കന്യാസ്ത്രീയെ സ്വഭാവ ദൂഷ്യക്കാരിയാക്കി രൂപത... കന്യാസ്ത്രീയ്ക്ക് അധികാര മോഹം; ബിഷപ്പിനൊപ്പം തന്നെ

By Desk

Published: Monday, July 16, 2018, 17:28 [IST]

ജലന്ധര്‍: ബിഷപ്പ് ലൈംഗികമായി പീഡിപ്പിച്ചു എന്ന പരാതിയില്‍ ജലന്ധര്‍ രൂപതയുടെ പ്രമേയം പുറത്ത്. കന്യാസ്ത്രീയെ പൂര്‍ണമായും തള്ളിക്കളഞ്ഞ്, ബിഷപ്പ് ഫ്രാങ്കോ മുളയ്ക്കലിനെ പിന്തുണച്ചകൊണ്ടാണ് രൂപത പ്രമേയം പാസാക്കിയിട്ടുള്ളത്.

നേരത്തെ തന്നെ കന്യാസ്ത്രീയ്‌ക്കെതിരെ സ്വഭാവ ദൂഷ്യ ആരോപണം ഉന്നയിക്കപ്പെട്ടിരുന്നു. മദര്‍ ജറനാള്‍ ആയിരുന്നു ഇത്തരം ഒരു ആരോപണം ഉന്നയിച്ചത്. എന്നാല്‍ മദറിന്റെ ആരോപണം തെറ്റാണെന്നതിനുള്ള തെളിവുകള്‍ പുറത്ത് വന്നിരുന്നു.

കന്യാസ്ത്രീയ്‌ക്കെതിരെ ജലന്ധര്‍ രൂപതയും ഇപ്പോള്‍ സ്വഭാവ ദൂഷ്യ ആരോപണം തന്നെ ആണ് ഉയര്‍ത്തിയിരിക്കുന്നത്. സ്വാര്‍ത്ഥ താത്പര്യത്തിനും അധികാരത്തിനും വേണ്ടിയാണ് കന്യാസ്ത്രീ പരാതി നല്‍കിയിരിക്കുന്നത് എന്നാണ് പ്രമേയം ആരോപിക്കുന്നത്.

തള്ളിക്കളയുന്നു എന്ന്

വസ്തുതാ വിരുദ്ധമായ ആരോപണങ്ങളെ അര്‍ഹിക്കുന്ന അവഗണനയോടെ തള്ളിക്കളയുന്നു എന്നാണ് പ്രമേയത്തില്‍ ആദ്യമേ പറയുന്നത്. രൂപത കള്‍സള്‍ട്ടേഴ്‌സ് സമിതിയാണ് ഇത്തരത്തില്‍ ഒരു പ്രമേയം പാസാക്കിയിട്ടുള്ളത്. ഗൂഢലക്ഷ്യത്തോടെയാണ് പരാതി ഉന്നയിച്ചിട്ടുള്ളത് എന്നും ആക്ഷേപം ഉണ്ട്.

സ്വഭാവ ദൂഷ്യം

കന്യാസ്ത്രീയ്‌ക്കെതിരെ ഗുരുതരമായ സ്വഭാവ ദൂഷ്യവുമായി ബന്ധപ്പെട്ട് പരാതി ലഭിച്ചിരുന്നു എന്നാണ് പ്രമേയത്തില്‍ പറയുന്ന മറ്റൊരു കാര്യം. ആ പരാതിയില്‍ ഉള്ള അന്വേഷണം തടയുന്നതിന് വേണ്ടിയാണ് ബിഷപ്പിനെതിരെ കന്യാസ്ത്രീയ ലൈംഗിക പീഡന ആരോപണം ഉന്നയിച്ചിട്ടുള്ളത് എന്നും പറയുന്നുണ്ട്.

അധികാരത്തിന് വേണ്ടി

കന്യാസ്ത്രീ അംഗമായ എംജെ കോണ്‍ഗ്രിഗേഷന് കുറവിലങ്ങാട് അസ്ഥാനമാക്കി ബിഹാര്‍ റീജിയണ്‍ ഉണ്ടാക്കി, അതിന്റെ അധികാരത്തില്‍ എത്താനാണ് ശ്രമം എന്നതാണ് മറ്റൊരു ആരോപണം. ബിഷപ്പിനെതിരെ നടത്തുന്നത് ബ്ലാക്ക് മെയില്‍ തന്ത്രമാണെന്നും പ്രമേയം ആരോപിക്കുന്നുണ്ട്.

കുശാഗ്ര ബുദ്ധിയെന്ന്

ബിഷപ്പിനെതിരെയുള്ള വധഭീഷണിയെക്കുറിച്ച് അന്വേഷണത്തിനിടയില്‍ ആണ് കന്യാസ്ത്രീ പരാതി നല്‍കിയത് എന്നാണ് മറ്റൊരു ആരോപണം. കുറവിലങ്ങാട്ടെ ഗസ്റ്റ് ഹൗസില്‍ ബിഷപ്പ് താമസിച്ച ദിവസങ്ങള്‍ കണ്ടെത്തി, ആ ദിവസങ്ങളില്‍ എല്ലാം തന്നെ പീഡിപ്പിച്ചു എന്ന് പറയുന്നത് കന്യാസ്ത്രീയുടെ കുശാഗ്ര ബുദ്ധിയാണെന്നും പ്രമേയം ആരോപിക്കുന്നുണ്ട്.

Published On July 16, 2018