ആദ്യഭാര്യയുടെ കൊല: ബിജുവും അമ്മയും കുറ്റക്കാര്
കൊല്ലം: സോളാര് തട്ടിപ്പ് കേസിലെ മുഖ്യപ്രതി ബിജു രാധാകൃഷ്ണന്റെ ആദ്യ ഭാര്യ രശ്മി കൊല്ലപ്പെട്ട കേസില് ബിജു രാധാകൃഷ്ണന് കുറ്റക്കാരനാണെന്ന് കോടതികണ്ടെത്തി. കൊല്ലം അഡീഷനല് സെഷന്സ് കോടതി കണ്ടെത്തിയാണ് വിധി പ്രഖ്യാപിച്ചത്. കേസില് ബിജു രാധാകൃഷ്ണനൊപ്പം അമ്മ രാജമ്മാളും കുറ്റക്കാരിയാണ്. ശിക്ഷ വെള്ളിയാഴ്ച വിധിക്കും
2006 ഫെബ്രുവരി 4നാണ് കേസിനാസ്പദമായ സംഭവം. ബിജുവിന്റെ കുളക്കടയിലെ വീട്ടില് രശ്മിയെ കൊല്ലപ്പെട്ടനിലയില് കണ്ടെത്തുകയായിരുന്നു. ബലമായി മദ്യം നല്കിയ ശേഷം ശ്വാസം മുട്ടിച്ചുകൊല്ലുകയായിരുന്നെന്നാണ് പ്രോസിക്യൂഷന് വാദം. എന്നാല് രശ്മി കുളുമുറിയില് കുഴഞ്ഞുവീണു മരിക്കുകയാണെന്നാണ് വിചാരണ വേളയില് ബിജു കോടതിയില് പറഞ്ഞത്. അമിതമായി മദ്യം കഴിക്കുമായിരുന്ന രശ്മി ഇക്കാരണത്താലാണ് മരിച്ചതെന്നും പ്രതിഭാഗം വാദിച്ചു.
കേസില് മൂന്ന് വയസ്സ് മാത്രം പ്രായമുണ്ടായിരുന്ന ഇവരുടെ മകനാണ് ഏക സാക്ഷി. കൊലപാതകം, പീഡനം, തെളിവ് നശിപ്പിക്കല്, സാക്ഷിയായ മകനെ മര്ദ്ദിച്ചു തുടങ്ങിയ കുറ്റങ്ങളാണ് ബിജുവിനെതിരെ ചുമത്തിയിരിക്കുന്നത്. അമ്മ രാജമ്മാളിനെതിരെ കൊലപാതകത്തിന് കൂട്ടുനില്ക്കല്, സ്ത്രീ പീഡനം തുടങ്ങിയ കുറ്റങ്ങളും ചുമത്തി. കേസില് സരിത എസ് നായരെ പ്രതിച്ചേര്ക്കണമെന്ന് ആവശ്യം കോടതി നിരസിച്ചു.