ജനക്കൂട്ടത്തിലേക്ക് പോലിസ് വാന്‍ പാഞ്ഞുകയറി മൂന്നു മരണം

Updated: Tuesday, February 24, 2015, 22:08 [IST]

പത്തനംതിട്ട: ജനക്കൂട്ടത്തിലേക്ക് പോലിസ് വാന്‍ പാഞ്ഞുകയറി മൂന്നു പേര്‍ മരിച്ചു. അപകടത്തില്‍ നിരവധി പേര്‍ക്ക് പരിക്കേറ്റിട്ടുണ്ട്. പരിക്കേറ്റവരില്‍ രണ്ടു പേരുടെ നില അതീവ ഗുരുതരമാണ്. ഏഴാംകുളത്ത് രാത്രി ഏഴരയോടെയാണ് സംഭവം.

ഉത്സവം കഴിഞ്ഞു മടങ്ങുകയായിരുന്ന ശിവശങ്കരപിള്ള(72), ഭാര്യ രത്‌നമ്മ(65) എന്നിവരാണ് മരിച്ചത്. ഒരാളെ ഇതുവരെയും തിരിച്ചറിയാന്‍ സാധിച്ചിട്ടില്ല. പ്രദേശത്ത് സംഘര്‍ഷാവസ്ഥ നിലനില്‍ക്കുകയാണ്. ഉന്നത പോലിസ് സംഘം സ്ഥലത്തെത്തിയിട്ടുണ്ട്.

ദേവീക്ഷേത്രത്തിലെ കെട്ടുകാഴ്ച കഴിഞ്ഞ് ആളുകള്‍ മടങ്ങുന്ന സമയമായതിനാല്‍ റോഡില്‍ നല്ല തിരക്കായിരുന്നു. അതിവേഗത്തിലെത്തിയ വാന്‍ ഒരു സൈഡിലൂടെ നടന്നു പോകുന്നവരെ ഇടിച്ചുവീഴ്ത്തി കൊണ്ട് ഓടയിലേക്ക് മറിയുകയായിരുന്നു.

വാഹനമോടിച്ചയാളുടെ അശ്രദ്ധയാണ് അപകടത്തിനു കാരണമെന്ന് കരുതുന്നു. ഡ്രൈവറായ എആര്‍ ക്യാംപിലെ എഎസ്‌ഐ ഷാജിയെ സസ്‌പെന്‍ഡ് ചെയ്തിട്ടുണ്ട്. ആഭ്യന്തര മന്ത്രി രമേശ് ചെന്നിത്തല എഡിജിപി പത്മകുമാറിനോട് വിശദമായ റിപ്പോര്‍ട്ട് ആവശ്യപ്പെട്ടിട്ടുണ്ട്.