കെ സുരേന്ദ്രന്റെ മകളെ ഫെയ്സ്ബുക്കില് അധിക്ഷേപിച്ച സംഭവം; പൊലീസ് കേസെടുത്തു
തിരുവനന്തപുരം: ബിജെപി സംസ്ഥാന പ്രസിഡന്റ് കെ സുരേന്ദ്രന്റെ മകളെ ഫെയസ്ബുക്കില് അധിക്ഷേപിച്ച സംഭവത്തില് കേസെടുത്ത് പോലീസ്. കോഴിക്കോട് മേപ്പയൂര് പൊലീസാണ് സംഭവത്തില് കേസ് രജിസ്റ്റര് ചെയ്തത്. അധിക്ഷേപിച്ച് കമന്റിട്ട ഖത്തറില് ജോലി ചെയ്യുന്ന അജിനാസിനെതിരെയാണ് കേസ് രജിസ്റ്റര് ചെയ്തത്.
Recommended Video
ഫെയ്സ്ബുക്കിലൂടെ സുരേന്ദ്രന്റെ മകള്ക്കെതിരെ അശ്ലീലപരാമര്ശം നടത്തിയതിനെതിരെ രൂക്ഷ വിമര്ശനവുമായി പാര്ട്ടി സംസ്ഥാന വക്താവ് ഇന്നലെ രംഗത്തു വന്നിരുന്നു. കഴിഞ്ഞ ദിവസം മകളോടൊപ്പമുള്ള ചിത്രം ഫേയസ്ബുക്കില് ഇട്ട കെ സുരേന്ദ്രന്റെ പോസ്റ്റിന് താഴെയാണ് അജ്നാസ് എന്നയാള് അശ്ലീല പരാമര്ശം നടത്തിയത്. അസഭ്യം പറഞ്ഞവരെ എങ്ങനെ കൈകാര്യം ചെയ്യണമെന്ന് ബിജെപിക്ക് അറിയാമെന്നും അവരെ വെറുതെ വിടാന് ഉദ്ദേശിക്കുന്നില്ലെന്നും സന്ദീപ് വാര്യര് ഇന്നലെ പറഞ്ഞിരുന്നു.
അജിനാസിന്റെ വീട്ടിലേക്ക് സംഭവത്തിന് പിന്നാലെ ബിജെപി പ്രവര്ത്തകര് മാര്ച്ച് നടത്തി. അദ്ദേഹത്തിന്റെ പിതാവിന് താക്കീത് നല്കിയാണ് ബിജെപി പ്രവര്ത്തകര് മടങ്ങിയത്. " ഈ പ്രതികരണമൊന്നുമല്ല ഉണ്ടാകേണ്ടത്. അറിയാല്ലോ, അതിനുള്ള ആള്ക്കാരും സംവിധാനവും ഇവിടെ തന്നെയുണ്ടാകും. എന്നായിരുന്നു ബിജിപി പ്രവര്ത്തകരുടെ ഭീഷണി. അജ്നാസിനെ തങ്ങള് ഫോണില് ബന്ധപ്പെട്ടെന്നും എന്നാല് അവന് പറഞ്ഞത് താന് അല്ല അങ്ങനെയൊരു പരാമര്ശം നടത്തിയതെന്നാണ്. അവന് അല്ലെങ്കില് കുഴപ്പമില്ല. ആണെങ്കില് നിയമപരമായും അല്ലാതെയും നേരിടുമെന്നും ബിജെപിക്കാര് താക്കീത് നല്കി.
ഖത്തര് ആഭ്യന്തരമന്ത്രാലയത്തിന്റെ ഫേയ്സ്ബുക്ക് പേജിലും അജ്നാസിനെതിരെ നടപടി വേണമെന്ന് ആവശ്യപ്പെട്ട് ബിജിപി പ്രവര്ത്തകരുടെ കമന്റുകള്കൊണ്ട് നിറയുകയാണ്. കേരളത്തിലെ രാഷ്ട്രീയ പാര്ട്ടിയുടെ സംസ്ഥാന നേതാവിന്റെ മകള്ക്കെതിരെ അശ്ലീല പരാമര്ശം നടത്തിയ അജ്നാസിനെതിരെ നടപടി സ്വീകരിക്കണണെന്നും രാജ്യത്ത് നിന്ന് പുറത്താക്കണമെന്നും ഇവര് ആവശ്യപ്പെട്ടു.