മദ്യവിൽപനയിൽ 14 കോടി രൂപയുടെ കുറവ്, ഇത്തവണ ലഭിച്ചത് 701 കോടി രൂപ; മിൽമ കലക്കി

തിരുവനന്തപുരം: ഓണക്കാലത്തെ മദ്യ വിൽപനയിൽ കഴിഞ്ഞ വർഷത്തെക്കാൾ 14 കോടി രൂപയുടെ കുറവ്. ഇത്തവണ 701 കോടി രൂപയുടെ വിൽപനയാണ് നടന്നത്. കഴിഞ്ഞ വർഷം 715 കോടി രൂപയുടെ വിൽപനയാണ് നടന്നത്. ഇത്തവണ ബാറുകളുടെ എണ്ണം വർദ്ധിച്ചിട്ടുണ്ട്. സംസ്ഥാനത്ത് 850 ലധികം ബാറുകളാണ് പ്രവർത്തിക്കുന്നത്.

മദ്യ വിൽപനയിൽ കുറവ് ഉണ്ടായതുമായി ബന്ധപ്പെട്ട് ബെവ്കോ പരിശോധന നടത്തുന്നുണ്ട്. അതേ സമയം ഉത്രാട ദിനത്തിൽ മദ്യ വിൽപന കൂടിയുണ്ട്. നാല് കോടിയുടെ വർധനവാണ് ഉണ്ടായത്. ഇത്തവണ ഉത്രാട ദിനത്തിൽ 124 കോടിയുടെ മദ്യമാണ് വിറ്റത്.

അതേ സമയം ഈ ഓണക്കാലത്ത് റെക്കോർഡ് വിൽപനയാണ് മിൽമ നടത്തിയത്. പാൽ‌, തൈര്, മറ്റ് പാലുൽപ്പന്നങ്ങൾ എന്നിവയുടെ വിൽപനയാണ് ഓണക്കാലത്ത് ഉയർന്നത്. തിരുവോണത്തിന് മുന്നോടിയായുള്ള ഉത്രാട ദിനത്തിൽ മാത്രം 37,00,365 പാലും 3,91,576 കിലോ തൈരുമാണ് മിൽമ ഔട്ട്ലെറ്റുകളിൽ നിന്ന് വിറ്റത്. തിരുവോണത്തിന് മുമ്പുള്ള ആറ് ദിവസങ്ങളിലായി സർക്കാർ ഉടമസ്ഥതയിലുള്ള സഹകരണ സംഘം വഴി. 1,33,47,013 ലിറ്റർ പാലും 14,95,332 കിലോ തൈരുമാണ് വിറ്റത്.

ഓ​ഗസ്റ്റ് 15 മുതൽ നെയ്യിന്റെ വിൽപന 814 മെട്രിക് ടൺ രേഖപ്പെടുത്തിയ സെപ്റ്റംബർ 12 ലെ കണക്ക് പ്രകാരമാണിത്. കഴിഞ്ഞ വർഷം പാലിന്റെ മൊത്തം വിൽപന 1,00,56,889 ലിറ്ററായിരുന്നു. അതിന് മുൻപുള്ള വർഷം ഓണത്തിന്റെ തിരക്കേറിയ നാല് ദിവസങ്ങളിൽ‌ 94,56,621 ലിറ്റർ പാലാണ് വിറ്റത്. കഴിഞ്ഞ ഓണസമയത്ത് നാല് ദിവസം കൊണ്ട് 12,99,215 കിലോ തൈരാണ് വിറ്റതെങ്കിൽ അതിന് മുൻവർഷം 11,25,437 തൈരാണ് വിറ്റത്.

ഓണ വിപണി മുന്നിൽ കണ്ട് പാലും തൈരും മറ്റ് പാൽ ഉൽപന്നങ്ങളും സു​ഗമമായി വിതരണം ചെയ്യുന്നതിനായി മിൽമ കൃത്യമായ പദ്ധതികൾ ആസൂത്രണം ചെയ്ത് നടപ്പാതക്കിയിരുന്നതായി കേരള കോ ഓപ്പറേറ്റീവ് മിൽക്ക് മാർക്കറ്റിം​ഗ് ഫെഡറേഷൻ ( കെ സി എം എം എഫ് ) ചെയർമാൻ കെ സി മണി പറഞ്ഞു. തങ്ങളുടെ ഉൽപന്നങ്ങളിലുള്ള ഉപഭോക്താക്കളുടെ അടിയുറച്ച വിശ്വാസവും ​ഗുണമേന്മയും വിതരണത്തിലെ കാര്യക്ഷമതയും കൊണ്ടാണ് ഇത്തരത്തിൽ തുടർച്ചയായി റെക്കോർഡ് പ്രകടനം നടത്താൻ കഴിയുന്നതെന്നും അദ്ദേഹം പറഞ്ഞു.