പരവൂര്‍ വെടിക്കെട്ട് ദുരന്തം; സഹായ ഹസ്തവുമായി രവി പിള്ളയും യുസഫലിയും

Updated: Sunday, April 10, 2016, 15:43 [IST]

തിരുവനന്തപുരം: കൊല്ലം പരവൂരിലെ പുറ്റിങ്ങല്‍ ക്ഷേത്രത്തില്‍ വെടികെട്ടിനിടയിലുണ്ടായ അപകടത്തില്‍ മരിച്ചവര്‍ക്ക് വ്യവസായികളായ യുസഫലിയും രവി പിള്ളയും സഹായ ധനം പ്രഖ്യാപിച്ചു.

അപകടത്തില്‍ മരിച്ചവരുടെ ആശ്രിതര്‍ക്ക് ഒരു ലക്ഷം രൂപയും പരിക്കേറ്റവര്‍ക്ക് 25,000 രൂപയും നല്‍കുമെന്ന് ആര്‍പി ഗ്രൂപ്പ് ചെയര്‍മാന്‍ രവി പിള്ള പറഞ്ഞു. ദുരന്തത്തില്‍ മരിച്ചവരുടെ കുടുംബങ്ങള്‍ക്ക് ഒരു ലക്ഷം രൂപവീതവും പരിക്കേറ്റവര്‍ക്ക് 50,000 രൂപ വീതവുമാണ് ലുലു ഗ്രൂപ്പ് ചെയര്‍മാനായ എംഎ യുസഫലി പ്രഖ്യാപിച്ചു.

നൂറിലേറെ പേര്‍ മരിക്കുകയും 250 ഓളം പേര്‍ക്ക് പരിക്കേല്‍ക്കുകയും ചെയ്ത വെടിക്കെട്ടപകടത്തില്‍ അകപെട്ടവര്‍ക്ക് കൂടുതല്‍ സഹായം വേണ്ടി വന്നാല്‍ അത് പിന്നീട് പരിഗണിക്കുമെന്നും ഇരുവരും അറിയിച്ചിട്ടുണ്ട്. അതേസമയം ദുരന്തത്തില്‍പെട്ടവര്‍ക്ക് താന്‍ കൂടി ഭാഗമായ പതാഞ്ജലി എന്ന ആയുര്‍വേദ സ്ഥാപനം നിര്‍മ്മിക്കുന്ന മരുന്നുകള്‍ എത്തിക്കുമെന്ന് മമ്മൂട്ടി പറഞ്ഞു.

അപകടത്തില്‍ പെട്ടവരുടെ ആശ്രിതര്‍ക്ക് പ്രധാനമന്ത്രി രണ്ട് ലക്ഷം രൂപയും ,സംസ്ഥാന സര്‍ക്കാര്‍ നാല് ലക്ഷം രൂപയും സഹായധനം പ്രഖ്യാപിച്ചിട്ടുണ്ട്. തിരുവനന്തപുരം മെഡിക്കല്‍ കോളേജിലും കൊല്ലം ജില്ലാ ആശുപത്രിയിലുമാണ് മൃതദേഹങ്ങള്‍ സൂക്ഷിച്ചിട്ടുള്ളത്. തിരിച്ചറിയാത്ത മൃതദേഹങ്ങള്‍ ഡിഎന്‍എ ടെസ്റ്റ് നടത്തുന്നതിനും ശ്രമം നടക്കുന്നുണ്ട്.