വാട്‌സ് ആപ്പിലൂടെ പരിചയപ്പെട്ട പ്ലസ്ടു വിദ്യാര്‍ത്ഥിനിയെ പീഡിപ്പിച്ചു,36കാരനായ കാമുകന്‍ പിടിയില്‍

വിവാഹ വാഗ്ദാനം നല്‍കി വിളിച്ചുവരുത്തിയ ശേഷമാണ് പെണ്‍കുട്ടിയെ ലൈംഗികമായി പീഡിപ്പിച്ചത്.

തിരുവനന്തപുരം: വാട്‌സ് ആപ്പ് ചാറ്റിലൂടെ പരിചയപ്പെട്ട പ്ലസ്ടു വിദ്യാര്‍ത്ഥിനിയെ വിവാഹ വാഗ്ദാനം നല്‍കി പീഡിപ്പിച്ചയാളെ പോലീസ് അറസ്റ്റ് ചെയ്തു. കാസര്‍കോട് പള്ളിക്കര സ്വദേശിയായ പുഷ്പരാജിനെ(36)യാണ് പാങ്ങോട് പോലീസ് അറസ്റ്റ് ചെയ്തത്. ഒരു വര്‍ഷമായി പെണ്‍കുട്ടിയുമായി ഫോണിലൂടെ ബന്ധം പുലര്‍ത്തിയിരുന്ന പ്രതി കഴിഞ്ഞ ദിവസം തമ്പാനൂരിലെത്തിയാണ് പെണ്‍കുട്ടിയെ ലൈംഗികമായി പീഡിപ്പിച്ചത്.

ജനുവരി 18ന് സ്‌കൂളിലേക്ക് പോയ പെണ്‍കുട്ടിയെ പുഷ്പരാജ് തമ്പാനൂരിലേക്ക് വിളിച്ചുവരുത്തുകയായിരുന്നു. തുടര്‍ന്ന് വിവാഹം കഴിക്കാമെന്ന് ഉറപ്പ് നല്‍കിയ ശേഷമാണ് ലൈംഗികമായി പീഡിപ്പിച്ചത്. ഇതിനിടെ പ്രായപൂര്‍ത്തിയാകാത്ത പെണ്‍കുട്ടിയെ കാണാനില്ലെന്ന് രക്ഷിതാക്കള്‍ പാങ്ങോട് പോലീസില്‍ പരാതിപ്പെട്ടിരുന്നു.

പെണ്‍കുട്ടിയുടെ മൊബൈല്‍ ഫോണ്‍ സിഗ്നല്‍ പിന്തുടര്‍ന്ന പോലീസ് പെണ്‍കുട്ടി തമ്പാനൂരിലുണ്ടെന്ന് കണ്ടെത്തി. എന്നാല്‍ പെണ്‍കുട്ടിയെ പോലീസ് കണ്ടെത്തുമ്പോള്‍ പുഷ്പരാജ് കൂടെയില്ലായിരുന്നു. ലൈംഗികമായി പീഡിപ്പിച്ച ശേഷം തന്നോട് തിരികെ വീട്ടില്‍ പോകാന്‍ പറഞ്ഞ പ്രതി മുങ്ങിയെന്നാണ് പെണ്‍കുട്ടി പോലീസിന് മൊഴി നല്‍കിയത്.

പ്ലസ്ടു വിദ്യാര്‍ത്ഥിനിയായ പെണ്‍കുട്ടി നല്‍കിയ മൊഴിയുടെ അടിസ്ഥാനത്തില്‍ അന്വേഷണം തുടര്‍ന്ന പോലീസ് തിരുവനന്തപുരം സെന്‍ട്രല്‍ റെയില്‍വേ സ്റ്റേഷനില്‍ നിന്നാണ് പ്രതിയെ കസ്റ്റഡിയിലെടുത്തത്. അറസ്റ്റ് രേഖപ്പെടുത്തിയ ശേഷം കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

English summary

Plustwo student molested in Thiruvananthapuram.