"വിജയനും കുടുംബത്തിനും ആശംസകൾ!" ഇ.ഡി റെയ്ഡിന് പിന്നാലെ പിണറായി വിജയനെ പരിഹസിച്ച് പിസി ജോർജ്

പ്രതിപക്ഷ നേതാവ് പിണറായി വിജയന്റെ മകൾ വീണ വിജയന്റെ ഉടമസ്ഥതയിലുള്ള എക്സാലോജിക് സൊല്യൂഷൻസ് കമ്പനിയുടെ കേസുമായി ബന്ധപ്പെട്ട് അദേഹത്തിന്റെ വസതികളിൽ എൻഫോഴ്സ്മെന്റ് ഡയറക്ടറേറ്റ് നടത്തിയ റെയ്ഡിന് പിന്നാലെ കടുത്ത രാഷ്ട്രീയ പരിഹാസവുമായി മുൻ എംഎൽഎ പി സി ജോർജ് രംഗത്ത്. തന്റെ ഔദ്യോഗിക ഫേസ്ബുക്ക് പേജിലൂടെയാണ് മുഖ്യമന്ത്രി പിണറായി വിജയനെ ലക്ഷ്യമിട്ട് പി സി ജോർജ് പോസ്റ്റ് പങ്കുവെച്ചത്. കരിമണൽ കമ്പനിയായ സിഎംആർഎല്ലിൽ (CMRL) നിന്ന് എക്സാലോജിക് പണം കൈപ്പറ്റിയതുമായി ബന്ധപ്പെട്ട കേസിൽ കേന്ദ്ര അന്വേഷണ ഏജൻസികൾ നടപടി ശക്തമാക്കിയ സാഹചര്യത്തിലാണ് ഈ പ്രതികരണം.

ഫേസ്ബുക്ക് പോസ്റ്റിലെ പരിഹാസം ഇങ്ങനെ

ബെംഗളൂരുവിലെ എക്സാലോജിക് ഓഫീസിലും വീണ വിജയനുമായി ബന്ധപ്പെട്ട മറ്റ് കേന്ദ്രങ്ങളിലും ഇഡി പരിശോധന നടത്തിയ വാർത്ത പുറത്തുവന്നതിന് തൊട്ടുപിന്നാലെയാണ് പി സി ജോർജിന്റെ ഫേസ്ബുക്ക് പോസ്റ്റ് പ്രത്യക്ഷപ്പെട്ടത്. ബൈബിൾ വചനങ്ങളെ കൂട്ടുപിടിച്ചാണ് പരിഹാസം. ഫേസ്ബുക്ക് പോസ്റ്റിന്റെ പൂർണരൂപം ഇങ്ങനെ

"ഒരു കരണത്തടിക്കുന്നവന് മറു കരണം കൂടി കാട്ടി കൊടുക്കണം എന്നു പഠിപ്പിക്കുന്ന പുതിയ നിയമത്തേക്കാൾ എനിക്ക് ഇഷ്ടം കണ്ണിനു പകരം കണ്ണ് പല്ലിനു പകരം പല്ല് എന്നു പഠിപ്പിക്കുന്ന പഴയ നിയമമാണ്.
വിജയനും കുടുംബത്തിനും ആശംസകൾ". പിസി ജോർജ് കുറിച്ചു.

നടപടി കർശനമാക്കി ഇഡി

മാസപ്പടി വിവാദവുമായി ബന്ധപ്പെട്ട് സിഎംആർഎൽ, കെഎസ്ഐഡിസി ഉദ്യോഗസ്ഥരെയും വീണ വിജയന്റെ കമ്പനിയിലെ മുൻ ജീവനക്കാരെയും ഇഡി നേരത്തെ ചോദ്യം ചെയ്തിരുന്നു. ഇതിന്റെ തുടർച്ചയായാണ് ബെംഗളൂരുവിലെ ഓഫീസുകൾ കേന്ദ്രീകരിച്ച് ഇഡി മിന്നൽ പരിശോധന നടത്തിയത്. എക്സാലോജിക്കിന്റെ സാമ്പത്തിക ഇടപാടുകളെക്കുറിച്ചുള്ള നിർണ്ണായക ഡിജിറ്റൽ രേഖകൾ റെയ്ഡിൽ പിടിച്ചെടുത്തതായാണ് റിപ്പോർട്ടുകൾ. പി സി ജോർജിന്റെ മകനും ബിജെപി നേതാവുമായ ഷോൺ ജോർജ്ജ് മാസപ്പടി ആരോപണത്തിൽ തുടർ അന്വേഷണത്തിനായി നിരന്തരം കോടതികളെ സമീപിച്ചിരുന്നു.

രാഷ്ട്രീയ പോര് മുറുകുന്നു

അതേസമയം, നിലവിലെ പ്രതിപക്ഷ നേതാവ് പിണറായി വിജയനെ ലക്ഷ്യമിട്ട് കേന്ദ്ര ഏജൻസികൾ നടത്തുന്ന ഈ നീക്കം ശുദ്ധമായ രാഷ്ട്രീയ പകപോക്കലാണെന്ന് സിപിഎം നേതൃത്വം ആരോപിച്ചു. രാഷ്ട്രീയ എതിരാളികളെ ഇല്ലാതാക്കാൻ കേന്ദ്ര ഭരണകൂടം അന്വേഷണ ഏജൻസികളെ ദുരുപയോഗം ചെയ്യുകയാണെന്ന് സിപിഎം ജനറൽ സെക്രട്ടറി എം എ ബേബി കുറ്റപ്പെടുത്തി. റെയ്ഡിനെതിരെ സംസ്ഥാന വ്യാപകമായി സിപിഎം പ്രവർത്തകർ പ്രതിഷേധ പ്രകടനങ്ങളും ആരംഭിച്ചിട്ടുണ്ട്. സീരിയസ് ഫ്രോഡ് ഇൻവെസ്റ്റിഗേഷൻ ഓഫീസ് (SFIO) നൽകിയ റിപ്പോർട്ടിന്റെ അടിസ്ഥാനത്തിൽ കള്ളപ്പണം വെളുപ്പിക്കൽ നിരോധന നിയമപ്രകാരമാണ് ഇഡി ഈ കേസ് രജിസ്റ്റർ ചെയ്ത് മുന്നോട്ട് പോകുന്നത്. വരും ദിവസങ്ങളിൽ ഈ പരിശോധന കേരള രാഷ്ട്രീയത്തിൽ വൻ കൊടുങ്കാറ്റ് സൃഷ്ടിക്കുമെന്നുറപ്പാണ്.