റിമ പറഞ്ഞത് കളവ്? അവസരം നൽകിയിട്ടും ആരും നടിയുടെ കാര്യം ഉന്നയിച്ചില്ലെന്ന് ഇന്നസെന്റ്!!

നടിക്കെതിരായ ആക്രമണവും പുതിയ വെളിപ്പെടുത്തലും ഉൾപ്പെടെയുള്ള കാര്യങ്ങൾ ജനറൽ ബോഡിയിൽ ഉന്നയിച്ചെന്നു എന്നാൽ ഇക്കാര്യം ചർച്ചയായില്ലെന്നും വനിത സംഘടന അംഗം കൂടിയായ റിമ കല്ലിങ്കൾ നേരത്തെ പറഞ്ഞിരുന്നു.

കൊച്ചി: താര സംഘടനയായ അമ്മയുടെ ജനറൽ ബോഡി യോഗത്തിൽ നടിയുടെ വിഷയം ചർച്ച ചെയ്തില്ലെന്ന് വ്യക്തമാക്കി പ്രസിഡൻറ് ഇന്നസെന്റ്. സമയം നൽകിയിട്ടും ആരും വിഷയം ഉന്നയിച്ചില്ലെന്നാണ് ഇന്നസെന്റ് പറഞ്ഞത്. ആർക്കും എന്തും ചോദിക്കാമെന്ന് താൻ പറഞ്ഞിട്ടും ഈ വിഷയത്തിൽ ആരും ഒന്നും ചോദിച്ചില്ലെന്ന് ഗണേഷ് കുമാറും പറഞ്ഞു. ജനറൽ ബോഡി യോഗത്തിനു ശേഷം നടന്ന വാർത്ത സമ്മേളനത്തിലാണ് ഇന്നസെന്റ് ഇക്കാര്യം വ്യക്തമാക്കിയത്.

നടിക്കെതിരായ ആക്രമണവും പുതിയ വെളിപ്പെടുത്തലും ഉൾപ്പെടെയുള്ള കാര്യങ്ങൾ ജനറൽ ബോഡിയിൽ ഉന്നയിച്ചെന്നു എന്നാൽ ഇക്കാര്യം ചർച്ചയായില്ലെന്നും വനിത സംഘടന അംഗം കൂടിയായ റിമ കല്ലിങ്കൾ നേരത്തെ പറഞ്ഞിരുന്നു. ഇത് തള്ളിയാണ് ഇന്നസെന്റ് ഇക്കാര്യം പറഞ്ഞിരിക്കുന്നത്.

ജനറൽ ബോഡി യോഗത്തിനു ശേഷം പുറത്തേക്ക് വന്ന റിമയും രമ്യയും ഉടൻ തന്നെ പോവുകയായിരുന്നു. യോഗത്തിലെ ചർച്ചയെ കുറിച്ച് ഇവർ കൂടുതലൊന്നും പ്രതികരിച്ചില്ല. സംഘടനയിലെ പ്രമുഖയായ മഞ്ജു വാര്യരും ആക്രമിക്കപ്പെട്ട നടിയും യോഗത്തിൽ പങ്കെടുത്തിരുന്നില്ല.

നടി ആക്രമിക്കപ്പെട്ട സംഭവത്തിലെ വെളിപ്പെടുത്തലുകളെക്കുറിച്ചുള്ള ചോദ്യങ്ങളില്‍ നിന്ന് ഇന്നസെന്റ് ഉൾപ്പെടെ പലരും ഒഴിഞ്ഞുമാറുകയായിരുന്നു. വാർത്ത സമ്മേളനത്തിൽ പ്രമുഖ താരങ്ങളായ മമ്മൂട്ടിയും മോഹൻലാലും നിശബ്ദരായിരുന്നത് ശ്രദ്ധേയമായി. മാധ്യമ പ്രവർത്തകരുടെ ചോദ്യം നേരിട്ട ഗണേഷ് , മുകേഷ് എന്നിവർ മാധ്യമ പ്രവർത്തകരോട് കയർത്തു സംസാരിച്ചു.

English summary

no one asked to discuss actress issue says innocent