ജനശ്രീയില് റെയ്ഡ്... ഹസ്സനിട്ട് ചെന്നിത്തലയുടെ പണി?
തിരുവനന്തപുരം: കടുംബശ്രീയ്ക്ക് ബദല് ആയി കോണ്ഗ്രസിന്റെ നേതൃത്വത്തില് തുടങ്ങിയ സംരഭമാണ് ജനശ്രീ. ഇപ്പോഴത്തെ കെപിസിസി വൈസ് പ്രസിഡന്റ് എംഎം ഹസ്സനാണ് അതിന് നേതൃത്വം നല്കുന്നത്. എന്നാല് കോണ്ഗ്രസ് നേതൃത്വം നല്കുന്ന ഒരു പരിപാടിയ്ക്ക് കോണ്ഗ്രസിന്റെ ആഭ്യന്തരമന്ത്രി തന്നെ പണികൊടുക്കുമോ...
വെഞ്ഞാറമൂട്ടിലെ ജനശ്രീ ഓഫീസിലാണ് പോലീസ് റെയ്ഡ് നടത്തിയത്. കണ്ടെത്തിയത് നാല്പത് ലക്ഷം രൂപയുടെ മുദ്ര പത്രങ്ങളും വ്യാജ സീലുകളും. ബ്ലേഡ് പലിശക്കാരെ തോല്പിയ്ക്കുന്ന പലിശയ്ക്കാണത്രെ ഇവിടെ നിന്ന് ആളുകള്ക്ക് വായ്പ നല്കിയിരുന്നത്.
ജനശ്രീയില് നിന്ന് വായ്പയെടുത്ത പ്രദേശത്തെ 39 കുടുംബങ്ങള് ഇപ്പോള് ജപ്തി ഭീഷണിയിലാണ്. ഒരു കോടി രൂപയിലധികം ഇവിടെ നിന്ന് വായ്പയായി നല്കിയിട്ടുണ്ടെന്നാണ് റിപ്പോര്ട്ടുകള്. നാട്ടുകാരുടെ പരാതിയെ തുടര്ന്നാണ് ജനശ്രീ ഓഫീസില് പോലീസ് റെയ്ഡ് നടത്തിയത്. ഇതിനകം സംഘത്തിന്റെ സെക്രട്ടറി ഒളിവില് പോവുകയും ചെയ്തു.
നിലവിലെ രാഷ്ട്രീയ സാഹചര്യത്തില് പോലീസിന്റെ നടപടി ഏറെ പ്രാധാന്യം അര്ഹിയ്ക്കുന്നതാണ്. കോണ്ഗ്രസിനുള്ളില് ഗ്രൂപ്പ് വഴക്ക് വീണ്ടും സജീവമാവുകയും അഴിമതി ആരോപണങ്ങളുടെ പേരില് എ ഗ്രൂപ്പ് സമ്മര്ദ്ദത്തിലാവുകയും ചെയ്തിരിയ്ക്കുന്ന സമയമാണിത്.