പുറ്റിംഗല്‍ ദുരന്തം: തീപ്പൊരി വീണ അമിട്ടുമായി വെടിക്കെട്ട് തൊഴിലാളി കന്പപ്പുരയില്‍ കയറി? വീഡിയോ

Updated: Monday, April 11, 2016, 16:18 [IST]

കൊല്ലം: പരവൂര്‍ പുറ്റിംഗല്‍ ക്ഷേത്രത്തിലെ വെടിക്കെട്ട് ദുരന്തത്തിന് കാരണമായത് വെടിക്കെട്ട് തൊഴിലാളിയുടെ അശ്രദ്ധയാണെന്ന് സൂചന നല്‍കുന്ന വീഡിയോ പുറത്ത്. തീപ്പൊരി വീണ അമിട്ടുമായി തൊഴിലാളി കമ്പപ്പുരയിലേയ്ക്ക് ഓടിക്കയറിയതാകാം അപകടത്തിന് കാരണമെന്ന് സൂചന. ഇത്തരത്തില്‍ തൊഴിലാളിയുടെ ദൃശ്യം ഉള്‍പ്പടെ മാര്‍ക്ക് ചെയ്ത വീഡിയോ ഏഷ്യാനെറ്റ് ന്യൂസ് പുറത്ത് വിട്ടു.

ദുരന്തത്തില്‍ തകര്‍ന്ന തെക്കേ കമ്പപ്പുര ക്ഷേത്രത്തിന്റെ വലത് ഭാഗത്താണ്. ഇവിടെ നിന്ന് 20 മീറ്ററോളം ദൂരം മാത്രമേ കമ്പത്തറയിലേയ്ക്കുള്ള ദൂരം. കമ്പപ്പുരയ്ക്ക് അകത്തും പുറത്തും ആളുകള്‍ കൂടി നില്‍ക്കുന്നത് വീഡിയോയില്‍ വ്യക്തമാണ്. ഓരോ അമിട്ട് പൊട്ടി തീരുമ്പോഴും അടുത്ത അമിട്ടുമായി വെടിക്കെട്ടുകാര്‍ കമ്പത്തറയിലേയ്ക്ക് പോകുന്നത് ദൃശ്യങ്ങളില്‍ വ്യക്തമാണ്.

ഏഷ്യാനെറ്റ് ന്യൂസ് വീഡിയോയില്‍ ഇക്കാര്യം മാര്‍ക്ക് ചെയ്യുന്നുമുണ്ട്. ഒരു അമിട്ട് പൊട്ടി തീപ്പൊരി താഴേയ്ക്ക് വീഴുമ്പോള്‍ അടുത്ത അമിട്ടുമായി കമ്പത്തറയിലേയ്ക്ക് പോയ തൊഴിലാളി കൈയ്യിലുള്ള അമിട്ടില്‍ തീപ്പൊരി വീഴാതിരിയ്ക്കാന്‍ പിന്തിരിഞ്ഞോടുന്നത് ദൃശ്യങ്ങളില്‍ കാണാം. ഇതിന് പിന്നാലെയാണ് കമ്പപ്പുര പൊട്ടിത്തെറിച്ചത്. കൈയ്യിലുള്ള അമിട്ടില്‍ തീപ്പൊരി വീണത് അറിയാതെ ഇയാള്‍ കമ്പപ്പുരയിലേയ്ക്ക് ഓടിക്കയറിയതാകാം അപകടത്തിന് കാരണമായതെന്നാണ് പ്രാഥമിക സൂചനയെന്നും ഏഷ്യാനെറ്റ് ന്യൂസിന്റെ വീഡിയോയില്‍ പറയുന്നു.