കിട്ടിയത് 39 വോട്ട്; വയനാട്ടിലെ കോണ്‍ഗ്രസ് സ്ഥാനാര്‍ത്ഥി പാര്‍ട്ടി ഓഫീസില്‍ തൂങ്ങിമരിച്ചു

മാനന്തവാടി: തിരഞ്ഞെടുപ്പില്‍ തോല്‍ക്കുക എന്നത് രാഷ്ട്രീയ പ്രവര്‍ത്തകര്‍ക്ക് ഒരു പുതിയ സംഭവം അല്ല. പക്ഷേ ചില തോല്‍വികള്‍ ചിലരെ ആകെ പിടിച്ചുലച്ചുകളയും. അത്തരം ഒരു സംഭവമാണ് വയനാട്ടില്‍ നടന്നത്.

മാനന്തവാടി മുനിസിപ്പാലിറ്റിയിലേയ്ക്ക് നടന്ന തിരഞ്ഞെടുപ്പില്‍ കോണ്‍ഗ്രസ് സ്ഥാനാര്‍ത്ഥിയായിരുന്ന വ്യക്തി പാര്‍ട്ടി ഓഫീസില്‍ ആത്മഹത്യ ചെയ്തു. തിരഞ്ഞെടുപ്പില്‍ ദാരുണമായി പരാജയപ്പെട്ടതിനെ തുടര്‍ന്നാണ് ആത്മഹത്യ എന്നാണ് വിവരം.

മാനന്തവാടി നഗരസഭയില്‍ പുത്തന്‍പുര വാര്‍ഡില്‍ നിന്ന് ജനവിധി തേടിയ പിവി ജോണ്‍ ആണ് ആത്മഹത്യ ചെയ്തത്. ഡിസിസി സെക്രട്ടറിയായിരുന്നു ജോണ്‍.

തിരഞ്ഞെടുപ്പില്‍ കോണ്‍ഗ്രസ്സിന്റെ ഔദ്യോഗിക സ്ഥാനാര്‍ത്ഥിയായിരുന്നു ജോണ്‍. എന്നാല്‍ ജോണിന് കിട്ടിയത് വെറും 39 വോട്ടുകള്‍ മാത്രം. വിജയിച്ചതാകട്ടെ സ്വതന്ത്ര സ്ഥാനാര്‍ത്ഥിയായ വിയു ജോയും. സ്വതന്ത്ര സ്ഥാനാര്‍ത്ഥിയായ ജോയിയ്ക്ക് 346 വോട്ടുകള്‍ ലഭിച്ചു.

വാര്‍ഡില്‍ ആകെ അഞ്ച് സ്ഥാനാര്‍ത്ഥികളാണ് ഉണ്ടായിരുന്നത്. അതില്‍ നാലാം സ്ഥാനാം മാത്രമാണ് പിവി ജോണിന് ലഭിച്ചത്. മാനന്തവാടി ക്ലബ്ബ് കുന്ന് ബ്ലോക്ക് കോണ്‍ഗ്രസ്സ് കമ്മിറ്റി ഓഫീസിലാണ് പിവി ജോണിനെ മരിച്ച നിലയില്‍ കണ്ടെത്തിയത്.

English summary

Panchayath Election Result: Wayanad Congress candidate committed Suicide.