സിപിഎം ആരോപണങ്ങൾക്ക് മറുപടി; പുതുപ്പള്ളിയിലൂടെ ബൈക്ക് യാത്രയുമായി രാഹുലും വിഷ്ണുനാഥും

Updated: Sunday, September 3, 2023, 13:46 [IST]

കോട്ടയം: പുതുപ്പള്ളിയിലെ വികസനങ്ങൾ എണ്ണി പറഞ്ഞ് മണ്ഡലത്തിലൂടെ ബൈക്ക് യാത്രയുമായി കോൺഗ്രസ് നേതാവ് പിസി വിഷ്ണുനാഥ് എംഎൽഎയും യൂത്ത് കോൺഗ്രസ് നേതാവ് രാഹുൽ മാങ്കൂട്ടത്തിലും. മണ്ഡലത്തിലെ സുപ്രധാന പദ്ധതികൾ നടപ്പാക്കിയ പ്രദേശങ്ങളിലൂടെയാണ് നേതാക്കളുടെ ബൈക്ക് യാത്ര. ഇരുവരും യുഡിഎഫിന്റെ നേട്ടങ്ങൾ വിവരിക്കുന്ന വീഡിയോയും കോൺഗ്രസ് പുറത്തുവിട്ടിട്ടുണ്ട്. പുതുപ്പള്ളിയിൽ വികസന പ്രവർത്തനങ്ങൾ നടക്കുന്നില്ലെന്ന സി പി എം അടക്കമുള്ള പാർട്ടികളുടെ ആരോപണത്തിനുള്ള മറുപടിയാണ് വീഡിയോയെന്ന് ഇരുവരും പറഞ്ഞു.

'ഇവിടെ ഒരു വികസനവും നടക്കുന്നില്ല എന്ന് പ്രചരിപ്പിക്കുന്ന ആളുകൾക്ക് മറുപടി നൽകാനാണ് ഞങ്ങളുടെ യാത്ര. പ്രചരിപ്പിക്കുന്നതൊന്നും ശരിയല്ലെന്ന് ജനങ്ങളെ ബോധ്യപ്പെടുത്തുകയാണ് ലക്ഷ്യം. പല മേഖലയിലുള്ള ഉന്നത വിദ്യാഭ്യാസ സ്ഥാപനങ്ങൾ മണ്ഡലത്തിലെ എല്ലാ പഞ്ചായത്തുകളിലും ഉണ്ട്. പുതുപ്പുള്ളിയിൽ എംഎൽഎയായിരിക്കെ ഉമ്മൻചാണ്ടി എന്തൊക്കെ ചെയ്തുവെന്ന് ചർച്ചയാക്കാൻ ഒരു അവസരം നൽകിയതിന് സിപിഎമ്മുകാരോട് നന്ദിയുണ്ട്', നേതാക്കൾ പറഞ്ഞു.

അതേസമയം യുഡിഎഫ് സ്ഥാനാർത്ഥിയായ ചാണ്ടി ഉമ്മന്റെ ഫേസ്ബുക്ക് പേജിലും മണ്ഡലത്തിലെ വികസനങ്ങൾ പറഞ്ഞുള്ള പോസ്റ്റുകൾ പങ്കുവെച്ചിട്ടുണ്ട്. അകലക്കുന്നം പഞ്ചായത്തിലെ കാഞ്ഞിരമറ്റത്ത് സ്ഥാപിച്ച കെആർ നാരായണൻ ഫിലിം അക്കാദമിയെ കുറിച്ചാണ് ഒരു കുറിപ്പ്. '10 ഏക്കറോളം വിസ്തീർണ്ണമുള്ള ഈ ക്യാമ്പസ് ഓരോ പുതുപ്പള്ളിക്കാരനും അഭിമാനിക്കാവുന്ന നേട്ടമാണ്.ഉമ്മൻ ചാണ്ടിയുടെ കൈയ്യൊപ്പ് പതിഞ്ഞ ഉന്നത വിദ്യാഭ്യാസ മേഖലയിലെ പുതുപ്പള്ളി മോഡൽ ആണ് ഇത്', പോസ്റ്റിൽ ചാണ്ടി ഉമ്മൻ പറയുന്നു.

ആതുര ശുശ്രൂഷാരംഗത്ത് മറ്റൊരു മണ്ഡലത്തിനും അവകാശപ്പെടാനില്ലാത്ത നേട്ടം പുതുപ്പള്ളിക്കുണ്ടെന്നും ടെ വ്യവസായിക വളർച്ചയ്ക്ക് ഊർജ്ജം പകരുന്ന നിരവധി സ്ഥാപനങ്ങളാണ് മണ്ഡലത്തിൽ ഉമ്മൻ ചാണ്ടിയുടെ നേതൃത്വത്തിൽ ആരംഭിച്ചതെന്നും പോസ്റ്റിൽ പറയുന്നു.

പാമ്പാടി ഇന്ത്യൻ ഇൻസ്റ്റിറ്റ്യൂട്ട് ഓഫ് മാസ്സ് കമ്മ്യൂണിക്കേഷൻസ് ,രാജീവ് ഗാന്ധി ഇൻസ്റ്റിറ്റ്യൂട്ട് ഓഫ് ടെക്നോളജി,പയ്യപ്പാടി IHRD ക്യാമ്പസിലെ ആധുനിക നിലവാരത്തിലുള്ള സിന്തെറ്റിക്ക്‌ കോർട്ട് എന്നിവയെ കുറിച്ചും ഫേസ്ബുക്കിൽ പങ്കുവെച്ചിട്ടുണ്ട്.

അതേസമയം കാലത്തിന് അനുസൃതമായ വികസം മണ്ഡലത്തിൽ ഉണ്ടായിട്ടില്ലെന്ന് ആവർത്തിക്കുകയാണ് എൽഡിഎഫ് സ്ഥാനാർത്ഥി ജെയ്ക്ക് സി തോമസ്. പുതുപ്പള്ളിക്കാരുടെ ജീവിതത്തിന്റെ സർവ്വ മേഖലയിലും ഉയർച്ച ഉറപ്പാക്കണം, പുതിയ പുതിയ പദ്ധതികൾ ഉയരണം, അടിസ്ഥാന സൗകര്യങ്ങൾ വളരണം, പുതുപ്പള്ളിയിൽ വികസനം വരണം. എൽഡിഎഫിലൂടെയെ ഇത് സാധ്യമാകൂവെന്നും ജെയ്ക്ക് പറയുന്നു.