കണ്ണൂരില്‍ ആര്‍എസ്എസ്സുകാര്‍ സിപിഎം സ്ത്രീകളെ വസ്ത്രാക്ഷേപം ചെയ്തു?

Published: Sunday, August 30, 2015, 16:10 [IST]

കണ്ണൂര്‍: തിരുവോണ നാളില്‍ തുടങ്ങിയതാണ് സംസ്ഥാനത്ത് രാഷ്ട്രീയ സംഘട്ടനങ്ങള്‍. ഇതുവരെ അതിന് അവസാനമായിട്ടില്ല. രണ്ട് പേര്‍ക്ക് ഇതിനകം തന്നെ ജീവന്‍ നഷ്ടപ്പെട്ടുകഴിഞ്ഞു.

സംഘര്‍ഷത്തിന്റെ കാര്യത്തില്‍ കണ്ണൂര്‍ ജില്ലയും പിറകിലല്ല. രണ്ട് ദിവസമായി ഇവിടേയും പ്രശ്‌നങ്ങളാണ്. ബിജെപി ജില്ലാ പ്രസിഡന്റിന് വീടിന് നേര്‍ക്ക് ബോംബേറുണ്ടായി.

എന്നാല്‍ ഏറ്റവും ഒടുവില്‍ പുറത്തുവരുന്ന വാര്‍ത്ത തീരെ ആശാസ്യകരമല്ല. സിപിഎം പ്രവര്‍ത്തകന്റെ വീട്ടില്‍ കയറി ആക്രമണം നടത്തിയ ആര്‍എസ്എസ് പ്രവര്‍ത്തകര്‍ സ്ത്രീകളെ വസ്ത്രാക്ഷേപം ചെയ്യാന്‍ ശ്രമിച്ചു എന്നാണ് വാര്‍ത്ത. റിപ്പോര്‍ട്ടര്‍ ടിവിയാണ് ഇക്കാര്യം റിപ്പോര്‍ട്ട് ചെയ്തിരിയ്ക്കുന്നത്.

കണ്ണൂര്‍ ചാവശ്ശേരിയിലാണ് സംഭവം. ബിജെപി ഉപേക്ഷിച്ച് സിപിഎമ്മില്‍ ചേര്‍ന്ന ആളുടെ വീടിന് നേര്‍ക്കാണ് ആക്രമണം ഉണ്ടായത്. വീട്ടിലുണ്ടായിരുന്ന മൂന്ന് സ്ത്രീകളെ ആക്രമിച്ചു എന്നാണ് പരാതിയില്‍ പറയുന്നത്. ഇതില്‍ ഒരാള്‍ ഗര്‍ഭിണിയാണ്.

സ്ത്രീകളെ വസ്ത്രാക്ഷേപം നടത്തിയതായും പരാതിയില്‍ പറയുന്നുണ്ട്. ബിജെപി വിട്ട പ്രവര്‍ത്തകന്‍ സിപിഎം പാര്‍ട്ടി പ്രവര്‍ത്തനം അവസാനിപ്പിച്ചില്ലെങ്കില്‍ സ്ത്രീകളുടെ ചിത്രങ്ങള്‍ സോഷ്യല്‍ മീഡിയയിലൂടെ പുറത്ത് വിടും എന്ന് ഭീഷണിപ്പെടുത്തുകയും ചെയ്തതായി പരാതിയില്‍ പറയുന്നു.

പരിക്കേറ്റ മൂന്ന് സ്ത്രീകളും കണ്ണൂരിലെ എകെജി ആശുപത്രിയില്‍ ചികിത്സയിലാണ്.

Published On August 30, 2015