സിദ്ധരാമയ്യ ഒന്നും അറിഞ്ഞിരുന്നില്ല!! മദനിയുടെ സുരക്ഷയ്ക്ക് വൻതുക ആവശ്യപ്പെട്ടത് പോലീസ്!!
മദനിക്ക് സുരക്ഷ ഒരുക്കാൻ വൻ തുക ആവശ്യപ്പെട്ട് കത്ത് നൽകിയത് ബെംഗളൂരു സിറ്റി പോലീസ് കമ്മീഷ്ണറാണെന്ന് ചെന്നിത്തല പറഞ്ഞു.
മലപ്പുറം: അബ്ദുൾ നാസർ മദനിക്ക് കേരളത്തിൽ സുരക്ഷയൊരുക്കാൻ വൻ തുക ആവശ്യപ്പെട്ടതിൽ കർണാടക മുഖ്യമന്ത്രിക്ക് പിന്തുണയുമായി പ്രതിക്ഷ നേതാവ് രമേശ് ചെന്നിത്തല. മദനിക്ക് സുരക്ഷ ഒരുക്കാൻ വൻ തുക ആവശ്യപ്പെട്ട് കത്ത് നൽകിയത് ബെംഗളൂരു സിറ്റി പോലീസ് കമ്മീഷ്ണറാണെന്ന് ചെന്നിത്തല പറഞ്ഞു.
ഇതേപ്പറ്റി സിദ്ധരാമയ്യയ്ക്ക് അറിവില്ലായിരുന്നുവെന്നും ചെന്നിത്തല പറയുന്നു. ഇക്കാര്യം താൻ ചോദിച്ചപ്പോഴായിരുന്നു സിദ്ധരാമയ്യ അറിയുന്നതെന്നും ചെന്നിത്തല. തുകയുടെ കാര്യത്തിൽ കുറവ് വരുത്താമെന്ന് മുഖ്യമന്ത്രിയുടെ ഓഫീസ് തന്നെ അറിയിച്ചെന്നും ചെന്നിത്തല പറയുന്നു.
കേരളത്തിലെത്തുന്ന മദനിയുടെ സുരക്ഷാ ചെലവായി 14.80 രൂപ നൽകണമെന്നാണ് ബെംഗളൂരു സിറ്റി പോലീസ് ആവശ്യപ്പെട്ടത്. പോലീസ് അകമ്പടിക്കും മറ്റു ചിലവുകൾക്കുമാണ് ഈ തുക. ഇതുകൂടാതെ അനുഗമിക്കുന്ന പോലീസ് ഉദ്യോഗസ്ഥരുടെ വിമാനയാത്രാ ചിലവും വഹിക്കണമെന്നും കർണാടക പോലീസ് അറിയിച്ചിരുന്നു. അതേസമയം ഇത്രയും തുക കെട്ടിവച്ച് കേരളത്തിൽ പോകേണ്ടെന്നാണ് മദനിയുടെ തീരുമാനം.
അതേസമയം ഭീമമായ തുക ആവശ്യപ്പെട്ട നടപടിക്കെതിരെ സുപ്രീംകോടതി രംഗത്തെത്തി. വിചാരണത്തടവുകാരുടെ സുരക്ഷയും മറ്റും സംസ്ഥാനത്തിന്റെ ചുമതലയാണെന്നാണ് സുപ്രീംകോടതി വ്യക്തമാക്കിയിരിക്കുന്നത്.