രേണുവിനോടൊപ്പം അഭിനയിക്കുന്ന കാര്യം ഭാര്യയെ വിളിച്ച് പറഞ്ഞു: എല്ലാം പ്രതീക്ഷിച്ചു: ദാസേട്ടന്‍ കോഴിക്കോട്

Updated: Sunday, February 23, 2025, 17:20 [IST]

അന്തരിച്ച നടന്‍ കൊല്ലം സുധിയുടെ ഭാര്യ രേണുവുമായി ചേർന്ന് ചെയ്ത വീഡിയോ വിവാദമാകുമെന്ന് നേരത്തെ തന്നെ അറിയാമായിരുന്നുവെന്ന് ദാസേട്ടന്‍ കോഴിക്കോട്. വിവാദമായ വീഡിയോയില്‍ രേണുവിനൊപ്പം അഭിനയിച്ചത് 'ദാസേട്ടന്‍ കോഴിക്കോട്' ആയിരുന്നു. വിവാദം ഉണ്ടാക്കാനായിട്ടുള്ള ഒരു കാര്യവും ഞങ്ങള്‍ ചെയ്തിട്ടില്ലെന്നാണ് അദ്ദേഹം പറയുന്നത്. സാധാരണ ഞങ്ങള്‍ ചെയ്യാറുള്ള റീലിന് ഒരു മില്യണ്‍ വ്യൂസും പ്രതികരണങ്ങളുമൊക്കെ ഉണ്ടാകാറുണ്ട്. എന്നാല്‍ പുതിയ റീല്‍ ഇത്രയധികം വൈറലാകുമെന്ന് യൂട്യൂബിലേയും ഫേസ്ബുക്കിലേയും ആളുകള്‍ ഏറ്റെടുത്ത് വേറെ രീതിയിലേക്ക് മാറ്റുമെന്ന് പ്രതീക്ഷിച്ചിരുന്നുമില്ലെന്നും അദ്ദേഹം പറയുന്നു.

വിവാദം ഞങ്ങള്‍ക്ക് വിഷയം അല്ല. രേണു അവളുടെ അഭിപ്രായം കൃത്യമായി പറഞ്ഞിട്ടുണ്ട്. എന്നെ സംബന്ധിച്ചും ഇത് പ്രശ്നം അല്ല. നമ്മള്‍ നമ്മുടെ ജോലി ചെയ്യും. അതോടൊപ്പം തന്നെ റീലും ചെയ്യും. സുഹൃത്തുക്കളൊക്കെ നല്ല അഭിപ്രായമാണ് പറഞ്ഞത്. കുറേ സിനിമ സുഹൃത്തുക്കളൊക്കെ വിളിച്ചു. ഈ സീന്‍ ശരിക്കും ചെയ്ത ദിലീപേട്ടനെ നാളെ ഞാന്‍ കാണും. ചാലക്കുടിയിലെ ഞങ്ങളുടെ പരിപാടിയില്‍ മുഖ്യാതിഥി അദ്ദേഹമാണ്. അദ്ദേഹം എന്ത് പറയും എന്ന് അറിയില്ല.

രേണുവിന്റെ വീട്ടിലേക്ക് ആരും അരി വാങ്ങിക്കൊടുക്കുന്നില്ലാലോ. അവള്‍ എങ്ങനെ ജീവിക്കുന്നു എന്നും ആരും അന്വേഷിക്കുന്നില്ല. വിവാദങ്ങളില്‍ വീണ് അയ്യോ എന്നും പറഞ്ഞ് കരഞ്ഞ് ഇരിക്കുന്ന സ്വഭാവക്കാരിയല്ല രേണു. ഒരാള്‍ എങ്ങനെ ജീവിക്കണമെന്ന് തീരുമാനിക്കേണ്ടത് ഒരാളാണ്. വിമർശിക്കുന്നവരോട് ആ വഴിക്ക് പോകാന്‍ പറയും. എന്റെ വീട്ടിലാണെങ്കിലും ഇക്കാര്യത്തില്‍ പ്രശ്നമൊന്നും ഇല്ലെന്നും ദാസേട്ടന്‍ കോഴിക്കോട് പറയുന്നു. ഫൈനല്‍ ന്യൂസ് മലയാളം എന്ന യൂട്യൂബ് എന്ന യൂട്യൂബ് ചാനലിന് അനുവദിച്ച അഭിമുഖത്തില്‍ സംസാരിക്കുകയായിരുന്നു അദ്ദേഹം.

ഞാന്‍ ഇലക്ട്രിസിറ്റി ബോഡിലെ ഒരു ഉദ്യോഗസ്ഥനാണ്. എനിക്ക് മോശമില്ലാത്ത ജോലിയും നല്ല ശമ്പളവും ഉണ്ട്. ഒരു നേരം പോക്കിന് വേണ്ടി റീല്‍ ചെയ്യുന്ന വ്യക്തിയാണ്. ഫോളോവേഴ്സ് കുറഞ്ഞോ കൂടിയോ എന്നുള്ള ചിന്താഗതിയൊന്നും എനിക്കില്ല. അഭിനയിക്കാന്‍ കഴിവുള്ളവരോടൊപ്പം ഞാന്‍ അഭിനയിക്കും. എന്റെ കൂടെ ഷോർട് ഫിലിമില്‍ അഭിനയിച്ച പെണ്‌‍കുട്ടിയാണ് ദിലീപേട്ടന്റെ നായികയായി പവി കെയർ ടേക്കർ എന്ന ചിത്രത്തില്‍ അഭിനയിച്ചത്.

മലയാളികള്‍ക്കിടയില്‍ നല്ല ആളുകള്‍ ഉള്ളത് പോലെ തന്നെ മറ്റുള്ളവർ നന്നാകുന്നത് ഇഷ്ടപ്പെടാത്തവരുമുണ്ട്. എനിക്ക് കള്ളത്തരങ്ങളും ഒളിച്ച് വെക്കാനോ ഒന്നുമില്ല. ഞാന്‍ ഭാര്യയോടൊപ്പം റീല്‍ ചെയ്യുന്ന വ്യക്തിയാണ്. അല്ലാതെ റീല്‍സിനായി പെണ്‍കുട്ടികളെ നോക്കി നടക്കാറില്ല. പലരും സമീപിക്കുമ്പോള്‍ നല്ല കണ്ടന്റായി ചെയ്യും. ആളുകള്‍ പലതും ഇല്ലാത്ത കാര്യങ്ങള്‍ വിളിച്ച് പറയുകയാണ്. പിന്നെ എനിക്ക് ഇമേജിനെ യാതൊരു ഭയവും ഇല്ല. എനിക്ക് വിധിച്ച കഥാപാത്രങ്ങള്‍ എന്നെ തേടിയെത്തും. എന്റെ മൂന്ന് സിനിമകള്‍ ഇനി ഇറങ്ങാനുണ്ട്. അതില്‍ രണ്ടെണ്ണത്തില്‍ നല്ല വേഷമാണ്.

നന്നായി അഭിനയിക്കുന്ന വ്യക്തിയാണ് രേണു. രണ്ടര മണിക്കൂർ മാത്രമാണ് ആ റീല്‍ ചെയ്യാന്‍ വേണ്ടി വന്നത്. എന്റെ മക്കള്‍ക്കൊന്നും ഒരു വേവലാതിയില്ല. എന്റെ മൂത്തമകന്‍ വന്ന് പറഞ്ഞ് 'അച്ഛാ അടിപൊളിയായിട്ടുണ്ട്, ആ ചേച്ചി നന്നായിട്ടിട്ടുണ്ട്. ഭർത്താവ് മരിച്ചെന്നും കരുതി അയ്യോ പാവം എന്ന് പറഞ്ഞ് വീട്ടില്‍ ഇരിക്കാതെ ഇതൊക്കെ ചെയ്യുന്നതില്‍ യാതൊരു തെറ്റുമില്ല' എന്നാണെന്നും അദ്ദേഹം കൂട്ടിച്ചേർക്കുന്നു.