നിലന്പൂര്‍ കൊല: അന്വേഷണ ഉദ്യോഗസ്ഥനെ മാറ്റി

By Soorya Chandran

Published: Thursday, February 13, 2014, 8:59 [IST]

നിലന്പൂര്‍: നിലന്പൂര്‍ ബ്ലോക്ക് കോണ്‍ഗ്രസ് ഓഫീസിലെ ജീവനക്കാരി രാധയെ കൊലപ്പെടുത്തിയ കേസില്‍ ആരോപണ വിധേയനായ അന്വേഷണ ഉദ്യോഗസ്ഥനെ മാറ്റി. തെളിവെടുപ്പിന് കോണ്‍ഗ്രസ് പ്രാദേശി നേതാക്കളെ കൂടി കൂട്ടിയത് വിവാദമായ സാഹചര്യത്തിലാണ് നടപടി.

നിലന്പൂര്‍ സിഐ എപി ചന്ദ്രനെയാണ് അന്വേഷണ സംഘത്തില്‍ നിന്ന് നീക്കിയത്. മൃതദേഹം കണ്ടെത്തുന്നത് മുതല്‍ പ്രതികളെ അറസ്റ്റ് ചെയ്യുന്നതുവരെ ഇദ്ദേഹത്തിന്റെ നേതൃത്വത്തിലാണ് അന്വേഷണം നടന്നിരുന്നത്.

മന്ത്രിസഭയിലെ മുതിര്‍ന്ന അംഗമായ ആര്യാടന്‍ മുഹമ്മദിന്റെ പിഎ ആണ് കൊലക്കേസിലെ പ്രതി ബിജു നായര്‍. ബിജുനായരും സുഹൃത്ത് ഷംസുദ്ദീനും ആണ് പിടിയിലായിട്ടുള്ളത്. കോണ്‍ഗ്രസില്‍ കെ കരുണാകരന് ശേഷമുള്ള പ്രധാനപ്പെട്ട ആശ്രിതവത്സലന്‍ എന്നറിയപ്പെടുന്ന ആര്യാടന്‍ മുഹമ്മദ് ബിജുവിനെ രക്ഷിക്കാന്‍ ശ്രമിക്കുന്നതായി ആരോപണം ഉയരുന്നുണ്ട്.

അന്വേഷണത്തിന്റെ തുടക്കത്തില്‍ തന്നെ സിഐയുടെ ഭാഗത്ത് നിന്ന് പ്രതികള്‍ക്ക് അനുകൂലമായ നിലപാടുകളാണ് ഉണ്ടായത്. പ്രതികള്‍ കുറ്റസമ്മതം നടത്തിയതിന് ശേഷവും കുറ്റസമ്മത മൊഴി രേഖപ്പെടുത്താന്‍ സിഐ തയ്യാറായില്ലെന്ന് ആരോപണമുണ്ട്. രാധ കൊല്ലപ്പെടുന്നതിന് മുന്പ് ബലാത്സംഗത്തിന് ഇരയായിട്ടുണ്ടെന്ന പോസ്റ്റ് മോര്‍ട്ടം റിപ്പോര്‍ട്ടിലെ പരാമര്‍ശങ്ങളെ സിഐ തുടക്കത്തില്‍ നിഷേധിക്കുകയും ചെയ്തിരുന്നു.

കൊല്ലപ്പെട്ട രാധുടെ വീട്ടില്‍ തെളിവെടുപ്പിനായി ചെന്നപ്പോഴാണ് കോണ്‍ഗ്രസിന്റെ പ്രാദേശിക നേതാക്കള്‍ പോലീസിനെ അനുഗമിച്ചത്. വഴി അറിയാത്തതുകൊണ്ടാണ് കോണ്‍ഗ്രസ് നേതാക്കളെ കൂടെക്കൂട്ടിയത് എന്നാണ് പോലീസിന്റെ വിശദീകരണം. എന്നാല്‍ ഇതിനെതിര വാര്‍ഡ് മെന്പര്‍ രംഗത്തെത്തിയിരുന്നു. വിലാസം കണ്ടെത്താന്‍ പോലീസിന് ഔദ്യോഗികമായ വഴികള്‍ സ്വീകരിക്കാമായിരുന്നിട്ടും അത് ചെയ്യാതിരുന്നത് അന്വേഷണം അട്ടിമറിക്കാനാണെന്ന് വാര്‍ഡ് മെന്പര്‍ ആരോപിച്ചു.

Published On February 13, 2014