ഇനി സമരമില്ലേ? സര്‍ക്കാരിനും കോടതിക്കും നല്ല ബുദ്ധി തോന്നാന്‍ ഗണപതി ഹോമവും നാമജപങ്ങളും!!!

കൊച്ചി: ശബരിമല സ്ത്രീ പ്രവേശന വിധിയ്‌ക്കെതിരെ വലിയ പ്രതിഷേധങ്ങളാണ് അരങ്ങേറിയത്. വീണ്ടും ശബരിമല നട തുറക്കുമ്പോള്‍ അക്രമസംഭവങ്ങള്‍ ഉണ്ടാകാതിരിക്കാന്‍ സര്‍ക്കാര്‍ കടുത്ത ജാഗ്രതയില്‍ ആണ്.

അതിനിടെ ആണ് മറ്റൊരു വാര്‍ത്ത പുറത്ത് വരുന്നത്. ശബരിമലയുടെ കാര്യത്തില്‍ സര്‍ക്കാരിനും കോടതിയ്ക്കും നല്ല ബുദ്ധി തോന്നാന്‍ വേണ്ടി ഗണപതി ഹോമവും നാമജപവും നടത്തുന്നു എന്നതാണത്.

ആചാര സംരക്ഷണത്തിനായി എല്ലാ ക്ഷേത്രങ്ങളശിലും തുടര്‍ച്ചയായി 12 ദിവസങ്ങളില്‍ ഗണപതി ഹോമവും നാമജപങ്ങളും നടത്തും എന്നാണ് ഹൈന്ദവ ധര്‍മ ആചാര്യ സംഗമം പ്രഖ്യാപിച്ചിരിക്കുന്നത്.

എറണാകുളത്ത് ആചാര്യ സംഗമത്തിന് ശേഷം തന്ത്രിസമാജം പ്രതിനിധികള്‍ ആണ് വാര്‍ത്താ സമ്മേളനത്തില്‍ ഇക്കാര്യം അറിയിച്ചിരിക്കുന്നത്. ദൈവത്തിന്റെ കാര്യത്തിലും ആചാരാനുഷ്ഠാനങ്ങളുടെ കാര്യത്തിലും വിശ്വാസമില്ലാത്തവര്‍ ഇടപെടരുത് എന്നാണ് ഇവര്‍ പറയുന്നത്. അങ്ങനെ വന്നാല്‍ അവയുടെ നാശം സംഭവിക്കും. ആചാരങ്ങളില്‍ മാറ്റം വരുത്തന്നത് അംഗീകരിക്കാന്‍ ആവില്ലെന്നും ഇവര്‍ പറയുന്നുണ്ട്.

ഈശ്വരസാന്നിധ്യത്തെ കുറിച്ച് വിധി പറയാന്‍ കോടതികള്‍ക്ക് കഴിയില്ലെന്നും ഇവര്‍ പറയുന്നുണ്ട്. സുപ്രീം കോടതി വിധി, കേരളത്തിലെ നാല്‍പതിനായിരത്തോളം ക്ഷേത്രങ്ങളിലെ ആരാധനാക്രമത്തെ ചോദ്യം ചെയ്യുന്നതാണെന്നും ഇവര്‍ പറയുന്നുണ്ട്.

English summary

Sabarimala Woman entry verdict: Haindava Dharma Acharya Sanghamam decides to conduct 12 days Ganapathi homam in all temples