മുസ്ലീംലീഗുമായും കൂടിക്കാഴ്ച്ചയില്ല; രാഷ്ട്രീയ പാര്ട്ടികളുമായി കൂടിക്കാഴ്ച്ചക്ക് തയാറാവതെ എന്എസ്എസ്
തിരുവനന്തപുരം: നിയമസഭ തിരഞ്ഞെടുപ്പുമായി ബന്ധപ്പെട്ട് കൂടിക്കാഴ്ച്ചക്ക് വിളിച്ച രാഷ്ട്രീയ നേതാക്കളുമായി ചര്ച്ചയ്ക്ക് തയാറാവാതെ എന്എസ്എസ് ജനറല് സെക്രട്ടറി ജി സുകുമാരന് നായര്. കൂടിക്കഴ്ച്ചക്കായി എന്എസ്എസ് ആസ്ഥാനവുമായി ബന്ധപ്പെട്ട മുസ്ലിം ലീഗ് നോതാക്കള്ക്കും കൂടിക്കാഴ്ച്ചക്കില്ലെന്ന മറുപടിയാണ് ലഭിച്ചത്. മുസ്ലിം ലീഗ് നേതാവ് പികെ കുഞ്ഞാലിക്കുട്ടി തിങ്കളാഴ്ച്ച സുകുമാരന് നായരുമായി കൂടിക്കാഴ്ച്ചക്ക് നീക്കം നടത്തിയിരുന്നു. എന്നാല് ഇതിന് എന്എസ്എസ് ആസ്ഥാനത്ത് നിന്നും അനുമതി ലഭിച്ചില്ല. കോണ്ഗ്രസ് നേതാക്കള്ക്കും ഇതേ പ്രതികരണമാണ് ലഭിച്ചത്. തല്ക്കാലത്തേക്ക് രാഷ്ട്രീയ ചര്ച്ചകളൊന്നും വേണ്ടെന്നാണ് എന്എസ്എസ് നയമെന്നാണ് സൂചന.
നിയമസഭാ തിരഞ്ഞെടുപ്പുമായി ബന്ധപ്പെട്ട് വിവധ സാമുദായിക നേതാക്കളുമായി മുസ്ലിം ലീഗ് നേതാക്കള് നിരന്തര കൂടിക്കാഴ്ച്ച നടത്തി വരുന്നതിനിടെയാണ് സുകുമാരന് നായരുടെ മുഖം തിരിക്കല്. തദ്ദേശ തിരഞ്ഞെടുപ്പില് നേരിടേണ്ടിവന്ന തിരിച്ചടിക്ക് പിന്നാലെ ക്രൈസ്തവ സഭാ നേതൃത്വവുമായി ചര്ച്ച നടത്താന് നേരത്തെ മുസ്ലിം ലീഗ് നേതൃത്വം തീരുമാനിച്ചിരുന്നു. ക്രിസ്മസ് ദിനത്തില് താമരശ്ശേരി ബിഷപ്പിനെ മുസ്ലിം ലീഗ് നേതാക്കള് സന്ദര്ശിച്ചിരുന്നു. പികെ കുഞ്ഞാലിക്കുട്ടി സാദിഖലി തങ്ങള് എന്നിവരാണ് മാര് റെമജിയോസ് ഇഞ്ചനാനിയലുമായി കൂടിക്കാഴ്ച്ച നടത്തിയത്. ഇതിന് ശേഷം മലങ്കര കത്തോലിക്ക സഭാ അധ്യക്ഷന് കര്ദിനാള് മാര് ബസേലിയോസ് ക്ലിമസ് കാതോലിക്ക ബാവയുമായി മുസ്ലിം ലീഗ് നേതാവ് പികെ കുഞ്ഞാലിക്കുട്ടി എംപി ചര്ച്ച നടത്തിയിരുന്നു.