യുക്രെയിൻ സംഘർഷം: ദില്ലിയിൽ എത്തുന്ന മലയാളി വിദ്യാര്ത്ഥികൾക്ക് വിമാന ടിക്കറ്റുകൾ സർക്കാർ നൽകും
തിരുവനന്തപുരം : യുക്രയിനില് നിന്നും കേന്ദ്രസര്ക്കാര് ഒരുക്കിയ ഒഴിപ്പിക്കല് വിമാനങ്ങളില് ഡല്ഹി, മുംബൈ തുടങ്ങിയ ഇന്ത്യന് നഗരങ്ങളിലെത്തുന്ന വിദ്യാര്ത്ഥികള്ക്ക് കേരളത്തിലേക്കുള്ള വിമാന ടിക്കറ്റുകള് സംസ്ഥാന സര്ക്കാര് നല്കുമെന്ന് മുഖ്യമന്ത്രി പിണറായി വിജയന് അറിയിച്ചു .
ഇന്ത്യയിലെത്തുന്ന മലയാളികളുടെ വിവരങ്ങള് മുന്കൂട്ടി ലഭ്യമാകാന് വേണ്ട നടപടികള് സ്വീകരിച്ചിട്ടുണ്ട് . വിമാനത്താവളത്തിലെത്തുന്ന വിദ്യാര്ത്ഥികളെ സ്വീകരിച്ച് നാട്ടിലേയ്ക്കുള്ള യാത്ര സുഗമമാക്കാന് വേണ്ട നടപടികള് റെസിഡന്റ് കമ്മീഷണറും നോര്ക്ക ഉദ്യോഗസ്ഥരും കൈക്കൊള്ളും. കേരളത്തിലെ വിമാനത്താവളങ്ങളില് എത്തുന്ന വിദ്യാര്ത്ഥികളെ സ്വീകരിക്കുന്നതിനും അവശ്യ സൗകര്യങ്ങള് ഒരുക്കുന്നതിനും ജില്ലാ കലക്ടര്മാരെ ചുമതലപ്പെടുത്തിയിട്ടുണ്ടെന്ന് മുഖ്യമന്ത്രി വ്യക്തമാക്കി .
അതേ സമയം, യുക്രയ്നില് കുടുങ്ങിയ മലയാളികളുടെ സുരക്ഷയ്ക്കായി സാധ്യമായ എല്ലാ നടപടികളും കൈക്കൊണ്ടു വരികയാണെന്ന് മുഖ്യമന്ത്രി അറിയിച്ചിരുന്നു. അവര്ക്ക് ആവശ്യമായ സഹായങ്ങള് ഉറപ്പുവരുത്തുന്നതിനായി 24 മണിക്കൂറും പ്രവര്ത്തനസജ്ജമായ സെല് നോര്ക്കയില് ആരംഭിച്ചു. നോര്ക്കയുടെ ഇ മെയില് വിലാസം വഴിയും സേവനം പ്രയോജനപ്പെടുത്താം. കഴിഞ്ഞ ദിവസം പകല് 22 യൂണിവേഴ്സിറ്റികളില് നിന്നായി 468 വിദ്യാര്ത്ഥികളും രാത്രി 20 യൂണിവേഴ്സിറ്റികളില് നിന്ന് 318 വിദ്യാര്ത്ഥികളും നോര്ക്കയുമായി ബന്ധപ്പെട്ടുകഴിഞ്ഞെന്നും മുഖ്യമന്ത്രി അറിയിച്ചിരുന്നു .
സ്ഥിതിഗതികള് അറിയാന് ഇന്ത്യന് എംബസിയുമായും വിദേശകാര്യ മന്ത്രാലയവുമായും നിരന്തരം ബന്ധപ്പെട്ടുവരികയാണ്. വിദ്യാര്ത്ഥികള് പുറത്തിറങ്ങുന്നത് ഒഴിവാക്കി ഇപ്പോഴുള്ള സ്ഥലങ്ങളില് തന്നെ തുടരണമെന്ന നിര്ദ്ദേശമാണ് നല്കിയിരിക്കുന്നത്.
മലയാളികള് അടക്കമുള്ളവരെ പുറത്തെത്തിക്കാന് നടപടികള് തുടങ്ങിക്കഴിഞ്ഞു. ഇന്ത്യക്കാരെ ഉക്രൈനിന്റെ അയല്രാജ്യങ്ങളായ പോളണ്ട്, ഹംഗറി, സ്ളൊവാക്യ, റൊമേനിയ എന്നിവിടങ്ങളില് റോഡ് മാര്ഗം എത്തിച്ചശേഷം ഇന്ത്യയിലേക്ക് കൊണ്ടുവരാനാണ് പദ്ധതി. ഇതിനായുള്ള രജിസ്ട്രേഷന് ആരംഭിച്ചു. എയര് ഇന്ത്യ വിമാനങ്ങള് നാളെ റൊമേനിയയിലേക്ക് അയക്കും എന്ന അറിയിപ്പ് ലഭിച്ചിട്ടുണ്ട്.
ഇതിനിടെ, യുക്രൈനിൽ കുടുങ്ങിയ മലയാളികളുടെ വിവര ശേഖരണത്തിനായി നോർക്ക റൂട്സ് ഓൺലൈൻ രജിസ്ട്രേഷൻ ആരംഭിച്ചിരുന്നു. നോർക്ക റൂട്ട്സിന്റെ www.norkaroots.org ൽ http://ukrainregistration.norkaroots.org എന്ന ലിങ്ക് വഴി വിവരങ്ങൾ അപ്ലോഡ് ചെയ്യാം. പാസ്പോർട്ട് വിശദാംശങ്ങൾ, പഠിക്കുന്ന സർവകലാശാല തുടങ്ങി സമഗ്രമായ വിവരശേഖരണമാണ് ലക്ഷ്യമിടുന്നത്. നോർക്ക ശേഖരിക്കുന്ന വിവരങ്ങൾ കേന്ദ്ര വിദേശകാര്യ മന്ത്രാലയത്തിനും ഉക്രൈനിലെ ഇന്ത്യൻ എംബസിക്കും കൈമാറും .
മലയാളികളുടെ സുരക്ഷയ്ക്കായി സാധ്യമായ എല്ലാ നടപടികളും കൈക്കൊണ്ടുവരുന്നുണ്ട്. എംബസിയുമായും വിദേശകാര്യ മന്ത്രാലയവുമായുള്ള ഏകോപനത്തിനായി കൺട്രോൾ റൂം പ്രവർത്തനം തുടരുകയാണ്. 27 സർവകലാശാലകളിൽ നിന്നായി 1132 വിദ്യാർഥികൾ ഇതുവരെ നോർക്കയുമായി ബന്ധപ്പെട്ടിട്ടുണ്ട്. ഇവരുടെ വിവരങ്ങൾ വിദേശകാര്യ മന്ത്രാലയത്തിനും ഉക്രൈനിലെ ഇന്ത്യൻ എംബസിക്കും കൈമാറിയതായി നോർക്ക റൂട്സ് സിഇഒ അറിയിച്ചു.
ഓൺലൈൻ രജിസ്ട്രേഷനു പുറമെ കീവിലെ ഇന്ത്യൻ എംബസി ഏർപ്പെടുത്തിയിട്ടുള്ള +380997300483, +380997300428 എന്നീ നമ്പരുകളിലോ [email protected] എന്ന ഇ-മെയിലിലോ ബന്ധപ്പെടാം .
വിദേശകാര്യ മന്ത്രാലയത്തിന്റെ 1800 118797 എന്ന ടോൾ ഫ്രീ നമ്പരും +911123012113, +911123014104, +911123017905 എന്നീ നമ്പരുകളും [email protected] എന്ന ഇ-മെയിൽ വിലാസവും പ്രയോജനപ്പെടുത്താം . മലയാളികളുടെ വിവരങ്ങൾ നോർക്കയിൽ അറിയിക്കാൻ ആഗ്രഹിക്കുന്ന നാട്ടിലെ ബന്ധുക്കൾക്ക് നോർക്ക റൂട്ട്സിന്റെ 1800 425 3939 എന്ന ടോൾ ഫീ നമ്പരിലോ [email protected] എന്ന ഇ-മെയിലിലോ വിവരം നൽകാം. 0091 880 20 12345 എന്ന നമ്പരിൽ വിദേശത്തു നിന്നും മിസ്സ്ഡ് കോൾ സർവീസും ലഭ്യമാണ് .
Click it and Unblock the Notifications
Sign in with Google