കൊച്ചിയില്‍ പോലീസ് അസിസ്റ്റന്റ് കമാണ്ടന്റ് സ്വന്തം തോക്കില്‍ നിന്ന് വെടിയേറ്റ് മരിച്ചു... ദുരൂഹത?

കൊച്ചി: രാത്രി പട്രോളിങ്ങിനിടെ ഉന്നത പോലീസ് ഉദ്യോഗസ്ഥന്‍ സ്വന്തം തോക്കില്‍ നിന്ന് വെടിയേറ്റ് മരിച്ചു. തൃപ്പൂണിത്തുറ എആര്‍ ക്യാമ്പിലെ അസിസ്റ്റന്റ് കമാണ്ടന്റ് ആയ സാബു മാത്യു ആണ് മരിച്ചത്. എങ്ങനെയാണ് തോക്കില്‍ നിന്ന് വെടിയുതിര്‍ന്നത് എന്നത് സംബന്ധിച്ച് ഒരു സൂചനയും ലഭിച്ചിട്ടില്ല.

പുലര്‍ച്ചെ ഒന്നരയോടെ ആയിരുന്നു സംഭവം. സാബു മാത്യുവിനൊപ്പം ഡ്രൈവറും മറ്റൊരു പോലീസ് ഉദ്യോഗസ്ഥനും ഉണ്ടായിരുന്നു. വാഴക്കാലയില്‍ വച്ചാണ് സംഭവം നടന്നത്. ഉടന്‍ തന്നെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിയ്ക്കാന്‍ കഴിഞ്ഞില്ല.

വാഴക്കാലയിലെ പാര്‍ക്കിങ് ഏരിയയിലേക്ക് വാഹനം കയറ്റിയിടാന്‍ സാബു മാത്യു നിര്‍ദ്ദേശിച്ചതിന് തൊട്ടുപിറകെയാണ് വെടിശബ്ദം കേട്ടതെന്ന് കൂടെയുണ്ടായിരുന്നവര്‍ പറയുന്നു. തനിയ്ക്ക് വെടിയേറ്റുവെന്ന് സാബു പറഞ്ഞത്രെ. വാഹനത്തിന്റെ പിന്‍ സീറ്റില്‍ ആയിരുന്നു സാബു ഇരുന്നിരുന്നത്.

വയറിന് താഴെയാണ് വെടിയേറ്റിട്ടുള്ളത്. തൊട്ടടുത്ത് നിന്ന വെടിയേറ്റതിനാല്‍ ആഴത്തിലുള്ള മുറിവാണ് ഉണ്ടായത്. ഇത് തന്നെയാണ് മരണകാരണം എന്നാണ് റിപ്പോര്‍ട്ട്.

English summary

A police officer, who was returning home after night shift, died of a bullet injury in the wee hours of Sunday. The deceased is Sabu Mathew of Kalachinkal veedu in Irumbanam, who is an Assistant Commandant attached to the Tripunithura AR camp.