എല്ലാവരേയും ഞെട്ടിച്ച് പി മോഹനന്‍ സിപിഎം ജില്ലാ സെക്രട്ടറി

കോഴിക്കോട്: ടിപി ചന്ദ്രശേഖരന്‍ വധക്കേസില്‍ കോടതി കുറ്റ വിമുക്തനാക്കിയ പി മോഹന്‍ മാസ്റ്ററെ സിപിഎം കോഴിക്കോട് ജില്ലാ സെക്രട്ടറിയായി തിരഞ്ഞെടുത്തു. പാര്‍ട്ടി ജില്ലാ സെക്രട്ടേറിയറ്റ് അംഗമായിരുന്ന പി മോഹനന്റെ പേര് ആദ്യ ഘട്ടത്തില്‍ സെക്രട്ടറി സ്ഥാനത്തേക്ക് ഉയര്‍ന്ന് വന്നിരുന്നില്ല.

ടിപി ചന്ദ്രശേഖരന്‍ വധക്കേസില്‍ അറസ്റ്റിലായ ഏറ്റവും മുതര്‍ന്ന സിപിഎം നേതാവായിരുന്നു മോഹനന്‍ മാസ്റ്റര്‍. പികെ കുഞ്ഞനന്തന്റേയും കെസി രാമചന്ദ്രന്റേയും മൊഴിയുടെ അടിസ്ഥാനത്തിലാണ് മോഹനന്‍ മാസ്റ്ററെ പ്രതി ചേര്‍ത്തതെന്നായിരുന്നു പോലീസിന്റെ വാദം.

എന്നാല്‍ കേസ് കോടതിയില്‍ എത്തിയപ്പോള്‍ തെളിവുകളുടെ അഭാവത്തില്‍ മോഹനന്‍ മാസ്റ്ററെ വെറുതെ വിടുകയായിരുന്നു. ഇതേ തുടര്‍ന്നായിരുന്നു ടിപി ചന്ദ്രശേഖരന്റെ ഭാര്യ കെകെ രമ കൊലപാതകത്തിന് പിന്നിലെ ഗൂഢാലോചന സിബിഐ അന്വേഷിക്കണം എന്നാവശ്യപ്പെട്ട് നിരാഹാര സത്യാഗ്രഹം നടത്തിയത്.

നിലവില്‍ കോഴിക്കോട് ജില്ലാ സെക്രട്ടറിയായ ടിപി രാമകൃഷ്ണന്‍ മൂന്ന് ടേം പൂര്‍ത്തിയാക്കിക്കഴിഞ്ഞു. കോഴിക്കോട്ടെ ജനകീയ എംഎല്‍എ ആയ പ്രദീപ് കുമാറിന്റെ പേരും ജില്ലാ സെക്രട്ടറി സ്ഥാനത്തേക്ക് തുടക്കത്തില്‍ പരിഗണിച്ചിരുന്നതായാണ് റിപ്പോര്‍ട്ടുകള്‍.

ടിപി ചന്ദ്രശേഖരന്‍ കൊല്ലപ്പെട്ടതിനെ തുടര്‍ന്ന് പാര്‍ട്ടി പ്രതിരോധത്തിലായ വടകരയില്‍ വച്ചായിരുന്നു ജില്ലാ സമ്മേളനം നടത്തിയത്. അഞ്ച് പുതുമുഖങ്ങടക്കം നാല്‍പത് പേര്‍ അടങ്ങിയ ജില്ലാ കമ്മിറ്റിയെ ആണ് തിരഞ്ഞെടുത്തത്. എം ഗിരീഷ്, ടി വ്ശ്വനാഥന്‍, ടി ചന്തു, കെ പുഷ്പജ, പികെ പ്രേം നാഥ് എന്നിവരാണ് കമ്മിറ്റിയിലെ പുതുമുഖങ്ങള്‍.

ടിപി ചന്ദ്രശേഖരനെ വധിച്ചതിനുള്ള സമ്മാനമായിട്ടാണ് പി മോഹനനെ സിപിഎം ജില്ലാ സെക്രട്ടറിയാക്കിയതെന്ന് കെകെ രമ ആരോപിച്ചു.

English summary

P Mohanan elected as CPM Kozhikode district secretary.