രാധാകൃഷ്ണന്റെ ഭീഷണി ജനാധിപത്യത്തോടുള്ള വെല്ലുവിളി: ആനാവൂര്‍ നാഗപ്പന്‍

തിരുവനന്തപുരം: മുഖ്യമന്ത്രിയ്‌ക്കെതിരായ ബിജെപി നേതാവ് രാധാകൃഷ്ണന്റെ ഭീഷണി ജനാധിപത്യത്തോടുള്ള വെല്ലുവിളിയെന്ന് സിപിഎം തിരുവനന്തപുരം ജില്ലാ സെക്രട്ടറി ആനാവൂര്‍ നാഗപ്പന്‍. ബിജെപിയുടെ കുഴൽപ്പണ കടത്തുമായി ബന്ധപ്പെട്ട അന്വഷണം പുരോഗമിക്കുമ്പോൾ രാജ്യം ഭരിക്കുന്ന പാർട്ടിയുടെ സംസ്ഥാന പ്രസിഡന്റ് ഉൾപ്പെടെ അന്വഷണ പരിധിയിൽ വരുന്നതിൽ വിറളിപിടിച്ചിരിക്കുകയാണ് ബിജെപി നേതൃത്വം. അതിന്റെ പ്രതിഫലനമാണ് ഇന്ന് ബിജെപി നേതാവ് എ. എൻ രാധാകൃഷ്‌ണൻ കേരളത്തിന്റെ പ്രിയങ്കരനായ മുഖ്യമന്ത്രിയ്ക്കും കുടുംബത്തിനും നേരെ ഉയർത്തിയ ഭീഷണിയെന്നും അദ്ദേഹം പറഞ്ഞു.

ഇത് ജനാധിപത്യത്തോടുള്ള വെല്ലുവിളിയും ഭീഷണിയുമാണ്. തങ്ങൾ എന്ത് വൃത്തികേടും കാണിയ്ക്കും, എന്ത് രാജ്യദ്രോഹ പ്രവർത്തനവും നടത്തും അതൊന്നും അന്വഷിക്കാനോ നടപടിയെടുക്കാനോ തുനിയരുത് , അങ്ങനെ ചെയ്‌താൽ സംസ്ഥാന മുഖ്യമന്ത്രിയേയും കുടുംബാംഗങ്ങളെയും കള്ളക്കേസിൽ കുടുക്കി ജയിലിൽ അടച്ചുകളയും എന്ന ഭീഷണിയാണ് എ.എൻ രാധാകൃഷ്ണൻ ഇന്ന് ഉയർത്തിയത്.

വെടിക്കെട്ട് കാരനെ ഉടുക്ക് കൊട്ടി പേടിപ്പിക്കരുതെന്നാണ് രാധാകൃഷ്ണനോട് പറയാനുള്ളത്. ഒരുപാട് കേസുകളും , അതിരൂക്ഷമായ പോലീസ് മർദ്ദനവും, മാധ്യമങ്ങളുടെ നിഷ്ടൂരമായ നുണപ്രചാരണവും എല്ലാം നേരിട്ടാണ് പിണറായി വിജയനെന്ന കമ്മ്യൂണിസ്റ്റുകാരൻ ഇന്ന് മുഖ്യമന്ത്രി കസേരയിൽ ഇരിക്കുന്നത്. കേരളത്തിലെ സാധാരണ ജനങ്ങൾക്ക് വേണ്ടിയുള്ള എണ്ണമറ്റ പോരാട്ടങ്ങൾ നിശ്ചയദാർഢ്യത്തോടെ നയിച്ചതിന്റെ പാരമ്പര്യം ഉള്ള ആളാണ് സ . പിണറായി വിജയൻ.

ആ ചുട്ടുപൊള്ളുന്ന സമരാനുഭവങ്ങളുടെ തീച്ചൂളയിൽ നിന്നും ആർജ്ജിച്ച കരുത്തിന്റെ പേര് കൂടിയാണ് പിണറായി വിജയൻ. അദ്ദേഹത്തിന് നേരെയാണ് സൂര്യനെ നോക്കി കുരയ്ക്കുന്ന ശ്വാനന്റെ ആക്രോശം പോലെ ദുർബലമായ ഭീഷണിയുമായി ബിജെപി നേതാവ് പ്രസംഗിക്കുന്നത്. രാധാകൃഷ്ണന്റെയും ബിജെപിയുടെയും ശരിയായ മുഖം തിരിച്ചറിയാൻ കേരളത്തിന് ഇതൊരു അവസരം കൂടിയാണ്. ഈ നാട് അത് തിരിച്ചറിയും എന്ന കാര്യത്തിൽ സംശയമില്ലെന്നും അദ്ദേഹം കൂട്ടിച്ചേര്‍ക്കുന്നു.

English summary

Radhakrishnan's statement threat to democracy: cpm leader Anavoor Nagappan