'ഉമ്മന്‍ ചാണ്ടി കരുണാകരനെ പണിതു, അതിപ്പോള്‍ തിരിച്ചുകിട്ടി'

തിരുവനന്തപുരം: പാമോലിന്‍ അഴിമതി കേസില്‍ ഉമ്മന്‍ ചാണ്ടിക്ക് യാതൊരു പങ്കുമില്ലെന്ന് സര്‍ക്കാര്‍ ചീഫ് വിപ്പ് പിസി ജോര്‍ജ്ജ്. ഇക്കാര്യം തനിക്ക് നന്നായിട്ടറിയാമെന്നും പിസി ജോര്‍ജ്ജ് പറയുന്നു.

വിഎസ് അച്യുതാനന്ദന്റെ ഹര്‍ജിയില്‍ സുപ്രീം കോടതി ഇപ്പോള്‍ പറഞ്ഞ കാര്യങ്ങളെ ഒരു തമാശയായി കണ്ടാല്‍ മതിയെന്നാണ് ജോര്‍ജ്ജിന്റെ അഭിപ്രായം. ഉമ്മന്‍ ചാണ്ടിയെ കേസില്‍ പ്രതിയാക്കാനാവില്ലെന്നും ജോര്‍ജ്ജ് പറയുന്നു.

പക്ഷേ ഉമ്മന്‍ ചാണ്ടി മുമ്പ് ചെയ്ത ഒരു കാര്യത്തിന്റെ ഫലമാണ് ഇപ്പോള്‍ അനുഭവിക്കുന്നതെന്നും ജോര്‍ജ്ജ് പറയുന്നുണ്ട്. പണ്ട് പാമോലിന്‍ അഴിമതി കേസ് വന്നപ്പോള്‍ അതിന്റെ വിവരങ്ങള്‍ പുറത്തേക്ക് ചോര്‍ത്തിയത് ഉമ്മന്‍ ചാണ്ടിയാണെന്നാണ് ജോര്‍ജ്ജ് പറഞ്ഞ് വരുന്നത്.

മുഖ്യമന്ത്രിയായിരുന്ന കെ കരുണാകരനെ കുടുക്കാനായിരുന്നു ഇതത്രെ. ഗ്രൂപ്പ് വഴക്കിന്റെ ഭാഗമായി കരുണാകരനെ എങ്ങനെയെങ്കിലും ഒതുക്കാന്‍ നോക്കുമ്പോഴായിരുന്നു പാമോലിന്റെ വിവരങ്ങള്‍ ഉമ്മന്‍ ചാണ്ടി പ്രതിപക്ഷത്തിന് നല്‍കിയതെന്നാണ് ജോര്‍ജ്ജ് പറഞ്ഞത്.

ഇങ്ങനെയൊക്കെയാണങ്കിലും പാമോലിന്‍ കേസില്‍ ഉമ്മന്‍ ചാണ്ടി ഒരു തെറ്റും ചെയ്തിട്ടില്ലെന്ന് പിസി ജോര്‍ജ്ജ് ആവര്‍ത്തിക്കുന്നു. എന്തായാലും കോണ്‍ഗ്രസിലെ പഴയ ഐ വിഭാഗത്തിന് അടിക്കാന്‍ കൊടുത്ത നല്ല ഒരു വടിയായിപ്പോയി പിസി ജോര്‍ജ്ജിന്റെ ഇപ്പോഴത്തെ പ്രതികരണം എന്നാണ് രാഷ്ട്രീയ നിരീക്ഷകരുടെ വിലയിരുത്തല്‍.

English summary

PC Geroge supports Oommen Chandy in Palmolein Case.