'അമ്മ'യെ കുറിച്ച് ലേഖനം: പി വത്സലക്ക് വിമര്ശനം
കാഞ്ഞങ്ങാട്: മാത അമൃതാനന്ദമയിയെ പുകഴ്ത്തി ലേഖനമെഴുതിയ സാഹിത്യകാരി പി വത്സലക്ക് പുരോഗമന കലാ സാഹിത്യ സംഘത്തിന്റെ വിമര്ശനം. സംഘടനയുടെ മുന് സംസ്ഥാന വൈസ് പ്രസിഡന്റ് ആയിരുന്ന വത്സല അമൃതാനന്ദമയിയെ പുകഴ്ത്താന് പാടില്ലായിരുന്നു എന്നാണ് കാസര്കോട് ജില്ലാ ശില്പ ശാലയില് അഭിപ്രായമുയര്ന്നത്.
'തൊട്ടുണര്ത്താന് ഒരു ചെറുവില്' എന്ന പേരിലാണ് അമൃതാന്ദമയിയുടെ 60-ാം പിറന്നാള് ദിനത്തില് പി വത്സല മാതൃഭൂമിയില് ലേഖനമെഴുതിയത്. പുരോഗമന കലാസാഹിത്യ സംഘം കാസര്കോട് ജില്ലാ പ്രസിഡന്റ് ഇപി രാജഗോപാലനാണ് ശക്തമായ ഭാഷയില് വിമര്ശനമുമായി രംഗത്തെത്തിയത്. ശില്പശാലയില് അധ്യക്ഷതവഹിക്കുകയായിരുന്നു അദ്ദേഹം.
ഇക്കാലമത്രയും വത്സല നടത്തിയ പ്രവര്ത്തനങ്ങള്ക്ക് വിരുദ്ധമാണ് ലേഖനമെന്ന് രാജഗോപാലന് പറഞ്ഞു. നരേന്ദ്ര മോഡിയുടെ സന്ദര്ശന വേളയില് തന്നെ ആള്ദൈവ പിന്തുണയുമായി വത്സല രംഗത്തെത്തിയത് കേരളത്തിന് അപമാനമാണ്. കലാകാരന്മാര്ക്ക് വരുന്ന ഇത്തരം പിശകുകള് ചെറുതായി കാണാനാകില്ലെന്നും രാജഗോപാല് പ്രസംഗത്തില് പറഞ്ഞു.
ശില്പശാല ഉദ്ഘാടനം ചെയ്തത് കലാ സാഹിത്യ സംഘത്തിന്റെ സംസ്ഥാന ജനറല് സെക്രട്ടറി വിഎന് മുരളി ആയിരുന്നു. വത്സലയുടെ ലേഖനത്തെക്കുറിച്ച രാജഗോപാലന് പറഞ്ഞത് തന്നെയാണ് സംഘടനയുടെ അഭിപ്രായമെന്ന് വിഎന് മുരളിയും പറഞ്ഞു.