സെക്രട്ടറി സ്ഥാനം ഉപേക്ഷിക്കാന് പന്ന്യന് തയ്യാര്, വേണ്ടെന്ന് കേന്ദ്രം
തിരുവനന്തപുരം: സിപിഐ സംസ്ഥാന സെക്രട്ടറി സ്ഥാനം ഒഴിയാന് താന് തയ്യാറാണെന്ന് പന്ന്യന് രവീന്ദ്രന്. കഴിഞ്ഞ ലോക്സഭ തിരഞ്ഞിലെ പരാജയത്തിന്റെ ഉത്തരവാദിത്തവും പന്ന്യന് രവീന്ദ്രന് ഏറ്റെടുത്തു. എന്നാല് പന്ന്യന് സെക്രട്ടറി സ്ഥാനം ഒഴിയേണ്ടതില്ലെന്നാണ് കേന്ദ്ര നേതൃത്വത്തിന്റെ തീരുമാനം.
തിരുവനന്തപുരത്ത് ബെന്നറ്റ് എബ്രഹാമിനെ സ്ഥാനാര്ത്ഥിയാക്കിയതുമായി ബന്ധപ്പെട്ട വിവാദത്തില് പാര്ട്ടി ജില്ലാ സെക്രട്ടറി വെഞ്ഞാറമൂട് ശശിക്കെതിരെ നടപടിയെടുക്കാന് സിപിഐ സംസ്ഥാന സമിതി തീരുമാനിച്ചിട്ടുണ്ട്. ശശിയെ സെക്രട്ടറി സ്ഥാനത്ത് നിന്ന് മാറ്റി.
സംസ്ഥാന എക്സിക്യൂട്ടീവ് അംഗം പി രാമചന്ദ്രന് നായരും നടപടി നേരിടുമെന്ന് ഉറപ്പായി. രാമചന്ദ്രന് നായരെ തരംതാഴ്ത്താനാണ് തീരുമാനം. ഏത് ഘടകത്തിലേക്കായിരിക്കും തരം താഴ്ത്തുക എന്നത് അറിവായിട്ടില്ല. 2009 ലെ ലോക്സഭ തിരഞ്ഞെടുപ്പില് തിരുവനന്തപുരത്തെ എല്ഡിഎഫ് സ്ഥാനാര്ത്ഥിയായിരുന്നു രാമചന്ദ്രന് നായര്.
പന്ന്യന് രവീന്ദ്രനും സി ദിവാകരനും ദേശീയ സമിതി അംഗങ്ങളാണ്. അതുകൊണ്ട് ഇവര്ക്കെതിരെ നടപടിയെടുക്കാന് സംസ്ഥാന സമിതി ദേശീയ കൗണ്സിന് ശുപാര്ശ നല്കാന് തിരുമാനിച്ചിട്ടുണ്ട്. എന്നാല് പന്നയന് രവീന്ദ്രന് പാര്ട്ടി സെക്രട്ടറി സ്ഥാനം ഒഴിയേണ്ട സാഹചര്യം നിലവില് ഇല്ലെന്നാണ് കേന്ദ്ര നേതൃത്വത്തിന്റെ വിശദീകരണം.
പാര്ട്ടി കമ്മിറ്റികളില് തനിക്കെതിരെ ഉയര്ന്ന ആരോപണങ്ങള് ദു;ഖിപ്പിക്കുന്നതാണെന്ന് യോഗത്തില് പന്ന്യന് രവീന്ദ്രന് പറഞ്ഞു. കഴിഞ്ഞ ദിവസം സി ദിവാകരനും വൈകാരികമായാണ് യോഗത്തില് സംസാരിച്ചത്.