എല്ലാം മായമോ? ഏഴ് ജില്ലകളില്‍ മിന്നല്‍ പരിശോധന: 4513 ലിറ്റർ വെളിച്ചെണ്ണ പിടികൂടി; മായമെന്ന് സംശയം

സംസ്ഥാനത്ത് ഓപ്പറേഷൻ ലൈഫിന്റെ ഭാഗമായി ഭക്ഷ്യസുരക്ഷാ വകുപ്പ് സംസ്ഥാന വ്യാപകമായി വെളിച്ചെണ്ണ ഉൽപ്പാദന-വിപണന കേന്ദ്രങ്ങളിൽ മിന്നൽ പരിശോധനകൾ നടത്തി. വെളിച്ചെണ്ണയുടെ ഗുണനിലവാരം സംബന്ധിച്ച് ലഭിച്ച പരാതികളെ തുടർന്നാണ് ഓണക്കാല പരിശോധനകൾക്ക് പുറമേ ഈ പ്രത്യേക പരിശോധനകൾ ആരോഗ്യമന്ത്രി വീണാ ജോർജിന്റെ നിർദേശപ്രകാരം നടത്തിയത്. പരിശോധനയുടെ ഭാഗമായി ഏഴ് ജില്ലകളിൽ നിന്നായി 4513 ലിറ്റർ സംശയാസ്പദ വെളിച്ചെണ്ണ പിടിച്ചെടുത്തു.

വിവിധ ജില്ലകളിലെ അസിസ്റ്റന്റ് ഭക്ഷ്യസുരക്ഷാ കമ്മീഷണർമാരുടെ നേതൃത്വത്തിൽ പ്രത്യേക സ്ക്വാഡുകൾ രൂപീകരിച്ചാണ് പരിശോധന നടത്തിയത്. പത്തനംതിട്ടയിൽ നിന്നും 300 ലിറ്റർ, ഇടുക്കിയിൽ നിന്നും 107 ലിറ്റർ, തൃശൂരിൽ നിന്നും 630 ലിറ്റർ, പാലക്കാട്ട് നിന്നും 988 ലിറ്റർ, മലപ്പുറത്ത് നിന്നും 1943 ലിറ്റർ, കാസർഗോഡിൽ നിന്നും 545 ലിറ്റർ എന്നിങ്ങനെ അളവിലുള്ള വെളിച്ചെണ്ണയാണ് പിടിച്ചെടുത്തത്. മലപ്പുറം ജില്ലയിലെ ചെറുമുക്കിലെ റൈസ് & ഓയിൽ മില്ലിൽ നിന്നും സമീപത്തെ ഗോഡൗണിൽ നിന്നും 735 ലിറ്റർ വെളിച്ചെണ്ണ കണ്ടെടുത്തു. വയനാട്ടിൽ നിന്നും സംശയാസ്പദ നിലയിലുള്ള വെളിച്ചെണ്ണ കണ്ടെത്തിയില്ല, എങ്കിലും 2 സ്റ്റാറ്റിയൂട്ടറി സാമ്പിളുകൾ ശേഖരിച്ചു.

പരിശോധനയിൽ 20 സ്റ്റാറ്റിയൂട്ടറി സാമ്പിളുകളും 3 സർവൈലൻസ് സാമ്പിളുകളും ശേഖരിച്ചിട്ടുണ്ട്. ഈ സാമ്പിളുകൾ ലാബ് പരിശോധനയ്ക്ക് അയച്ച് ഗുണനിലവാരം ഉറപ്പാക്കും. ഒന്നര ആഴ്ച മുമ്പ് നടത്തിയ പരിശോധനകളിൽ 16,565 ലിറ്റർ സംശയാസ്പദ വെളിച്ചെണ്ണ പിടിച്ചെടുത്തിരുന്നു. ഓണക്കാലത്ത് വെളിച്ചെണ്ണയുടെ ഉപയോഗം വർധിക്കുന്നതിനാൽ, ഗുണനിലവാരം ഉറപ്പാക്കാൻ ഭക്ഷ്യസുരക്ഷാ വകുപ്പ് തീവ്രമായ നടപടികൾ സ്വീകരിക്കുന്നുണ്ട്.

ഭക്ഷണ വസ്തുക്കളിൽ മായം ചേർക്കുന്നത് ക്രിമിനൽ കുറ്റമാണെന്ന് മന്ത്രി വീണാ ജോർജ് വ്യക്തമാക്കി. പിടിച്ചെടുത്ത വെളിച്ചെണ്ണയുടെ ഗുണനിലവാരം പരിശോധിച്ച് കർശന നിയമനടപടികൾ സ്വീകരിക്കുമെന്നും അവർ കൂട്ടിച്ചേർത്തു. തുടർ പരിശോധനകൾ ശക്തമായി തുടരുമെന്ന് മന്ത്രി ഉറപ്പ് നൽകി. വെളിച്ചെണ്ണയുടെ ഗുണനിലവാരം സംബന്ധിച്ച പരാതികൾ പൊതുജനങ്ങൾക്ക് ടോൾ ഫ്രീ നമ്പറായ 1800 425 1125 വഴി അറിയിക്കാം. ഉപഭോക്താക്കളുടെ ആരോഗ്യം സംരക്ഷിക്കാൻ പൊതുജന സഹകരണം അനിവാര്യമാണെന്ന് ഭക്ഷ്യസുരക്ഷാ വകുപ്പ് ഉദ്യോഗസ്ഥർ വ്യക്തമാക്കി.

ഓപ്പറേഷൻ ലൈഫ്, കേരളത്തിൽ വെളിച്ചെണ്ണയുടെ ഗുണനിലവാരം ഉറപ്പാക്കാനും, മായം ചേർക്കുന്നവർക്കെതിരെ കർശന നടപടി സ്വീകരിക്കാനും ലക്ഷ്യമിടുന്നു. ഓണക്കാലത്ത് വർധിക്കുന്ന ഉപഭോഗം കണക്കിലെടുത്ത്, ഭക്ഷ്യസുരക്ഷ ഉറപ്പാക്കാൻ സർക്കാർ പ്രതിജ്ഞാബദ്ധമാണെന്നും ഉദ്യോഗസ്ഥർ കൂട്ടിച്ചേർത്തു.

English summary

Kerala's food safety department conducts inspections, seizing 4513 litres of suspected adulterated oil across seven districts to ensure quality