ഡ്രോൺ ആക്രമണമുണ്ടാകുമെന്ന് ഭീഷണി; തിരുവനന്തപുരം വിമാനത്താവളത്തിൽ സുരക്ഷ വർദ്ധിപ്പിച്ചു

തിരുവന്തപുരം: കേരളം, കർണാടക, തമിഴ്നാട് എന്നിവിടങ്ങളിലെ വിമാനത്താവളങ്ങളിൽ ഡ്രോൺ ആക്രമണം ഉണ്ടാവുമെന്ന് ഇ മെയിൽ സന്ദേശം. ഭീഷണി സന്ദേശത്തിന്റെ പശ്ചാത്തലത്തിൽ തിരുവനന്തപുരം വിമാനത്താവള അധികൃതർ സുരക്ഷാ ജാ​ഗ്രതാ നിർദ്ദേശം നൽകിയിട്ടുണ്ട്.

ഇന്ന് ഉച്ചയോടെയാണ് ഭീഷണി മെയിൽ വന്നത്. ഇതിന് പിന്നാലെ സുരക്ഷാ നടപടി ശക്തമാക്കി. വിമാനത്താവള അധികൃതർ നിരീക്ഷണം ശക്തമാക്കുകയും വിമാനത്താവള പരിധിയിൽ കർ‌ശന സുരക്ഷാ പ്രോട്ടോക്കോളുകൾ ഏർപ്പെടുത്തുകയും ചെയ്തിട്ടുണ്ട്.

വിമാനത്താവളത്തിലെ വിമാനങ്ങളെ ലക്ഷ്യമാക്കി ഇ മെയിൽ വഴി ബോംബ് ഭീഷണികൾ ലഭിക്കുന്നത് ഇതാദ്യമല്ല. കഴിഞ്ഞ വർഷം, രാജ്യത്തുടനീളമുള്ള വിമാനങ്ങൾക്ക് വ്യാജ ഭീഷണികളുടെ ഒരു പരമ്പര ഉണ്ടായിരുന്നു. എന്നാൽ മുമ്പ് ഇത്തരം ഭീഷണികൾ വ്യാജമാണെന്ന് കണ്ടെത്തുകയും ചെയ്തിട്ടുണ്ട്. എന്നാൽ ഡ്രോൺ ആക്രമണിത്തിന് സാധ്യതയുണ്ടെന്ന സന്ദേശം അധിക‍ൃതർ ​ഗൗരവത്തോടെയാണ് കാണുന്നത്.

അതേ സമയം, തിരുവനന്തപുരം വിമാനത്താവളത്തിൽ അസാധാരണ സാഹചര്യമില്ലെന്ന് അധിക‍ൃതർ അറിയിച്ചു. ഇ മെയിൽ സന്ദേശത്തിൽ തിരുവനന്തപുരം വിമാനത്താവളമെന്ന് പറഞ്ഞിട്ടില്ല. എന്നാൽ സന്ദേശത്തിന്റെ അടിസ്ഥാനത്തിൽ സുരക്ഷ വർദ്ധിപ്പിച്ചതാണെന്നും അധികൃതർ അറിയിച്ചതായാണ് റിപ്പോർട്ട്.