ദുരിതാശ്വാസ നിധി: സമ്മതപത്രം നൽകാത്തവരിൽനിന്ന് ശമ്പളം പിടിക്കില്ല; തിരുത്തി സർക്കാർ
തിരുവനന്തപുരം: സമ്മതപത്രം നൽകിയിട്ടില്ലാത്ത ജീവനക്കാരുടെ ശമ്പളത്തിൽ നിന്ന് മുഖ്യമന്ത്രിയുടെ ദുരിതാശ്വാസ നിധിയിലേക്ക് തുക പിടിക്കില്ലെന്ന് ധനവകുപ്പ് അഡീഷണൽ ചീഫ് സെക്രട്ടറി അറിയിച്ചു. സമ്മതപത്രം നൽകാത്തവർക്ക് പി എഫ് ലോൺ അപേക്ഷ നൽകുന്നതിന് സ്പാർക്കിൽ നിലവിൽ തടസങ്ങളില്ലെന്നും അദ്ദേഹം അറിയിച്ചു. വിഷയത്തിൽ വലിയ പ്രതിഷേധം ഉയർന്നതിന് പിന്നാലെയാണ് സർക്കാരിന്റെ തിരുത്ത്.
വയനാട് ദുരന്തത്തിന്റെ പശ്ചാത്തലത്തിൽ മുഖ്യമന്ത്രിയുടെ ദുരിതാശ്വാസ നിധിയിലേക്ക് ജീവനക്കാർ അഞ്ച് ദിവസത്തെ വേതനം നൽകണമെന്ന് സർക്കാർ നിർദ്ദേശിച്ചിരുന്നു.സാലറി ചലഞ്ചിന് സമ്മതപത്രം നല്കാത്തവര്ക്ക് പ്രൊവിഡന്റ് ഫണ്ടില്നിന്ന് വായ്പയെടുക്കാന് സാധിക്കില്ലെന്നും മുന്നറിയിപ്പുണ്ടായിരുന്നു. ജീവനക്കാരുടെ വിവരങ്ങൾ ഉള്ള സ്പാർക്ക് സോഫ്റ്റ് വെയറിലും ഇത് സംബന്ധിച്ച് മാറ്റങ്ങൾ വരുത്തിയിരുന്നു. എന്നാൽ സർക്കാർ നിലപാടിനെതിരെ ശക്തമായ പ്രതിഷേധമാണ് ഉയർന്നത്.
വിഷയത്തില് പ്രത്യക്ഷ സമരത്തിലേക്ക് നീങ്ങുമെന്ന് കോണ്ഗ്രസ് അനുകൂല സംഘടന വ്യക്തമാക്കിയിരുന്നു. അഞ്ചുദിവസമെന്ന നിബന്ധന ഒഴിവാക്കണമെന്നായിരുന്ന സംഘടനകൾ വ്യക്തമാക്കിയത്.
ഉരുള്പൊട്ടല് ദുരന്തബാധിതരുടെ താത്കാലിക പുനരധിവാസം പൂര്ത്തിയായി
ഇന്ന് ഉച്ചയോടെ വെള്ളരിമല സ്വദേശി എ. നാസര് കൂടി മേപ്പാടിയിലെ വാടക വീട്ടിലേക്ക് മാറിയതോടെ ക്യാമ്പിലുണ്ടയിരുന്ന 728 കുടുബങ്ങള്ക്കും താമസിക്കാനിടമായതായി വയനാട് ജില്ലാ കലക്ടർ. സര്ക്കാര് ക്വാര്ട്ടേഴ്സുകള്, സര്ക്കാര് സ്പോണ്സര് ചെയ്ത വാടകവീടുകള്, ദുരന്തബാധിതര് സ്വന്തം നിലയില് കണ്ടെത്തിയ വാടകവീടുകള്, ബന്ധുവീടുകള്, സ്വന്തം വീടുകള് എന്നിവിടങ്ങളിലേക്ക് 2569 പേരാണ് ദുരിതാശ്വാസ ക്യാമ്പുകളില് നിന്നും മാറിതാമസിച്ചത്. ഇവരുടെ താമസ സ്ഥലങ്ങളില് 'ബാക്ക് ടു ഹോം കിറ്റുകളും' ജില്ലാ ഭരണകൂടം എത്തിച്ചു വരികയാണ്. ഫര്ണിച്ചര് കിറ്റ്, ഷെല്ട്ടര് കിറ്റ്, കിച്ചണ് കിറ്റ്, ക്ലീനിങ് കിറ്റ്, പേഴ്സണല് ഹൈജീന് കിറ്റ്, ഭക്ഷണസാമഗ്രികളുടെ കിറ്റ് എന്നിവയുള്പ്പെടെയാണ് ബാക്ക് ടു ഹോം കിറ്റുകളില് ഉള്ക്കൊള്ളിച്ചിരിക്കുന്നത്.
ദുരന്തബാധിതരായ കുടുംബത്തിലെ തൊഴിൽരഹിതരായ ഒരാൾക്ക് പ്രതിദിനം 300 രൂപ വീതം പരമാവധി രണ്ട് പേർക്ക് പ്രതിമാസം 18000 രൂപ ധനസഹായം നൽകും. ഇതുകൂടാതെ സര്ക്കാര് പ്രഖ്യാപിച്ച 6000 രൂപ മാസ വാടകയും നല്കും. താല്ക്കാലികമായി പുനരധിവസിപ്പിച്ചവര്ക്ക് എന്തെങ്കിലും തരത്തിലുള്ള ബുദ്ധിമുട്ടുകളുണ്ടെങ്കില് അടിയന്തരമായി പരിഹരിക്കും. അന്തിമ പുനരധിവാസം സര്വതല സ്പര്ശിയായ രീതിയിലാണ് സര്ക്കാര് വിഭാവനം ചെയ്യുന്നത്. ജനങ്ങള് പങ്ക് വെച്ച നിര്ദേശങ്ങള് കൂടി പരിഗണിച്ചാവും പുനരധിവാസ പാക്കേജിന് രൂപം നല്കുക.
Click it and Unblock the Notifications
Sign in with Google