്കാള് 69.2 ശതമാനമായിരുന്നു. കേസുകളുടെ എണ്ണത്തില് 134.7 ശതമാനം വര്ധനയാണുണ്ടായത്. 28 മുതല് മെയ് നാലുവരെയുള്ള ആഴ്ചയിലെ കേസുകളുടെ എണ്ണം 2,41,615. ടിപിആര് 25.79. ടിപിആറിലെ വര്ധന 21.23 ശതമാനം. കേസുകളുടെ എണ്ണത്തിലെ വര്ധന 28.71 ശതമാനം.
ഇക്കഴിഞ്ഞ ആഴ്ച സ്ഥിരീകരിച്ച കേസുകള് 2,33,301. ആഴ്ചയിലെ ടിപിആര് 26.44 ശതമാനം. മുന് ആഴ്ചയില്നിന്ന് ടിപിആര് വര്ധനയില് -3.15 ശതമാനം കുറവാണ് രേഖപ്പെടുത്തിയത്. കേസുകളുടെ എണ്ണത്തില് 12.1 ശതമാനം കുറവും രേഖപ്പെടുത്തി. അതായത് കഴിഞ്ഞയാഴ്ചയുമായി താരതമ്യം ചെയ്യുമ്പോള് ആകെ റിപ്പോര്ട്ട് ചെയ്ത കേസുകളുടെ എണ്ണം 12.1 ശതമാനം കുറഞ്ഞു.
Recommended Video
ഇന്ന് തിരുവനന്തപുരം ജില്ലയില് ഇന്ന് 3600 കേസുകളാണ് സ്ഥിരീകരിച്ചത്. എറണാകളും ജില്ലയില് 4282ഉം തൃശൂര് ജില്ലയില് 2888ഉം മലപ്പുറം ജില്ലയില് 4212ഉം കേസുകളാണുള്ളത്. നിയന്ത്രണങ്ങള് ഫലം കണ്ടുതുടങ്ങിയെന്നു വേണം കേസുകളുടെ എണ്ണം കുറയുന്നതില്നിന്ന് അനുമാനിക്കാന്. എന്നാല്, നിലവിലുള്ള നിയന്ത്രണങ്ങള്ക്ക് അയവുവരുത്താന് സമയമായിട്ടില്ല. ഇപ്പോള് പുലര്ത്തിവരുന്ന ജാഗ്രത ഇതുപോലെ തുടരുക തന്നെ വേണമെന്നും മുഖ്യമന്ത്രി പറഞ്ഞു.
Click it and Unblock the Notifications
Sign in with Google