ഓണ്‍ലൈന്‍ പെണ്‍വാണിഭം: ജാമ്യത്തിനായി രാഹുലും രശ്മിയും... പറയുന്ന ന്യായം എന്താണ്?

ഓണ്‍ലൈന്‍ പെണ്‍വാണിഭം സംബന്ധിച്ച അന്വേഷണത്തിനൊടുവിലാണ് രാഹുല്‍ പശുപാലനും ഭാര്യ രശ്മി ആര്‍ നായരും അറസ്റ്റിലാകുന്നത്.

രാഹുലും രശ്മിയും ജാമ്യത്തിനായി ഹൈക്കോടതിയെ സമീപിച്ചിരിയ്ക്കുന്നു എന്നതാണ് ഒടുവില്‍ ലഭിയ്ക്കുന്ന വാര്‍ത്ത. ഇതിനെ എതിര്‍ത്തുകൊണ്ട് പ്രോസിക്യൂഷന്‍ രംഗത്ത് വന്നിട്ടുണ്ട്.

ചുംബന സമരം വന്‍ വിജയമായതോടെ അതിനോട് എതിര്‍പ്പുള്ളവര്‍ തങ്ങളെ കുടുക്കുകയായിരുന്നു എന്നാണ് രശ്മിയും രാഹുലും ജാമ്യ ഹര്‍ജിയില്‍ പറയുന്നത്.

കഴിഞ്ഞ 74 ദിവസങ്ങളായി തങ്ങള്‍ പോലീസ് കസ്റ്റഡിയിലാണ്. അന്വേഷണം ഏതാണ്ട് പൂര്‍ത്തിയാവുകയും ചെയ്തു. ഇനി തങ്ങള്‍ക്ക് ജാമ്യം അനുവദിയ്ക്കണം എന്നതാണ് രണ്ട് പേരുടേയും ആവശ്യം.

എന്നാല്‍ പോലീസ് ജാമ്യ ഹര്‍ജിയെ എതിര്‍ക്കുകയാണ്. ഓണ്‍ലൈന്‍ പെണ്‍വാണിഭത്തിന്റെ കേന്ദ്രം തന്നെ ഇവരാണെന്നാണ് പോലീസ് പറയുന്നത്. കൂടാതെ പ്രായപൂര്‍ത്തിയാകാത്ത പെണ്‍കുട്ടികളെ പോലും ഇവര്‍ കുടുക്കിയതായും പറയുന്നു.

പ്രായപൂര്‍ത്തിയാകാത്ത പെണ്‍കുട്ടികളെ കൂട്ടിക്കൊടുക്കല്‍(366എ), മനുഷ്യക്കടത്ത്(370) മനുഷ്യകടത്തിന് ശേഷം ദുരുപയോഗം ചെയ്യല്‍(370(1), ക്രിമിനല്‍ ഗൂഢാലോചന(120 ബി) തുടങ്ങിയ വകുപ്പുകളാണ് ഇവര്‍ക്കെതിരെ ചുമത്തിയിരിയ്ക്കുന്നത്. കൂടാതെ കുട്ടികളെ ലൈംഗികാതിക്രമങ്ങളില്‍ നിന്ന് സംരക്ഷിയ്ക്കുന്നതിനുള്ള നിയമ പ്രകാരവും കേസുകള്‍ രജിസ്റ്റര്‍ ചെയ്തിട്ടുണ്ട്.

തനിയ്ക്ക് ഈ കേസുമായി ഒരു ബന്ധവും ഇല്ലെന്നാണ് രശ്മി നായര്‍ പറയുന്നത്.

തിരുവനന്തപുരം സെഷന്‍സ് കോടതിയില്‍ നേരത്തെ രണ്ട് പേരും ജാമ്യത്തിന് അപേക്ഷിച്ചിരുന്നു. എന്നാല്‍ അത് കോടതി തള്ളി. ഈ സാഹചര്യത്തിലാണ് ഹൈക്കോടതിയെ സമീപിച്ചത്.

രശ്മിയുടേയും രാഹുലിന്റേയും ജാമ്യ ഹര്‍ജി കോടതി ഫയലില്‍ സ്വീകരിച്ചിട്ടുണ്ട്. ഫെബ്രിവരി 15 ന് കോടതി ഹര്‍ജി പരിഗണിയ്ക്കും.