നല്ലപിള്ള ചമയാന് ശ്രമിക്കുകയാണ്; മുഖ്യമന്ത്രി ഇപ്പോള് മോദിയുടെ ശൈലിയാണ് പിന്തുടരുന്നതെന്ന് വിഡി സതീശന്
കൊച്ചി: മുഖ്യമന്ത്രി പിണറായി വിജയനെതിരെയും സംസ്ഥാന സര്ക്കാരിനെതിരെയും രൂക്ഷവിമര്ശനവുമായി പ്രതിപക്ഷ നേതാവ് വിഡി സതീശന് രംഗത്ത്. സില്വര് ലൈന്, കണ്ണൂര് യൂണിവേഴ്സിറ്റി വിഷയം, വഖഫ് നിയമനം എന്നീ സംഭവങ്ങളുടെ പശ്ചാത്തലത്തിലാണ് വിഡി സതീശന്റെ വിമര്ശനം. . ചാന്സലര് കൂടിയായ ഗവര്ണറാണ് കണ്ണൂര് വി.സിക്ക് പുനര് നിയമനം നല്കിയതെന്നും സര്ക്കാരിന്റെ യാതൊരുവിധ ഇടപെടലുകളും ഉണ്ടായിട്ടില്ലെന്നും പറഞ്ഞ മുഖ്യമന്ത്രി ജനങ്ങളെ തെറ്റിദ്ധരിപ്പിക്കുകയായിരുന്നെന്ന് വിഡി സതീശന് പറഞ്ഞു.
സര്വകലാശാലകളിലെ എല്ലാ നിയമനങ്ങളിലും ആരോപണം ഉയരുകയാണ്. ഒഴിവുകളിലേക്ക് പാര്ട്ടി നേതാക്കളുടെ ബന്ധുക്കളെയാണ് നിയമിച്ചിരിക്കുന്നത്. ഇതിനുള്ള ഉപകാരസ്മരണയായാണ് വി.സിയുടെ പുനര്നിയമനമെന്നും വിഡി സതീശന് കുറ്റപ്പെടുത്തി. എറണാകുളം പറവൂരില് പ്രതിപക്ഷ നേതാവ് നടത്തിയ വാര്ത്താസമ്മേളനത്തിലാണ് പ്രതിപക്ഷ നേതാവ് ഇക്കാര്യം വ്യക്തമാക്കിയത്.
സില്വര് ലൈന് പദ്ധതിയില് സര്ക്കാര് ജനങ്ങളെ കബളിപ്പിക്കുകയാണ്. പഠനത്തിനായി സര്ക്കാര് ചുമതലപ്പെടുത്തിയ ഏജന്സിയുടെ തലവന് അലോക് വര്മ ഞെട്ടിക്കുന്ന വിവരങ്ങളാണ് പുറത്തു വിട്ടിരിക്കുന്നത്. പ്രതിപക്ഷം ഉന്നയിച്ച ഒരു ചോദ്യത്തിന് പോലും മുഖ്യമന്ത്രി മറുപടി നല്കിയിട്ടില്ല. പിണറായി വിജയന്, 16 വര്ഷം വികസനവിരുദ്ധ പ്രവര്ത്തനങ്ങള്ക്ക് നേതൃത്വം നല്കിയ ഒരു പാര്ട്ടിയുടെ സെക്രട്ടറിയായിരുന്നു. ഇപ്പോള് നല്ലപിള്ള ചമയാന് ശ്രമിക്കുകയാണ്.
ഇപ്പോള് മോദിയുടെ ശൈലിയാണ് പിന്തുടരുന്നത്. ചോദ്യങ്ങള്ക്ക് കൃത്യമായ മറുപടി നല്കിയാല് പ്രതിപക്ഷവും പദ്ധതിയെ പിന്തുണയ്ക്കും. നിയമസഭയ്ക്കുള്ളിലും പുറത്തും ഒരു ചോദ്യത്തിനും മറുപടി നല്കില്ലെന്ന നിലപാടിലാണ് മുഖ്യമന്ത്രിയെന്നും വിഡി സതീശന് പറഞ്ഞു. വഖഫ് നിയമനങ്ങള് പി.എസ്.സിക്ക് വിടാനുള്ള നിയമം പാസാക്കിയപ്പോള് ലഡു വിതരണം നടത്തിയവരാണ് ഇപ്പോള് ഒരു വാശിയും ഇല്ലെന്നു പറയുന്നത്. അന്നും ഇന്നും യു.ഡി.എഫ് ഇക്കാര്യത്തില് ഒരു നിലപാടാണ് സ്വീകരിച്ചത്. തെറ്റായകാര്യങ്ങള് പറഞ്ഞ് ജനങ്ങളെ തെറ്റിദ്ധരിപ്പിക്കാനാണ് മുഖ്യമന്ത്രി ശ്രമിക്കുന്നത്.
Recommended Video
സാരിയില് തിളങ്ങി സ്വാസിക; ലുക്കായിട്ടുണ്ടെന്ന് ആരാധകര്
കണ്ണൂര് സര്വകലാശാല വൈസ് ചാന്സലര് നിയമനത്തില് അനധികൃതമായും വഴിവിട്ടും ഇടപെട്ട ഉന്നതവിദ്യാഭ്യാസ വകുപ്പ് മന്ത്രി ആര്. ബിന്ദു രാജിവയ്ക്കണമെന്നും വിഡി സതീശന് ആവശ്യപ്പെട്ടു. തെറ്റ് ചെയ്യാന് സര്ക്കാരിനെ പ്രേരിപ്പിച്ചതും സമ്മര്ദ്ദം ചെലുത്തിയതും സര്ക്കാരും ഉന്നത വിദ്യാഭ്യാസ വകുപ്പ് മന്ത്രിയുമാണ്. നിയമവിരുദ്ധമായാണ് ചാന്സലര് നിയമനത്തില് ഉന്നതവിദ്യാഭ്യാസ വകുപ്പ് മന്ത്രി ഇടപെട്ടത്. സര്വകലാശാലകളുടെ സ്വയംഭരണാവകാശത്തിലേക്കും ചാന്സലറുടെ അധികാരങ്ങളിലേക്കുമുള്ള കടന്നുകയറ്റമാണ് മന്ത്രി നടത്തിയത്. നിയമത്തിനുള്ളില് നിന്നു മാത്രമെ മന്ത്രിമാര്ക്ക് പ്രവര്ത്തിക്കാനാകൂ. ഇതിനു വിരുദ്ധമായി പ്രവര്ത്തിച്ച് സത്യ പ്രതിജ്ഞാ ലംഘനം നടത്തിയ മന്ത്രി രാജി വയ്ക്കണമെന്നും വിഡി സതീശന് ആവശ്യപ്പെട്ടു.
Click it and Unblock the Notifications
Sign in with Google