വാഹനാപകടം: മന്ത്രിമാരുടെ പിഎമാര്‍ മരിച്ചു

By Soorya Chandran

Updated: Monday, March 24, 2014, 15:16 [IST]

കൊല്ലം: ദേശീയപാതയില്‍ ഉണ്ടായ വാഹനാപകടത്തില്‍ സംസ്ഥാനമന്ത്രിമാരുടെ പിഎമാരും ദമ്പതിമാരും ആയ രണ്ട് പേര്‍ മരിച്ചു. ആഭ്യന്ത്രമന്ത്രി രമേശ് ചെന്നിത്തലയുടെ പേഴ്‌സണല്‍ അസിസ്റ്റന്റ് സിആര്‍ രവീന്ദ്രന്‍ നായര്‍, ഭാര്യയും മന്ത്രി സിഎന്‍ ബാലകൃഷ്ണന്റെ പേഴ്‌സണല്‍ അസിസ്റ്റുമായ വിജയമ്മ എന്നിവരാണ് മരിച്ചത്.

കൊല്ലം നീണ്ടകരയില്‍ മാര്‍ച്ച23 ഞായറാഴ്ച രാത്രി 11.30 ഓടെയാണ് അപകടം നടന്നത്. നീണ്ടകര പാലത്തിന് അടുത്തുവച്ചായിരുന്നു സംഭവം.

മരിച്ച രവീന്ദ്രന്‍ നായരും രാധമ്മയും തിരുവനന്തപുരം തിരുമല സ്വദേശികളാണ്. മകളുടെ വിവാഹം ക്ഷണിച്ച് മടങ്ങും വഴിയാണ് അപകടം ഉണ്ടായത്. ഇവര്‍ സഞ്ചരിച്ച കാറും ടെമ്പോ ട്രാവലറും കൂട്ടിയിടിക്കുകയായിരുന്നു.

കാര്‍ ഓടിച്ചിരുന്ന വികെ കൃഷ്ണകുമാര്‍, ടെമ്പോ ട്രാവലറിന്റെ ഡ്രൈവര്‍ വിജയന്‍, ട്രാവലറില്‍ ഉണ്ടായിരുന്ന യാത്രക്കാരന്‍ ബിനു എന്നിവര്‍ക്ക് ഗുരുതരമായി പരിക്കേറ്റു. അമിതവേഗമാണ് അപകടത്തിന് കാരണമെന്നാണ് നിഗമനം.

രവീന്ദ്രന്‍ നായരും ഭാര്യ വിജയമ്മയും വിവാഹം ക്ഷണിച്ചതിന് ശേഷം തിരുവനന്തപുരത്തേക്ക് മടങ്ങുകയായിരുന്നു. നെയ്യാറ്റിന്‍കരയില്‍ നിന്ന് എറണാകുളത്തേക്ക് പോവുകയായിരുന്ന ടെമ്പോ ട്രാവലര്‍ ആണ് കാറില്‍ ഇടിച്ചത്. പോലീസും രണ്ട് യൂണിറ്റ് ഫയര്‍ഫോഴ്‌സും എത്തിയാണ് രക്ഷാ പ്രവര്‍ത്തനം നടത്തിയത്.