കേരളത്തിൽ നോറോ വൈറസും, വയനാട്ടിൽ വെറ്ററിനറി കോളേജിലെ വിദ്യാര്ത്ഥിനികള്ക്ക് രോഗബാധ
വയനാട്: സംസ്ഥാനത്ത് ആദ്യമായി നോറോ വൈറസിന്റെ സാന്നിധ്യം സ്ഥിരീകരിച്ചു. വയനാട് ജില്ലയിലാണ് രോഗബാധ കണ്ടെത്തിയിരിക്കുന്നത്. പൂക്കോട് വെറ്ററിനറി കോളേജിലെ വിദ്യാര്ത്ഥിനികള്ക്കാണ് രോഗം. വനിതാ ഹോസ്റ്റലില് താമസിക്കുന്ന വിദ്യാര്ത്ഥിനികളില് വയറിളക്കവും ഛര്ദ്ദിയും ഉണ്ടായതിനെ തുടര്ന്ന് നടത്തിയ പരിശോധനയിലാണ് നോറോ വൈറസ് ബാധ കണ്ടെത്തിയിരിക്കുന്നത്. ആലപ്പുഴ നാഷണല് വൈറോളജി ഇന്സ്റ്റിറ്റ്യൂട്ടില് ആണ് സാംപിളുകൾ പരിശോധിച്ചത്.
വയറിളക്കം, വയറുവേദന, ഛര്ദ്ദി, മനംമറിച്ചില്, പനി, തലവേദന, ശരീരവേദന തുടങ്ങിയവയാണ് നോറോ വൈറസ് രോഗ ലക്ഷണങ്ങള്. ഛര്ദ്ദി, വയറിളക്കം എന്നിവ മൂര്ച്ഛിച്ചാല് നിര്ജലീകരണം സംഭവിക്കുകയും രോഗം ഗുരുതരാവസ്ഥയിലേക്ക് മാറുകയും ചെയ്യും. മലിനമായ ജലത്തിലൂടെയും, ഭക്ഷണത്തിലൂടെയുമാണ് രോഗം പകരുന്നത്.
രോഗ ബാധയേറ്റ വ്യക്തികളുമായി നേരിട്ടുള്ള സമ്പര്ക്കത്തിലൂടെയും രോഗം പടരും. രോഗബാധിതനായ വ്യക്തിയില് നിന്ന് പുറത്തെത്തുന്ന ശ്രവങ്ങളിലൂടെ വൈറസ് പ്രതലങ്ങളില് തങ്ങി നില്ക്കുകയും അവയില് സ്പര്ശിക്കുന്നവരുടെ കൈകളിലേക്ക് പടരുകയും ചെയ്യും. കൈകള് കഴുകാതെ മൂക്കിലും വായിലും തൊടുന്നതോടെ വൈറസ് ശരീരത്തില് വ്യാപിക്കും. നവംബര് മുതല് ഏപ്രില് വരെയുള്ള മാസങ്ങളിലാണ് നോറോ വൈറസ് കൂടുതലായും പടരുന്നത്. പ്രായഭേദമന്യോ എല്ലാവരിലും വൈറസ് ബാധിക്കാം.
ശാലിനിയെ ചേർത്ത് പിടിച്ച് അജിത്ത്, വൈറലായി താരദമ്പതികളുടെ ദീപാവലി ചിത്രങ്ങൾ
വയനാട് ജില്ലയുടെ വിവിധ ഭാഗങ്ങളില് സമാനമായ രോഗ ലക്ഷണങ്ങള് റിപ്പോര്ട്ട് ചെയ്യപ്പെടുന്നതിനാല് പ്രതിരോധ പ്രവര്ത്തനങ്ങള് ഊര്ജിതപ്പെടുത്തിയിട്ടുണ്ടെന്നും പൊതുജനങ്ങള് ജാഗ്രത പാലിക്കണമെന്നും ജില്ലാ മെഡിക്കല് ഓഫീസര് ഡോ. ആര്. രേണുക അറിയിച്ചു. ആരോഗ്യ വകുപ്പിന്റെ നേതൃത്വത്തില് വിവിധ പ്രദേശങ്ങളിലായി ബോധവത്കരണ പരിപാടികളും ആസൂത്രണം ചെയ്യുന്നുണ്ട്.
നോറോ വൈറസ് ബാധിച്ച് രണ്ട് ദിവസങ്ങള്ക്കുള്ളില് ലക്ഷണങ്ങള് പ്രകടമാകും. വൈറസ് ബാധിതര് വീട്ടിലിരിക്കേണ്ടതും, ഒ.ആര്.എസ് ലായനി, തിളപ്പിച്ചാറിയ വെള്ളം എന്നിവ നന്നായി കുടിക്കേണ്ടതുമാണ്. ലക്ഷണങ്ങള്ക്ക് അനുസരിച്ച് ചികിത്സ ലഭ്യമാണ്. രോഗികള് മറ്റുള്ളവര്ക്ക് ഭക്ഷണം പാകം ചെയ്യാതിരിക്കാനും പ്രത്യേകം ശ്രദ്ധിക്കണം. ഒന്ന് മുതല് മൂന്ന് ദിവസങ്ങള്ക്കുള്ളില് തന്നെ രോഗലക്ഷണങ്ങള് മാറാം. എന്നാല് അത് കഴിഞ്ഞുള്ള രണ്ട് ദിവസങ്ങള് വരെ രോഗിയില് നിന്ന് വൈറസ് പടരാന് സാധ്യതയുണ്ട്. അതിനാല് രോഗം മാറി കുറഞ്ഞത് രണ്ടു ദിവസത്തേക്കെങ്കിലും പുറത്തു പോകാതിരിക്കാന് ശ്രദ്ധിക്കേണ്ടതാണ്.
*പ്രതിരോധ മാര്ഗങ്ങള്
. ആഹാരത്തിനു മുമ്പും, ടോയ്ലെറ്റില് പോയതിന് ശേഷവും കൈകള് സോപ്പുപയോഗിച്ച് 20 സെക്കന്റ് നേരമെങ്കിലും നന്നായി കഴുകുക.
. കുടിവെള്ള സ്രോതസുകള്, കിണര്, വെള്ളം ശേഖരിച്ചു വച്ചിരിക്കുന്ന ടാങ്കുകള് തുടങ്ങിയവ ബ്ലീച്ചിങ് പൗഡര് ഉപയോഗിച്ച് ക്ലോറിനേറ്റ് ചെയ്യുക.
. വൃക്തി ശുചിത്വത്തിനും ഗാര്ഹിക ആവശ്യങ്ങള്ക്കും ക്ലോറിനേറ്റ് ചെയ്ത വെള്ളം ഉപയോഗിക്കുക.
. തിളപ്പിച്ചാറ്റിയ വെള്ളം മാത്രം കുടിക്കാന് ഉപയോഗിക്കുക.
. പഴങ്ങളും പച്ചക്കറികളും പലപ്രാവശ്യം കഴുകിയതിന് ശേഷം മാത്രം ഉപയോഗിക്കുക.
. തണുത്തതും പഴകിയതും, തുറന്നു വെച്ചതുമായ ഭക്ഷണ പദാര്ത്ഥങ്ങള്, കേടുവന്ന പഴങ്ങള്, പച്ചക്കറികള് തുടങ്ങിയവ ഉപയോഗിക്കാതിരിക്കുക.
. കടല് മത്സ്യങ്ങളും, ഞണ്ട്, കക്ക തുടങ്ങിയ ഷെല്ഫിഷുകളും നന്നായി പാകം ചെയ്തതിന് ശേഷം മാത്രം കഴിക്കുക.
Click it and Unblock the Notifications
Sign in with Google