ആനന്ദ് മഹിന്ദ്രയുടെ 'ബക്കറ്റ് ലിസ്റ്റില്‍' ഇടംപിടിച്ച കേരളത്തിലെ ഏക ക്ഷേത്രം; ഇതാണ് കാരണം

പ്രമുഖ വ്യവസായിയായ ആനന്ദ് മഹിന്ദ്രയുടെ സോഷ്യല്‍ മീഡിയ പോസ്റ്റുകള്‍ വളരെ വേഗം ശ്രദ്ധിക്കപ്പെടാറുണ്ട്. ഇന്ത്യയിലെ അധികം ആരും ശ്രദ്ധിക്കാത്ത വിസ്മയങ്ങളെയും മറഞ്ഞുകിടക്കുന്ന അമൂല്യ നിധികളെയും അദ്ദേഹം ലോകത്തിന് മുന്നിലെത്തിക്കാറുണ്ട്. ഇത്തവണ അദ്ദേഹത്തിന്റെ ബക്കറ്റ് ലിസ്റ്റിലുള്ളത് തിരുവനന്തപുരത്തെ വിശ്വപ്രസിദ്ധമായ ശ്രീ പത്മനാഭസ്വാമി ക്ഷേത്രത്തിലാണ്. വാസ്തുവിദ്യയും ജ്യോതിശാസ്ത്രവും ഇത്രയേറെ മനോഹരമായി സമ്മേളിക്കുന്ന മറ്റൊരു ഇടം കാണാനില്ലെന്നാണ് മഹിന്ദ്ര ഗ്രൂപ്പ് ചെയര്‍മാന്‍ തന്റെ 'എക്‌സ്' ഹാന്‍ഡിലിലൂടെ സാക്ഷ്യപ്പെടുത്തുന്നത്.

ലോകപ്രസിദ്ധമായ ശ്രീ പത്മനാഭസ്വാമി ക്ഷേത്ര സന്ദര്‍ശനത്തെ ബക്കറ്റ് ലിസ്റ്റിലാണ് അദ്ദേഹം ഉള്‍പ്പെടുത്തിയിരിക്കുന്നത്. വാസ്തുവിദ്യയും ജ്യോതിശാസ്ത്രവും അതിമനോഹരമായി ഒത്തുചേരുന്ന ഈ ക്ഷേത്രത്തിന്റെ സവിശേഷതകളെക്കുറിച്ച് അദ്ദേഹം സോഷ്യല്‍ മീഡിയയില്‍ പങ്കുവെച്ച കുറിപ്പ് ഇതിനോടകം തന്നെ വലിയ ശ്രദ്ധ നേടിക്കഴിഞ്ഞു. ഭാരതത്തിന്റെ മറഞ്ഞിരിക്കുന്ന വിസ്മയങ്ങളെ ലോകത്തിന് പരിചയപ്പെടുത്തുന്നതില്‍ എപ്പോഴും താല്‍പ്പര്യം പ്രകടിപ്പിക്കുന്ന ആനന്ദ് മഹിന്ദ്ര, ഇത്തവണ കേരളത്തിലെ ഈ ക്ഷേത്രത്തിന്റെ നിര്‍മ്മാണ വൈദഗ്ധ്യത്തെയാണ് പ്രകീര്‍ത്തിച്ചിരിക്കുന്നത്.

അസ്തമയ സൂര്യന്‍ ക്ഷേത്ര ഗോപുരത്തിലെ ജാലകങ്ങളിലൂടെ കൃത്യമായ ഇടവേളകളില്‍ ദൃശ്യമാകുന്ന 'സൂര്യസ്മരണം' എന്ന പ്രതിഭാസമാണ് അദ്ദേഹത്തെ ഏറെ ആകര്‍ഷിച്ചത്. സെപ്റ്റംബര്‍, മാര്‍ച്ച് മാസങ്ങളില്‍ പകലും രാത്രിയും തുല്യമായി വരുന്ന ദിവസങ്ങളില്‍, ഗോപുരത്തിന്റെ മുകളില്‍ നിന്ന് താഴെയുള്ള ഓരോ ജാലകത്തിലൂടെയും സൂര്യന്‍ ക്രമമായി താഴേക്ക് ഇറങ്ങുന്നതായി കാണാന്‍ സാധിക്കും. നൂറ്റാണ്ടുകള്‍ക്ക് മുന്‍പ് നിര്‍മ്മിക്കപ്പെട്ട ഈ ക്ഷേത്രം, സൗരയൂഥത്തിന്റെ ചലനങ്ങളെക്കുറിച്ചും ജ്യാമിതിയെക്കുറിച്ചും അക്കാലത്തെ ആളുകള്‍ക്കുണ്ടായിരുന്ന ഗഹനമായ അറിവിന്റെ തെളിവാണെന്ന് അദ്ദേഹം അഭിപ്രായപ്പെട്ടു.

ശാസ്ത്രവും ആത്മീയതയും രണ്ട് വ്യത്യസ്ത വഴികളല്ലെന്നും അവ പരസ്പര പൂരകങ്ങളായി നിലകൊള്ളുന്നുവെന്നും അദ്ദേഹം കുറിച്ചു. കഴിഞ്ഞയാഴ്ച നടന്ന വസന്ത വിഷുവം തനിക്ക് നേരിട്ട് കാണാന്‍ സാധിക്കാത്തതില്‍ ഖേദമുണ്ടെന്നും എന്നാല്‍ അടുത്ത അവസരത്തിനായി കലണ്ടറില്‍ അടയാളപ്പെടുത്തിയിട്ടുണ്ടെന്നും അദ്ദേഹം കൂട്ടിച്ചേര്‍ത്തു.

108 ദിവ്യദേശങ്ങളില്‍ പ്രധാനപ്പെട്ട ഒന്നാണ് ശ്രീ പത്മനാഭസ്വാമി ക്ഷേത്രം. എട്ടാം നൂറ്റാണ്ടോളം പഴക്കമുള്ള ക്ഷേത്രം ചരിത്രരേഖകളില്‍ ഇടംപിടിച്ചതാണ്. അനന്തശയന രൂപത്തിലുള്ള മഹാവിഷ്ണുവാണ് ഇവിടുത്തെ പ്രധാന പ്രതിഷ്ഠ. ദ്രാവിഡ ശൈലിയും കേരളീയ വാസ്തുവിദ്യയും ഒത്തുചേരുന്ന ഏഴ് നിലകളുള്ള കൂറ്റന്‍ ഗോപുരവും 365 തൂണുകളുള്ള ഇടനാഴിയും ഈ ക്ഷേത്രത്തിന് ഗാംഭീര്യം പകരുന്നു. നവഗ്രഹ മണ്ഡപത്തിലെ കൊത്തുപണികള്‍ പൂര്‍വികര്‍ക്ക് ജ്യോതിശാസ്ത്രത്തിലുണ്ടായിരുന്ന അറിവിനെ ചൂണ്ടിക്കാണിക്കുന്നതാണ്.

തിരുവനന്തപുരം നഗരത്തില്‍ സ്ഥിതി ചെയ്യുന്ന ഈ ക്ഷേത്രത്തിലേക്ക് എത്തിച്ചേരുന്നത് ഭക്തര്‍ക്കും സഞ്ചാരികള്‍ക്കും ഒരുപോലെ എളുപ്പമാണ്. വിമാനമാര്‍ഗമാണ് എത്തുന്നതെങ്കില്‍ തിരുവനന്തപുരം അന്താരാഷ്ട്ര വിമാനത്താവളത്തില്‍ നിന്ന് 4 മുതല്‍ 6 കിലോമീറ്റര്‍ വരെ ദൂരം മാത്രമേ ക്ഷേത്രത്തിലേക്കുള്ളൂ. ട്രെയിന്‍ മാര്‍ഗ്ഗമെത്തുന്നവര്‍ക്ക് തമ്പാനൂര്‍ റെയില്‍വേ സ്റ്റേഷനില്‍ നിന്ന് വെറും 1-2 കിലോമീറ്റര്‍ സഞ്ചരിച്ചാല്‍ ക്ഷേത്രത്തിലെത്താം. ടാക്‌സികളും ഓട്ടോറിക്ഷകളും നഗരത്തില്‍ എപ്പോഴും ലഭ്യമാണ്.