എന്നെ വെറുമൊരു നടിയാക്കരുത്: അരുന്ധതി
ഹൈദരാബാദ്: ഹൈദരാബാദ് സര്വ്വകലാശാലയില് ചുംബനസമരം നടത്തിയതിന്റെ പേരില് കേസില് പെട്ട അരുന്ധതിക്ക് അത് സംബന്ധിച്ച വാര്ത്തകള് വരുന്നതില് ഒരു പരാതിയും ഇല്ല. എന്നാല് തന്നെ വെറുമൊരു നടിയായും ചാനല് അവതാരകയായും മാത്രം അവതരിപ്പിക്കുന്നതിലാണ് അരുന്ധതിയുടെ അമര്ഷം.
ഒരു നടിയായിട്ടോ അവതാരകയായിട്ടോ അല്ല ചുംബനസമരം നടത്തിയതെന്ന് അരുന്ധതി വ്യക്തമാക്കുന്നു. ഹൈദരാബാദ് സര്വ്വകലാശാലയിലെ വിദ്യാര്ത്ഥിയായിട്ടാണ് സമരത്തില് പങ്കെടുത്തത്. നടി, അവതാരക എന്നീ രീതിയില് ഇതിനെ കാണുന്നത് സമൂഹത്തിന്റെ വാശിയാണെന്നും അരുന്ധതി പറയുന്നു.
ദയവ് ചെയ്ത് തന്നെ വീണ്ടും വീണ്ടും സിനിമ നടി എന്ന് പറഞ്ഞ് അപമാനിക്കരുതെന്നാണ് അരുന്ധതി മനോരമ ഓണ്ലൈനിനോട് പറഞ്ഞത്. താന് ഈ രാജ്യത്ത് ജീവിക്കുന്ന സ്വതന്ത്രയായ ഒരു വ്യക്തിയാണെന്നും അരുന്ധതി പറയുന്നു.
തന്റെ ചുംബന ചിത്രങ്ങള് പ്രചരിക്കുന്നതിനെക്കുറിച്ചും അരുന്ധതിക്ക് പറയാനുണ്ട്. ആണും പെണ്ണും പരസ്പരം ചുംബിച്ചാല് എന്താണ് തെറ്റ്... പെണ്ണും പെണ്ണും പരസ്പരം ചുംബിച്ചാല് എന്താണ് തെറ്റ്... എല്ലാത്തിനേയും മഞ്ഞ കണ്ണുകൊണ്ട് കാണുന്നതാണ് പ്രശ്നമെന്നും അരുന്ധതി പറയുന്നു.
കേരള സര്വ്വകലാശാലയില് നിന്ന് ബിഎ പൊളിറ്റിക്കല് സയന്സില് ഒന്നാം റാങ്ക് സ്വന്തമാക്കിയ മിടുക്കിയാണ് അരുന്ധതി. തിരുവനന്തപുരത്തെ പഠനവേളയില് എസ്എഫ്ഐയുടെ സമരപരിപാടികളിലെല്ലാം സജീവ സാന്നിധ്യവും ആയിരുന്നു.
ഹൈദരാബാദ് സര്വ്വകലാശാലയില് ചുംബനക്കൂട്ടായ്മ നടത്തിയതിന് അരുന്ധതിക്കെതിരെ പോലീസ് കേസെടുത്തിട്ടുണ്ട്. പൊതു സ്ഥലത്ത് അശ്ലീല പ്രദര്ശനം നടത്തി എന്നാണ് കേസ്.