ഷൂട്ടിംഗ് കഴിഞ്ഞ് മടങ്ങവെ സീരിയൽ സംഘത്തിന് നേരെ പടയപ്പയുടെ ആക്രമണം; വാഹനങ്ങൾ തകർത്തു

Updated: Saturday, December 14, 2024, 11:43 [IST]

തൊടുപുഴ: മൂന്നാറിൽ എത്തിയ സീരിയൽ ഷൂട്ടിംഗ് സംഘത്തിന്റെ വാഹനം തകർത്ത് പടയപ്പ. ഷൂട്ടിംഗ് കഴിഞ്ഞ് മടങ്ങുകയായിരുന്ന വാഹനങ്ങൾക്കിടയിലേക്ക് പടയപ്പ പാഞ്ഞടുക്കുകയായിരുന്നു. ആനയുടെ ആക്രമണത്തിൽ രണ്ട് കാറുകൾക്കും ഒരു ബൈക്കിനും കേടുപാട് സംഭവിച്ചു. സെലന്റ് വാലിയിൽ നടക്കുന്ന സീരിയിൽ ഷൂട്ടിംഗ് കഴിഞ്ഞ് മടങ്ങുകയായിരുന്ന ഇരുപതിലധികം വാഹനങ്ങൾക്ക് ഇടയിലേക്കാണ് പടയപ്പ പാഞ്ഞെത്തിയത്.

സെലന്റ് വാലി റോഡിൽ കുറ്റിയാർവാലിക്ക് സമീപം വെച്ചായിരുന്നു ആനയുടെ ആക്രമണം. ഒടിയെത്തിയ ആന വാഹനങ്ങൾ ആക്രമിക്കുകയായിരുന്നു. വാഹനത്തിൽ ഉണ്ടായിരുന്നവർ ഓടി രക്ഷപ്പെട്ടതിനാൽ വലിയ അപകടം ഒഴിവായി. സംഭവത്തെ തുടർന്ന് വനം വകുപ്പ് ആർ ആർ ടി ഡെപ്യൂട്ടി റേയ്ഞ്ചറുടെ നേതൃത്വത്തിലുള്ള വനപാലക സംഘം സ്ഥലത്ത് എത്തി പടയപ്പയെ കാട്ടിലേക്ക് ഓടിച്ചുവിട്ടു.

Representative Image

അടുത്തിടെ പടയു്ു അക്രമാസക്തനാകുന്നത് ആശങ്ക ഉണ്ടാക്കുന്നുണ്ട്. ഏതാനും ദിവസങ്ങൾക്ക് മുൻപാണ് മൂന്നാറിലെ ജനവാസ മേഖലയിൽ പടയപ്പ വീണ്ടും എത്തിയത്. ഗൂഡാർവിള എസ്റ്റേറ്റിലെത്തിയ പടയപ്പ കൃഷി നശിപ്പിച്ചിരുന്നു. ആളുകൾ ബഹളം വെച്ചപ്പോൾ തേയില തോട്ടത്തിലേക്ക് മാറി. രാവിലെ ഗൂഡാർവിള എസ്റ്റേറ്റിനും നെറ്റിമുടി എസ്റ്റേറ്റിനും ഇടയിലുള്ള റോഡിലെത്തി. കുറെ നേരം ഇവിടെ നിന്ന ശേഷം തോട്ടത്തിലേക്ക് മടങ്ങുകയായിരുന്നു.

കഴിഞ്ഞ വർഷം ഡിസംബറിലും മൂന്നാറിലെ ജനവാസ മേഖലയിൽ പടയപ്പ എത്തിയിരുന്നു. പ്രദേശത്തെത്തിയ പടയപ്പ ജനങ്ങൾക്ക് വ്യാപക നഷ്ടം ഉണ്ടാക്കിയിരുന്നു. മൂന്നാർ ലോക്ക് ഹാർട്ട് എസ്റ്റേറ്റിലെത്തിയ പടയപ്പ റേഷൻ കട ഭാഗികമായി തകർത്തിരുന്നു. കടയിൽ ഉണ്ടായിരുന്ന അരിയും ഭക്ഷിച്ച ശേഷമാണ് ആന മടങ്ങിയത്.