കോഴിക്കോട്ട് പോലീസ് വാഹനത്തിന് പൂജ; ക്ഷേത്രത്തിലെത്തിച്ചത് പോലീസുകാര്, വീഡിയോ പുറത്ത്
കോഴിക്കോട്: സര്ക്കാര് പുതുതായി ലഭിച്ച വാഹനത്തിന് ക്ഷേത്രത്തില് കൊണ്ടുപോയി പൂജ നടത്തി കോഴിക്കോട്ടെ പോലീസുകാര്. നഗരത്തിലെ പ്രമുഖ ക്ഷേത്രത്തിലെത്തിച്ച് പൂജ നടത്തുന്ന ദൃശ്യങ്ങള് സോഷ്യല് മീഡിയയില് പ്രചരിക്കുന്നു. പോലീസുകാര് യൂണിഫോമിലാണ്. ചട്ടംലംഘിച്ചുള്ള പൂജയ്ക്കെതിരെ പോലീസിലെ ഒരു വിഭാഗം രംഗത്തുവന്നിട്ടുണ്ട്.
പോലീസുകാരുടെ വാട്സ്ആപ്പ് കൂട്ടായ്മയില് നിന്നാണ് വീഡിയോ പുറത്തായത്. ക്ഷേത്രത്തിലെത്തിച്ച വാഹനത്തിന് മുമ്പില് പൂജാരി മന്ത്രങ്ങള് ചൊല്ലുന്നതും വാഹനത്തിന് ചുറ്റും നടക്കുന്നതും വീഡിയോയില് കാണാം. പൂജക്ക് ശേഷം പൂജാരിയുടെ കാല്തൊട്ട് വന്ദിച്ചാണ് പോലീസുകാരന് വാഹനം എടുത്തത്. രണ്ട് പോലീസുകാരെയാണ് വീഡിയോയില് കാണുന്നത്.
കോഴിക്കോട് സിറ്റി പോലീസ് കണ്ട്രോള് റൂമിന് അനുവദിച്ച വാഹനമാണ് പൂജ നടത്താന് വേണ്ടി ക്ഷേത്രത്തില് കൊണ്ടുപോയത്. കണ്ട്രോള് റൂമിന് അഞ്ച് എസി വാഹനങ്ങളാണ് അനുവദിച്ചിരിക്കുന്നത്.
ചട്ട പ്രകാരം യൂണിഫോമില് മതാചാര ചടങ്ങുകളില് പങ്കെടുക്കാന് പോലീസുകാര്ക്ക് അനുവാദമില്ല. പൂജ നടത്തിയ പോലീസുകാര്ക്കെതിരെ നടപടി വേണമെന്ന ആവശ്യവും ഉയര്ന്നിട്ടുണ്ട്. സമാനമായ സംഭവം തൃശൂരിലും അടുത്തിടെയുണ്ടായിരുന്നു. വീഡിയോ പുറത്തായ സാഹചര്യത്തില് നടപടിയുണ്ടാകുമെന്നാണ് വിവരം.