സംഘര്‍ഷങ്ങള്‍ അയഞ്ഞു.. പിന്നാലെ ശബരിമല കയറാനൊരുങ്ങി മറ്റൊരു യുവതി

ശബരിമല സംഘര്‍ഷം അല്‍പം അയവ് വന്ന പിന്നാലെ ദര്‍ശനത്തിനായി 48കാരിയായ സ്ത്രീ. ആന്ധ്രാപ്രദേശ് സ്വദേശിയായ ഉഷയാണ് സന്നിധാനത്തേക്ക് പോകാന്‍ താത്പര്യം പ്രകടിപ്പിച്ച് എത്തിയത്. എന്നാല്‍ ഇപ്പോഴും സംഘര്‍ഷ സാധ്യത നിലനില്‍ക്കുന്നുണ്ടെന്ന് പോലീസ് ഇവരെ അറിയിച്ചതായാണ് വിവരം.പോലീസുമായുള്ള ചര്‍ച്ചയെ തുടര്‍ന്ന് ഇവര്‍ ശബരമലയിലേക്ക് ഇല്ലെന്ന് അറിയിച്ചിട്ടുണ്ട്. ഇതോടെ ഇവര്‍ക്കൊപ്പം വന്നവര്‍ മാത്രം മലകയറാന്‍ തിരുമാനിച്ചതായാണ് വിവരം.

കഴിഞ്ഞ ദിവസം വിജയവാഡാ സ്വദേശിയായ ഒരു സ്ത്രീയും തെലുങ്കാന സ്വദേശിയായ മറ്റൊരു യുവതിയും ശബരിമലയിലേക്ക് വന്നിരുന്നു. എന്നാല്‍ ബിജെപി പ്രവര്‍ത്തകര്‍ പ്രതിഷേധിച്ചതോടെ മറ്റ് ക്ഷേത്രങ്ങള്‍ സന്ദര്‍ശിക്കാനാണ് എത്തിയത് എന്ന് വ്യക്തമാക്കി ഇവര്‍ മടങ്ങുകയായിരുന്നു.

ഇത്തവണ ശബരിമല പ്രവേശനത്തിനായി 800 ല്‍ അധികം സ്ത്രീകള്‍ ഓണ്‍ലൈന്‍ ആയി ബുക്ക് ചെയ്തിരുന്നതായി റിപ്പോര്‍ട്ടുകള്‍ ഉണ്ടായിരുന്നു. അതില്‌ കൂടുതലും ആന്ധ്രയില്‍ നിന്നുള്ള യുവതികളാണെന്നായിരുന്നു റിപ്പോര്‍ട്ട്. സുപ്രീം കോടതിയുടെ ഉത്തരവിന്‍റെ പശ്ചാത്തലത്തില്‍ ആദ്യം ശബരിമലയിലേക്ക് എത്തിയതും ആന്ധ്രാ സ്വദേശിയായിരുന്നു. മാധവി എന്ന 42 വയസുകാരിയായിരുന്നു ദര്‍ശനത്തിനായി എത്തിയത്. പിന്നീട് ആന്ധ്രാ സ്വദേശിയായ കവിതയെന്ന മാധ്യമപ്രവര്‍ത്തകയും ശബരിമലയിലേക്ക് എത്തിയെങ്കിലും പ്രതിഷേധത്തെ തുടര്‍ന്ന് ഇവര്‍ക്കെല്ലാം മടങ്ങേണ്ടി വന്നു.

English summary

one more telugu lady in sabarimala