വിവാദ പ്രസംഗം: എംഎം മണിക്കെതിരെ തുടരന്വേഷണം വേണ്ടെന്ന് കോടതി

കൊച്ചി: വിവാദ പ്രസംഗത്തിന്റെ പേരില്‍ സിപിഎം ഇടുക്കി ജില്ലാ സെക്രട്ടറി എംഎം മണിക്കെതിരെ തുടരന്വേഷണം നടത്തണം എന്നാവശ്യപ്പെടുന്ന ഹര്‍ജി ഹൈക്കോടതി തള്ളി. സര്‍ക്കാരിന് വീണ്ടും ഹൈക്കോടതിയുടെ വിമര്‍ശനവും ഏല്‍ക്കേണ്ടി വന്നു.

വണ്ടിപ്പെരിയാറിലെ കോണ്‍ഗ്രസ് പ്രവര്‍ത്തകന്‍ ബാലുവിന്റെ കൊലപാതകത്തില്‍ തുടരന്വേഷണം വേണം എന്നാവശ്യപ്പെട്ടായിരുന്നു ഹര്‍ജി. രണ്ട് വര്‍ഷം മുമ്പ് എംഎം മണി നടത്തിയ പ്രസംഗത്തിന്റെ അടിസ്ഥാനത്തിലായിരുന്നു ഇത്.

കേസില്‍ തുടരന്വേഷണം നടത്താന്‍ ആവശ്യമായ തെളിവുകളൊന്നും ഇല്ലെന്ന് കോടതി നിരീക്ഷിച്ചു. പ്രസംഗത്തിന്റെ പേരില്‍ കേസെടുക്കാനാവില്ലെന്നും കോടതി വ്യക്തമാക്കി. താന്‍ ആരെയെങ്കിലും കൊന്നതായി മണി പറഞ്ഞിട്ടും ഇല്ല.

ഇതിന് ശേഷമാണ് കോടതി സര്‍ക്കാരിനെ പ്രതിസന്ധിയിലാക്കുന്ന ചോദ്യം ചോദിച്ചത്. ബാലുവിനെ കൊന്നത് അയ്യപ്പദാസ് എന്നയാളെ കൊന്നതിന് പ്രതികാരമായിട്ടാണെന്നാണ് മണി പ്രസംഗത്തില്‍ പറഞ്ഞത്. അയ്യപ്പദാസിനെ കൊന്നത് ഉമ്മന്‍ ചാണ്ടിയുടെ ആളുകളാണെന്നും പറഞ്ഞിരുന്നു. ഇതേ കുറിച്ച് എന്തുകൊണ്ട് അന്വേഷിച്ചില്ലെന്നാണ് കോടതി ചോദിച്ചത്.

ജസ്റ്റിസുമാരായ തോട്ടത്തില്‍ ബി രാധാകൃഷ്ണന്‍, ബാബു മാത്യു, പി ജോസഫ് എന്നിവരടങ്ങിയ ഡിവിഷന്‍ ബഞ്ചാണ് സര്‍ക്കാരിന്റെ ഹര്‍ജി തള്ളിയത്. വാദം കേള്‍ക്കുന്നത് നീട്ടണം എന്ന ഹര്‍ജിയും കോടതി തള്ളി.

ഇടുക്കിയിലെ മണക്കാട് വച്ച് എംഎം മണി നടത്തിയ പ്രസംഗമാണ് വിവാദമായത്. ടിപി ചന്ദ്രശേഖരന്‍ വധക്കേസില്‍ സിപിഎം പ്രതിസന്ധിയിലായ കാലത്തായിരുന്നു ഇത്. ഈ പ്രസംഗത്തിന്റെ പേരില്‍ എംഎം മണിയെ ജയിലില്‍ അടക്കുകയും ചെയ്തിരുന്നു.

English summary

No need of further investigation in MM Mani's speech related case: High Court