''ഇഞ്ചി കൃഷിയൊക്കെ ഒരു അത്ഭുതമായി തോന്നുന്നത് ഇപ്പോഴാണ്'', ഷാജിയെ ട്രോളി പിവി അൻവർ

Updated: Tuesday, April 13, 2021, 10:21 [IST]

കോഴിക്കോട്: വിജിലന്‍സ് റെയ്ഡിന്റെ പശ്ചാത്തലത്തില്‍ മുസ്ലീം ലീഗ് എംഎല്‍എ കെഎം ഷാജിയെ പരിഹസിച്ച് നിലമ്പൂര്‍ എംഎല്‍എ പിവി അന്‍വര്‍. ഫേസ്ബുക്കിലാണ് ഷാജിയെ ട്രോളി അന്‍വര്‍ രംഗത്ത് വന്നിരിക്കുന്നത്. ഇഞ്ചി കൃഷിയൊക്കെ ഒരു അത്ഭുതമായി തോന്നുന്നത് ഇപ്പോഴാണ് എന്നാണ് പിവി അന്‍വര്‍ ഫേസ്ബുക്കില്‍ കുറിച്ചത്.

നേരത്തെ കെഎം ഷാജിക്കെതിരെ അനധികൃത സ്വത്ത് സമ്പാദനവുമായി ബന്ധപ്പെട്ട് ആരോപണം ഉയര്‍ന്നപ്പോള്‍ തനിക്ക് ഇഞ്ചിക്കൃഷി ഉള്ളതായും അത് വഴിയാണ് പണം സമ്പാദിച്ചത് എന്നും കെഎം ഷാജി പ്രതികരിച്ചിരുന്നു. ഇത് ഓര്‍മ്മപ്പെടുത്തിയാണ് പിവി അന്‍വറിന്റെ പരിഹാസം. കണ്ണൂരിലെ കെഎം ഷാജിയുടെ വീട്ടില്‍ നിന്നും കണക്കില്‍ പെടാത്ത അരക്കോടിയോളം രൂപ വിജിലന്‍സ് റെയ്ഡില്‍ പിടിച്ചെടുത്തതായാണ് റിപ്പോര്‍ട്ടുകള്‍.

വിജിലന്‍സ് റെയ്ഡ് നടക്കുമ്പോള്‍ കെഎം ഷാജി വീടിന് പുറത്ത് ചായ കുടിച്ച് കൊണ്ട് നില്‍ക്കുന്ന ചിത്രങ്ങള്‍ പുറത്ത് വന്നിരുന്നു. മുസ്ലീം ലീഗിന്റെയും കോണ്‍ഗ്രസിന്റെയും അണികള്‍ ഈ ചിത്രം ആഘോഷിക്കുകയും ചെയ്തിരുന്നു. '' വീട്ടിൽ വിജിലൻസ് റെയ്ഡ്, വീട്ടുകാരൻ കൂളായി ചായ കുടിക്കുന്നു. ഇതു കൊണ്ടാണ് K M ഷാജിയെ ആളുകൾ പോരാളിയെന്ന് വിളിക്കുന്നതും, KT ജലീലിനെ പരിഹസിക്കുന്നതും....'' എന്നാണ് കെഎം ഷാജിയുടെ ചിത്രം പങ്കുവെച്ച് കൊണ്ട് കെഎസ്യു നേതാവായ രാഹുല്‍ മാങ്കൂട്ടത്തില്‍ പ്രതികരിച്ചത്. ഈ ചിത്രത്തേയും പിവി അന്‍വര്‍ കണക്കിന് ട്രോളിയിട്ടുണ്ട്..

താന്‍ ചായ കുടിക്കുന്ന ഒരു ചിത്രമാണ് പിവി അന്‍വര്‍ പോസ്റ്റ് ചെയ്തിരിക്കുന്നത്. ചായ, ചായ ഇഞ്ചിയിട്ട ചായ എന്നുളള അടിക്കുറിപ്പും ചിത്രത്തിന് നല്‍കിയിട്ടുണ്ട്. ഷാജി വിരുദ്ധര്‍ ഈ ചിത്രവും ട്രോളും ആഘോഷമാക്കിയിരിക്കുകയാണ്. അതിനിടെ 15 മണിക്കൂര്‍ നീണ്ട റെയ്ഡ് വിജിലന്‍സ് സംഘം അവസാനിപ്പിച്ചു. വിജിലന്‍സ് തന്നെ മനപ്പൂര്‍വ്വം കുടുക്കുകയാണ് എന്നാണ് കെഎം ഷാജിയുടെ ആരോപണം. പിടിച്ചെടുത്ത പണം തിരഞ്ഞെടുപ്പ് ആവശ്യങ്ങള്‍ക്ക് ഉളളതായിരുന്നുവെന്നും അത് വിജിലന്‍സിന് തിരികെ തരേണ്ടി വരുമെന്നും ഷാജി പ്രതികരിച്ചു.