വേടനും നഞ്ചിയമ്മയും പിണറായി വിജയനൊപ്പം ഒരു വേദിയില്‍; കൈയടിയും വിമര്‍ശനവും

പാലക്കാട്: സംസ്ഥാന സര്‍ക്കാരിന്റെ പരിപാടിയില്‍ റാപ്പര്‍ വേടനും നഞ്ചിയമ്മയും ഒരുമിച്ച് എത്തിയ സന്തോഷത്തിലാണ് ആരാധകര്‍. പട്ടികജാതി-പട്ടികവര്‍ഗ സംസ്ഥാനതല സംഗമത്തിലാണ് ഇരുവരും പങ്കെടുത്തത്. രണ്ടാം പിണറായി സര്‍ക്കാരിന്റെ നാലാം വാര്‍ഷികാഘോഷത്തിന്റെ ഭാഗമായിട്ടാണ് സംഗമം സംഘടിപ്പിച്ചത്. മുഖ്യമന്ത്രിയായിരുന്നു സംഗമത്തിലെ മുഖ്യാതിഥി.

പാലക്കാട് മലമ്പുഴയില്‍ നടന്ന ഈ ചടങ്ങില്‍ പങ്കെടുക്കുന്നതിനായാണ് അട്ടപ്പാടിയില്‍ നിന്ന് നഞ്ചിയമ്മയും തൃശൂര്‍ സ്വദേശിയായ വേടനും എത്തിയത്. വലിയ സ്‌നേഹത്തോടെ ഹിരണ്‍ദാസ് മുരളി എന്ന വേടനും നഞ്ചിയമ്മയും സംസാരിക്കുന്ന വീഡിയോ സമൂഹ മാധ്യമങ്ങളില്‍ വൈറലായി മാറിയിരിക്കുകയാണ്. വേടനും നഞ്ചിയമ്മയും ഉള്‍പ്പെടെ 1200 പേരാണ് സംഗമത്തില്‍ പങ്കെടുത്തത്. അതേസമയം വേടനെ ക്ഷണിച്ചതില്‍ വിമര്‍ശനങ്ങളും ഉയരുന്നുണ്ട്.

മുഖ്യമന്ത്രിയുടെ പരിപാടിക്ക് ആളെ കൂട്ടാന്‍ വേണ്ടിയാണ് വേടനെ ക്ഷണിച്ചത് എന്നാണ് സമൂഹ മാധ്യമങ്ങളില്‍ വിമര്‍ശനം ഉയരുന്നത്. എന്നാല്‍ ജാതി വിവേചനത്തിനെതിരേ ശബ്ദമുയര്‍ത്തുന്ന വേടനെയും നഞ്ചിയമ്മയെയും ഒന്നിച്ച് കണ്ട സന്തോഷവും നിരവധി പേര്‍ പങ്കുവയ്ക്കുന്നുണ്ട്. വേദിയിലേക്കെത്തിയ മുഖ്യമന്ത്രി വേടനും നഞ്ചിയമ്മയുമായി കുശലം പറയുകയും ചെയ്തു. വേടനും നഞ്ചിയമ്മയും സംസാരിക്കുന്ന വീഡിയോ സമൂഹ മാധ്യമങ്ങളില്‍ വൈറലായി പ്രചരിക്കുന്നുണ്ട്. സംഗമത്തോടനുബന്ധിച്ച് വേടന്റെ സംഗീത പരിപാടിയും സംഘടിപ്പിച്ചിരുന്നു.

ലഹരി പിടികൂടിയ കേസിലും പുലിപ്പല്ല് കേസിലും ഉള്‍പ്പെട്ട വേടനെ സര്‍ക്കാര്‍ പരിപാടിയില്‍ ക്ഷണിച്ചതിന്റെ പ്രതിഷേധവും ചിലര്‍ കമന്റ് ബോക്‌സില്‍ അറിയിക്കുന്നുണ്ട്. വേടനെ അറസ്റ്റ് ചെയ്തതും വേദി പങ്കിടുന്നതും ഒരേ സര്‍ക്കാര്‍ തന്നെയെന്ന് വിമര്‍ശിക്കുന്നവരും കുറവല്ല. തൊപ്പിയെ കൂടി വിളിക്കാമായിരുന്നു എന്ന് അഭിപ്രായപ്പെടുന്നവരുമുണ്ട്.

അയ്യപ്പനും കോശിയും എന്ന ചിത്രത്തിലൂടെയാണ് നഞ്ചിയമ്മ പ്രശസ്തിയിലേക്ക് ഉയര്‍ന്നത്. നഞ്ചിയമ്മ പാടിയ കലക്കാത്ത സന്തനമേരം എന്ന ഗാനം കേരളം മൊത്തം ഏറ്റുപാടി. ഈ ഗാനത്തിലൂടെ മികച്ച ഗായികയ്ക്കുള്ള ദേശീയ പുരസ്‌കാരവും നഞ്ചിയമ്മ നേടി. നഞ്ചിയമ്മയുടെ തന്നെ സ്വന്തം വരികളും ഈണവുമാണ് ഗാനത്തിന് നല്‍കിയത്. അട്ടപ്പാടിയിലെ ഇരുള ഗോത്ര വിഭാഗത്തില്‍ നിന്നാണ് നഞ്ചിയമ്മ പ്രശസ്തിയിലേക്ക് ഉയരുന്നത്. സംസ്ഥാന ചലച്ചിത്ര പുരസ്‌കാരത്തില്‍ പ്രത്യേക ജൂറി അവാര്‍ഡും നഞ്ചിയമ്മയ്ക്കുണ്ടായിരുന്നു.

പുലിപ്പല്ല് കേസില്‍ അറസ്റ്റലായ വേടന്‍ ജാമ്യം ലഭിച്ചതിനു പിന്നാലെ താന്‍ തെറ്റുകള്‍ ആവര്‍ത്തിക്കില്ലെന്ന് മാധ്യമങ്ങള്‍ക്കു മുന്നില്‍ വ്യക്തമാക്കിയിരുന്നു. ഇതോടെ വേടനെതിരേയുള്ള വിമര്‍ശനങ്ങള്‍ പിന്തുണയായി മാറുകയും ചെയ്തു. ജാതി രാഷ്ട്രീയത്തിനെതിരേ പാട്ടിലൂടെയുള്ള പോരാട്ടം വേടന്‍ തുടരണമെന്ന് ആശംസിക്കുന്നവരും നിരവധിയാണ്.