സംസ്ഥാനത്ത് ജൂൺ 14 മുതൽ ട്രോളിംഗ് നിരോധനം, കോസ്റ്റ്ഗാർഡിനും മറൈൻ എൻഫോഴ്സ്മെന്റിനും കർശന നിർദേശം

ട്രോളിംഗ് നിരോധനം പരമ്പരാഗത വള്ളങ്ങൾക്ക് ബാധകമാകില്ല. അതേസമയ, എൻജിൻ ഘടിപ്പിച്ച വള്ളങ്ങൾ കടലിൽ പോകുന്നത് കർശനമായി തടയും.

തിരുവനന്തപുരം: സംസ്ഥാനത്ത് ജൂൺ 14 മുതൽ ജൂലായ് 31 വരെ ട്രോളിംഗ് നിരോധനം ഏർപ്പെടുത്തുമെന്ന് ഫിഷറീസ് വകുപ്പ് മന്ത്രി ജെ മേഴ്സിക്കുട്ടിയമ്മ അറിയിച്ചു. മത്സ്യമേഖലയിലെ സംഘടനാ നേതാക്കളുമായും വകുപ്പുതല ഉദ്യോഗസ്ഥരുമായും ദർബാർ ഹാളിൽ നടത്തിയ യോഗത്തിലാണ് ജൂൺ 14 മുതൽ ട്രോളിംഗ് നിരോധനം ഏർപ്പെടുത്താൻ തീരുമാനമായത്.

പന്ത്രണ്ട് നോട്ടിക്കൽ മൈലിന് പുറത്ത് കേന്ദ്രസർക്കാരിന്റെ നിരോധനം നിലവിൽ വന്നിട്ടുണ്ട്. ഇത് കർശനമായി പാലിക്കാൻ കോസ്റ്റ് ഗാർഡും മറൈൻ എൻഫോഴ്സ്മെന്റും നടപടി സ്വീകരിക്കണമെന്നും, ഇതിനായി ജില്ലാ കളക്ടർമാർ പ്രത്യേകം യോഗം വിളിക്കണമെന്നും മന്ത്രി നിർദേശം നൽകിയിട്ടുണ്ട്.

ട്രോളിംഗ് നിരോധനം സംബന്ധിച്ച് ചേർന്ന യോഗത്തിൽ പരമ്പരാഗത മത്സ്യബന്ധനത്തിനെതിരായ കേന്ദ്രത്തിന്റെ കരട് നയവും ചർച്ച ചെയ്തിരുന്നു. ജൂൺ 14 മുതൽ ആരംഭിക്കുന്ന ട്രോളിംഗ് നിരോധനം പരമ്പരാഗത വള്ളങ്ങൾക്ക് ബാധകമാകില്ല. അതേസമയ, എൻജിൻ ഘടിപ്പിച്ച വള്ളങ്ങൾ കടലിൽ പോകുന്നത് കർശനമായി തടയും.

സുരക്ഷയുടെ ഭാഗമായി കടലിൽ പോകുന്ന വള്ളങ്ങൾക്ക് ഏകീകൃത കളർ ഉപയോഗിക്കുന്നത് കർശനമാക്കാനും യോഗത്തിൽ തീരുമാനമായി. ഫീഷറീസ് മന്ത്രിക്കും വിവിധ സംഘടനാ നേതാക്കൾക്കും പുറമേ ഫീഷറീസ് ഡയറക്ടർ എസ് കാർത്തികേയൻ, ജില്ലാ കളക്ടർ ടി മിത്ര, എൻ വീണ, യുവി ജോസ് എന്നിവരും യോഗത്തിൽ പങ്കെടുത്തു.

English summary

prohibition of trolling starts from june 14.