അനൂപ് ജേക്കബിന്റെ വകുപ്പില്‍ വന്‍ അഴിമതിയെന്ന് ബാലകൃഷ്ണപിള്ള

തിരുവനന്തപുരം: ഭക്ഷ്യ സിവില്‍ സപ്ലൈസ് വകുപ്പില്‍ ജീവനക്കാരെ നിയമിച്ചതില്‍ വന്‍ അഴിമതിയുണ്ടെന്ന് കേരള കോണ്‍ഗ്രസ് ബി ചെയര്‍മാന്‍ ആര്‍. ബാലകൃഷ്ണപിള്ള. ഡ്രൈവര്‍ തസ്തിക മുതലുള്ള നിയമനത്തില്‍ അഴിമതിയാണെന്ന് ബാലകൃഷ്ണപിള്ള ആരോപിച്ചു. കണ്‍സ്യൂമര്‍ കോടതിയിലേയ്ക്കു ജീവനക്കാരെ നിയമിച്ചതിലും അഴിമതി നടന്നിന്നെന്ന് അദ്ദേഹം വ്യക്തമാക്കി.

യുഡിഎഫില്‍ ഉള്ളപ്പോള്‍ തന്നെ ഇക്കാര്യത്തില്‍ പരാതി ഉന്നയിച്ചിരുന്നു. എന്നാല്‍ യാതൊരു നടപടിയും സര്‍ക്കാരിന്റെ ഭാഗത്തുനിന്നും ഉണ്ടായിട്ടില്ല. അഴിമതി സംബന്ധിച്ച വിവരങ്ങളെല്ലാം വിജിലന്‍സിന് കൈമാറും. ആന കരിമ്പിന്‍ തോട്ടത്തില്‍ കയറിയതുപോലെയാണ് അനൂപ് ജേക്കബിന്റെ വകുപ്പെന്ന് പിള്ള പരിഹസിച്ചു.

അഴിമതിയില്‍ മുങ്ങിക്കുളിച്ചിരിക്കുകയാണ് അനൂപിന്റെ വകുപ്പ്. മന്ത്രിസഭയിലെ ഏറ്റവും വലിയ അഴിമതിക്കാരന്‍ അനൂപാണ്. ജോണി നെല്ലൂര്‍ തന്നെ അനൂപിനെക്കുറിച്ച് പറഞ്ഞിരുന്നു. വിജിലന്‍സ് കേസ് ഏറ്റവും കൂടുതലുള്ളതും അനൂപിനെതിരെയാണെന്നും ബാലകൃഷ്ണപിള്ള ചൂണ്ടിക്കാട്ടി. അരുവിക്കരയില്‍ എല്‍ഡിഎഫിന് വോട്ടുചെയ്യുമെന്ന പറഞ്ഞ ബാലകൃഷ്്ണ പിള്ള ബുധനാഴ്ച എല്‍.ഡി.എഫ് നടത്തുന്ന ഉപരോധ സമരത്തെ അഭിവാദ്യം ചെയ്യുമെന്നും അറിയിച്ചു.

കണ്‍സ്യൂമര്‍ ഫെഡില്‍ ജഡ്ജിമാരെ നിയമിക്കുന്നതില്‍ അഴിമതിയുണ്ടെന്ന് കാട്ടി ബാലകൃഷ്ണ പിള്ള അനൂപ് ജേക്കബിനെതിരെ വിജിലന്‍സില്‍ പരാതി നല്‍കിയിരുന്നു. എന്നാല്‍, ബാലകൃഷ്ണ പിള്ള പറഞ്ഞയാളെ നിയമിക്കാത്തതിനെ തുടര്‍ന്നാണ് തനിക്കെതിരെ ആരോപണം ഉന്നയിക്കുന്നതെന്നാണ് അനൂപ് ജേക്കബ് പ്രതികരിച്ചത്.

English summary

R Balakrishna pillai against Anoop Jacob