നിപ ഭീതി; കോഴിക്കോട് ശനിയാഴ്ചയും വിദ്യാഭ്യാസ സ്ഥാപനങ്ങൾക്ക് അവധി
കോഴിക്കോട്: നിപ ജാഗ്രത തുടരുന്നതിന്റെ ഭാഗമായി കോഴിക്കോട് ജില്ലയിലെ വിദ്യാഭ്യാസ സ്ഥാപനങ്ങൾക്ക് ശനിയാഴ്ചയും അവധി പ്രഖ്യാപിച്ചു.പ്രൊഫഷണൽ കോളജുകൾ ഉൾപ്പെടെയുള്ള എല്ലാ വിദ്യാഭ്യാസ സ്ഥാപനങ്ങൾക്കും (അങ്കണവാടി,മദ്രസകൾ ഉൾപ്പെടെ) അവധി ബാധകമായിരിക്കും.
അതേസമയം യൂണിവേഴ്സിറ്റി, പി എസ് സി പരീക്ഷകൾക്ക് മാറ്റമുണ്ടാകില്ല. ഈ ദിവസങ്ങളിൽ ട്യൂഷൻ സെന്ററുകളും, കോച്ചിങ്ങ് സെന്ററുകളും പ്രവർത്തിക്കുവാൻ പാടില്ലെന്നും കളക്ടർ അറിയിച്ചു. വിദ്യാഭ്യാസ സ്ഥാപനങ്ങൾക്ക് ഓൺലൈൻ ക്ലാസ്സുകൾ ഒരുക്കാം. ജില്ലയിൽ അടുത്ത പത്ത് ദിവസത്തേക്ക് നടത്താൻ നിശ്ചയിച്ചിരിക്കുന്ന എല്ലാ പൊതു പരിപാടികളും താത്ക്കാലികമായി നിർത്തിവെയ്ക്കണമെന്നും കളക്ടർ നിർദ്ദേശിച്ചു.
കേന്ദ്ര സംഘം കോഴിക്കോടെത്തി
ജില്ലയില് നിപ സ്ഥിരീകരിച്ച സാഹചര്യത്തില് സ്ഥിതിഗതികള് വിലയിരുത്തുന്നതിന് കേന്ദ്രസംഘം ജില്ലയില് എത്തി. വിവിധ മേഖലയിലെ വിദഗ്ധരാണ് സംഘത്തില് ഉള്ളത്.
മാല ചബ്ര (സീനിയര് കണ്സള്ട്ടന്റ് മൈക്രോബയോളജിസ്റ്റ് എ ബി വി ഐ എം , ഡോ.ഹിമാന്ഷു ചൗഹാന് (ജോയിന്റ് ഡയറക്ടര് ഐ ഡി എസ് പി, നാഷണല് സെന്റര് ഫോര് ഡിസീസ് കണ്ട്രോള്, ഡെല്ഹി), ഡോ.മീര ദൂരിയ (ജോയിന്റ് ഡയറക്ടര്, നാഷണല് സെന്റര് ഫോര് ഡിസീസ് കണ്ട്രോള്, ഡെല്ഹി), ഡോ.അജയ് അസ്രാന (പ്രൊഫ. ന്യൂറോളജി നാഷണല് ഇന്സ്റ്റിറ്റ്യൂട്ട് ഓഫ് മെന്റല് ഹെല്ത്ത് ആന്റ് ന്യൂറോ സയന്സസ്, ബാഗ്ലൂര്), ഡോ.ഹനുല് തുക്രല്- (എപിഡമോളജിസ്റ്റ്, സെന്റര് ഫോര് വണ് ഹെല്ത്ത്, നാഷണല് സെന്റര് ഫോര് ഡിസീസ് കണ്ട്രോള്, ഡെല്ഹി), ഡോ.ഗജേന്ദ്ര സിംഗ് (വൈല്ഡ്ലൈഫ് ഓഫീസര്- സെന്റര് ഫോര് വണ് ഹെല്ത്ത്, നാഷണല് സെന്റര് ഫോര് ഡിസീസ് കണ്ട്രോള്, ഡെല്ഹി) എന്നിവരാണ് സംഘത്തിലുള്ളത്.
സംഘം സ്ഥിതിഗതികള് വിലയിരുത്തും. എല്ലാ ദിവസവും വൈകുന്നേരം അഞ്ച് മണിക്ക് സംസ്ഥാന സര്ക്കാരിന് വിവരങ്ങള് കൈമാറും. ടീമിന്റെ പ്രവര്ത്തനങ്ങളെ തിരുവനന്തപുരത്തെ ആരോഗ്യ, കുടുംബക്ഷേമ വകുപ്പിന്റെ സീനിയര് റീജിയണല് ഡയറക്ടര് ഏകോപിപ്പിക്കും. എപ്പിഡമോളജിക്കല് വിലയിരുത്തലുകള്ക്കും നിയന്ത്രണ നടപടികളിലും മൃഗസംരക്ഷണ വകുപ്പിലെ ഉദ്യോഗസ്ഥരുമായി ചേര്ന്നാണ് കേന്ദ്ര സംഘം പ്രവര്ത്തിക്കുക.
കോഴിക്കോട് ഐ സി എം ആര് മൊബൈല് ടെസ്റ്റിംഗ് ലാബും സജ്ജീകരിച്ചിട്ടുണ്ട്. നിപ വൈറസ് ബാധ സംശയിക്കുന്നവരുടെ പ്രാഥമിക പരിശോധനയ്ക്കായാണ് ലാബ്. ഇതോടെ വേഗത്തിൽ പരിശോധന നടത്താൻ സാധിക്കും.
Click it and Unblock the Notifications
Sign in with Google