'ഗോവയിൽ മുസ്ലിം ജനസംഖ്യ കൂടുന്നു, ക്രിസ്ത്യാനികൾ കുറയുന്നു'; വിവാ​ദപരാമർശം, വിശദീകരണുമായി ശ്രീധരൻ പിള്ള

കൊച്ചി: ​ഗോവയിൽ മുസ്ലിം ജനസംഖ്യ കൂടുന്നുവെന്നും ക്രിസ്ത്യാനികൾ കുറയുന്നുവെന്നുമുള്ള ​ഗോവ ​ഗവർണർ പി എസ് ശ്രീധരൻ പിള്ളയുടെ പരാമർശം വിവാദത്തിൽ. എറണാകുളം കരുമാലൂർ സെന്റ് മേരീസ് പള്ളിയിലെ ചടങ്ങിൽ പങ്കെടുത്ത് സംസാരിക്കുമ്പോഴായിരുന്നു ശ്രീധരൻ പിള്ള വിവാദ പരാമർശം നടത്തുന്നത്.

​ഗോവയിൽ ക്രൈസ്തവർ‌ 36 ൽ നിന്ന് 25 ശതമാനമായി കുറഞ്ഞുവെന്നാണ് ശ്രീധരൻ പിള്ള പറഞ്ഞത്. മുസ്ലിം ജനസംഖ്യ 3 ൽ നിന്ന് 12 ശതമാനമായും ഉയർന്നു. ഇതിൽ പോസിറ്റീവ് അന്വേഷണം നടത്തണമെന്ന് ​ഗോവ ആർച്ച് ബിഷപ്പിനോട് താൻ ആവശ്യപ്പെട്ടതായും ശ്രീധരൻ പിള്ള പറയുന്നു. പരാമർശത്തിൽ വിശദീകരണവും ശ്രീധരൻ പിള്ള നടത്തി. താനേതെങ്കിലും മതത്തെ ഉദ്ദേശിച്ച് പറഞ്ഞതല്ലെന്നും മതമേലധ്യക്ഷൻമാർ വന്നപ്പോൾ അവരോട് പറഞ്ഞത് മാത്രമാണെന്നുമാണ് വിശദീകരണം. ജനസംഖ്യാനുപാതമായി പറഞ്ഞതല്ലെന്നും ശ്രീധരൻ പിള്ള പറയുന്നു.

ഞാൻ ജനസംഖ്യാനുപാതികമായി പറഞ്ഞതല്ല, ഏതെങ്കിലും മതത്തെ ഉദ്ദേശിച്ച് പറഞ്ഞതല്ല, അവിടെ ഞാൻ പറഞ്ഞതിന്റെ കാരണം 35 ശതമാനത്തിന്റെയടുത്ത് ലിബറേഷന്റെ സമയത്ത് കത്തോലിക്കാ സമുദായമാണ് മെയിൻ ആയിട്ടുണ്ടായിരുന്നത്. അടുത്ത കാലത്ത് ഞാനൊരു ലേഖനം വായിച്ചു 26 ശതമാനമായി അത് ചുരുങ്ങി, അതിലും താഴെയാണ്.

അവിടത്തെ മതത്തിന്റെ പ്രധാനപ്പെട്ട ആളുകൾ എന്നെ കാണാൻ വരും ബിഷപ്പുമാർ വരും. അവരോട് ഇക്കാര്യം ഞാൻ പറഞ്ഞു. സംഖ്യ ഏത് മതത്തിന്റെയാണ്, പിന്നെ കൂടിയ ജനസംഖ്യയുള്ള മതം ഇപ്പോൾ കൂടി 12 ശതമാനമായെന്ന് പറയുന്നു. അത് പറാൻ കാരണം അവിടുത്തെ ആളുകളുടെ വിശ്വാസം പുറത്ത് നിന്ന് വരുന്നവരാണ് എന്നൊക്കെ വരുന്ന പ്രചാരണം ഉണ്ട് അതുകൊണ്ടാണ് പറഞ്ഞത്. യഥാർത്ഥ വസ്തുത എന്താണ്, എന്തുകൊണ്ട് ഇത് സംഭവിക്കുന്നു. അതിനെ പറ്റിയാണ് സൂചിപ്പിച്ചത്, അദ്ദേഹം പറയുന്നു.