കെ.ആര്‍ നാരായണന്റെ കുംടുംബം സിപിഎം വിട്ട് ബിജെപിയില്‍

കോട്ടയം: മുന്‍ രാഷ്ട്രപതി കെ.ആര്‍ നാരായണന്റെ സ്മൃതി മണ്ഡപത്തെ അവഹേളിക്കുന്നു എന്നാരോപിച്ച് കെ.ആര്‍ നാരായണന്റെ കുടുംബാംഗങ്ങള്‍ ബിജെപിയില്‍ ചേര്‍ന്നു. കെ.ആര്‍ നാരായണന്റെ കോട്ടയം ഉഴവൂരിലുള്ള മുപ്പത് കുടുംബാംഗങ്ങളാണ് സിപിഎം വിട്ട് ബിജെപിയിലേക്ക് ചേക്കേറിയത്.

ഉഴവൂര്‍ കോച്ചേരി തറവാട്ടിലെ കെ.ആര്‍ നാരായണന്റെ പിതൃസഹോദരി പുത്രി സീതാലക്ഷ്മിയും ഭര്‍ത്താവും അടക്കം മുപ്പത് പേരാണ് ബിജെപിയിലേക്ക് ചേര്‍ന്നത്. ബിജെപി സംസ്ഥാന ഉപാധ്യക്ഷന്‍ പി.എന്‍ വേലായുധന്‍ ഇവര്‍രെ അംഗത്വം നല്‍കി സ്വീകരിച്ചു. ഉഴവൂരിലെ വീടിനോടു ചേര്‍ന്നുള്ള കെ.ആര്‍ നാരായണന്റെ സ്മൃതിമണ്ഡപത്തെ അവഗണിക്കുന്നു എന്ന കാരണത്താലാണ് സിപിഎം വിട്ട് പോകാന്‍ ഇവരെ പ്രേരിപ്പിച്ചത്.

പരിസരത്തുള്ള വഴി കൈവശപ്പെടുത്താന്‍ ചിലര്‍ ശ്രമിക്കുന്നുണ്ടെന്നും എന്നാല്‍ അത് തടയാന്‍ പാര്‍ട്ടി നേതൃത്വം ഇടപ്പെടുന്നില്ലെന്നുമാണ് ഇവര്‍ ആരോപിക്കുന്നു. ഇതുവരെ ഒരു ആവശ്യങ്ങളും ഞങ്ങള്‍ പാര്‍ട്ടിയോട് ആവശ്യപ്പെട്ടിട്ടില്ലെന്നും എന്നാല്‍ ഈ കാര്യം ശ്രദ്ധയില്‍പ്പെടുത്തിയപ്പോള്‍ പാര്‍ട്ടി വിമുഖതയാണ് കാണിച്ചതെന്നും കുടുംബാംഗങ്ങള്‍ പറയുന്നു.

ഞങ്ങളുടെ പ്രശ്‌നം തീര്‍ക്കാന്‍ ബിജെപിയാണ് മുന്നോട്ടു വന്നതെന്നും അവര്‍ പറയുന്നു. മുന്‍ രാഷ്ട്രപതിയുടെ കുടുംബാംഗങ്ങള്‍ പാര്‍ട്ടി വിട്ടതിനോട് സിപിഎം നേതൃത്വം ഇതുവരെ പ്രതികരിച്ചിട്ടില്ല.

English summary

Former president K.R Narayanan family join bjp